ବରଣମାଳା ପରେ ସାଙ୍ଗମାନେ ଖୁସିରେ ଗୁଳି ଫୁଟାଇବା ହେଲା କାଳ, ଆର ପାରିକୁ ଚାଲିଗଲା ବର
ପାଟନା : ପାଟନାରେ ବିବାହ ପାଇଁ ଖୁସିର ବାତାବରଣ ଥିବା ବେଳେ ବରର ମୃତ୍ୟୁ ପରିବାରରେ ଶୋକର ଛାୟା ଖେଳାଇ ଦେଇଛି । ବିବାହ ପାଇଁ ବରଯାତ୍ରୀ ନେଇ ପହଞ୍ଚିବା ସହ ବରଣମାଳା ରୀତିନୀତି ପୂରା କରିଥିଲେ ବର-କନ୍ୟା । ଯାହା ପରେ ବରର ସାଙ୍ଗମାନେ ଖୁସିରେ ଗୁଳି ଫୁଟାଇବା ଆରମ୍ଭ କରିଥିଲେ । କିନ୍ତୁ ତାଙ୍କର ଖୁସି ପାଳନ କରିବାର ଏଭଳି ଉପାୟ କାହାର ଜୀବନ ନେଇଯିବ, ତାହା ଜଣା ନଥିଲା । ଷ୍ଟେଜ୍ ଉପରେ ବର ଏବଂ ତାଙ୍କ ଭାଇକୁ ଗୁଳି ବାଜିବା ପରେ ତୁରନ୍ତ ଦୁହିଁଙ୍କ ଡ଼ାକ୍ତରଖାନା ଦିଆଯାଇଥିଲା । କିନ୍ତୁ ଡ଼ାକ୍ତରଖାନାରେ ଚିକିତ୍ସା କରାଯିବା ପରେ ବରକୁ ମୃତ ଘୋଷଣା କରିଥିଲେ ଡ଼ାକ୍ତର । ଘଟଣାଟି ପୁଲିସ ପାଖରେ ପହଞ୍ଚିଥିବା ବେଳେ ଗୁଳି ଫୁଟାଇଥିବା ଯୁବକ ଫେରାର ଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ରବିବାର ସତେନ୍ଦ୍ର କୁମାରଙ୍କ ବିବାହ ଥିବା ବେଳେ ରାତି ୧୦ଟା ସମୟରେ ବରଯାତ୍ରୀ ଧରି କନ୍ୟା ଘରେ ପହଞ୍ଚିଥିଲେ ବରପକ୍ଷ । ଏହା ପରେ ବିବାହର ରୀତିନୀତି ଆରମ୍ଭ ହୋଇ ଯାଇଥିଲା । ବରଣମାଳା ସରିବା ପରେ କନ୍ୟା ଘର ଭିତରକୁ ଚାଲିଯିବା ସହ ବରର ସାଙ୍ଗମାନେ ଷ୍ଟେଜ୍ ଉପରକୁ ଉଠି ଖୁସିରେ ଗୁଳି ଫୁଟାଇଥିଲେ । କିନ୍ତୁ ୩ଥର ପ୍ରୟାସ କରିବା ପରେ ମଧ୍ୟ ବନ୍ଧୁକରୁ ବୁଲେଟ ବାହାରି ନଥିଲା । ବରର ସାଙ୍ଗ କ’ଣ ଅସୁବିଧା ହୋଇଛି ଦେଖିବା ପାଇଁ ବନ୍ଧୁକ ତଳକୁ ଆଣିବା ସମୟରେ ହଠାତ ଗୁଳି ଫୁଟିଯିବାରୁ ବର ଏବଂ ତାଙ୍କ ଭାଇ ଦେହରେ ଯାଇ ବାଜିଥିଲା । ତୁରନ୍ତ ଦୁହିଁଙ୍କୁ ଡ଼ାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ସତେନ୍ଦ୍ରଙ୍କ ମୃତ୍ୟୁ ସୋମବାର ସକାଳ ୬ଟାରେ ହୋଇଥିଲା । ଅନ୍ୟ ପକ୍ଷରେ ତାଙ୍କ ଭାଇ ଗୁଡୁର ଅବସ୍ଥା ଏବେ ଗୁରୁତର ଥିବା ଜଣା ପଡ଼ିଛି । ବିହାରରେ ଗୁଳି ଫୁଟାଇ ଖୁସି ପାଳନ କରାଯାଉଥିବା ବେଳେ ଏହା ଉପରେ ପ୍ରତିବନ୍ଧକ ଲଗାଇଥିଲେ ସରକାର । କିନ୍ତୁ ଏବେ ବି ଲୋକେ ଗୁଳି ଫୁଟାଇ ଖୁସି ପାଳନ କରୁଥିବା ଦେଖା ଯାଉଛି ।