ବିମାନର ଶୌଚାଳୟରେ କ୍ୟାମେରା ରଖି କକ୍ପିଟରେ ଲାଇଭ୍ ଭିଡିଓ ଦେଖୁଥିଲେ ପାଇଲଟ! ତା’ପରେ…
ନୂଆଦିଲ୍ଲୀ : ଆମେରିକାର ଦକ୍ଷିଣ-ପଶ୍ଚିମ ଏୟାରଲାଇନ୍ସର ପାଇଲଟଙ୍କୁ ନେଇ ଏକ ଅଜବ ଖବର ସାମ୍ନାକୁ ଆସିଛି । ପାଇଲଟ୍ମାନେ ବିମାନର ଶୌଚାଳୟରେ କ୍ୟାମେରା ରଖିବା ସହ କକ୍ପିଟ୍ରେ ବସି ଭିତରର ଲାଇଭ୍ ଭିଡିଓ ଦେଖୁଥିବା ଜଣାପଡ଼ିଛି । ଏୟାରଲାଇନ୍ସର ଅନ୍ୟ ଜଣେ ପାଇଲଟ୍ ନିଜର ଦୁଇ ସାଥୀ ପାଇଲଟ୍ଙ୍କ ଉପରେ ଏଭଳି ଅଭିଯୋଗ ଆଣିବା ପରେ ଖବରଟି ସାମ୍ନାକୁ ଆସିଥିଲା, ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ଗତ ବର୍ଷ ଏହି ମାମଲାଟି ଏରିଜୋନା ରାଜ୍ୟ ଅଦାଲତକୁ ଯାଇଥିବା ବେଳେ ଏବେ ମାମଲାକୁ ଫେଡେରାଲ କୋର୍ଟକୁ ସ୍ଥାନନ୍ତର କରି ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
୨୦୧୭ରେ ହୋଇଥିବା ଅଭିଯୋଗ ମୁତାବକ, ପିଟସବର୍ଗରୁ ଫିନିକ୍ସ ଯିବାକୁ ଥିବା ବିମାନର ଦୁଇ ପାଇଲଟ ଶୌଚାଳୟ ମଧ୍ୟରେ କ୍ୟାମେରା ରଖି ଯାତ୍ରୀ ଓ କ୍ର୍ୟୁ ସଦସ୍ୟଙ୍କ ଆପତ୍ତିଜନକ ଭିଡିଓ ଉତ୍ତୋଳନ କରିଥିଲେ । ଯାହାକୁ ସେମାନେ କକ୍ପିଟରେ ବସି ଦେଖୁଥିବା ଦୃଶ୍ୟ ଅନ୍ୟ ଜଣେ ପାଇଲଟ୍ ଦେଖି ଏ ନେଇ ଅଭିଯୋଗ ଆଣିଥିଲେ । ତେବେ ମାମଲାକୁ ନେଇ ବିବାଦ ଦେଖାଦେବା ପରେ ଦକ୍ଷିଣ-ପଶ୍ଚିମ ଏୟାରଲାଇନ୍ସ ଶୌଚାଳୟରେ କୌଣସି କ୍ୟାମେରା ଲାଗିବା ଖବରକୁ ମିଛ ବୋଲି କହିଥିଲା । ଏହା ସହ ଦୁଇ ପାଇଲଟ୍ଙ୍କର ମଜା କରିବାର ଏକ ଖରାପ ପ୍ରୟାସ ଥିଲା ବୋଲି ଦକ୍ଷିଣ-ପଶ୍ଚିମ ଏୟାରଲାଇନ୍ସ କହିଥିଲା । କିନ୍ତୁ ଯାଞ୍ଚ ପରେ କ୍ୟାମେରା ଲାଗିବା କଥା ସ୍ପଷ୍ଟ ହେବା ପରେ ଏବେ ମାମଲାକୁ ଫେଡେରାଲ କୋର୍ଟକୁ ସ୍ଥାନାନ୍ତର କରି ଦିଆଯାଇଛି ।