ଆମେରିକା ପଠାଇଦେବାରୁ ପ୍ରେମିକାର ବାପାକୁ ଗୁଳି କଲା ପ୍ରେମିକ

ହାଇଦ୍ରାବାଦ: ଆମେରିକା ପଠାଇଦେବାରୁ ପ୍ରେମିକାର ବାପାକୁ ଗୁଳି କଲା ପ୍ରେମିକ | ରବିବାର ହାଇଦ୍ରାବାଦରେ ଘଟିଛି ଏଭଳି ଘଟଣା | ଅଭିଯୁକ୍ତର ନାମ ବଲୱିନ୍ଦର ସିଂ (୨୫) ହୋଇଥିବା ବେଳେ ପୀଡିତଙ୍କ ନାମ ରେବାନ୍ତ ଆନନ୍ଦ (୫୭) ବୋଲି ଜଣାପଡିଛି | ବଲୱିନ୍ଦର, ରେବାନ୍ତଙ୍କୁ ଗୁଳି ମାରିଥିବା ବେଳେ ଗୁଳିଟି ତାଙ୍କ ଆଖିକୁ ଛୁଇଁ ବାହାରିଯାଇଥିବା ଜଣାଯାଇଛି | ଅନ୍ୟପକ୍ଷରେ ଏହି ଘଟଣାକୁ ନେଇ ଅଭିଯୋଗ ହେବାରୁ ପୁଲିସ ବଲୱିନ୍ଦରକୁ ଗିରଫ କରିଛି |

ଅଭିଯୋଗ ମୁତାବକ, ଗତ କିଛି ବର୍ଷ ତଳେ ବଲୱିନ୍ଦର, ଆନନ୍ଦଙ୍କ ୨୩ବର୍ଷର ଝିଅ ସହିତ ବନ୍ଧୁତା କରିଥିଲେ। ସାଥିରେ ସମୟ କଟାଇବ ପରେ ଦୁହେଁ ପରସ୍ପରର ପ୍ରେମରେ ପଡ଼ିଥିଲେ | ଏବିଷୟରେ ରେବାନ୍ତ ଜାଣିବା ପରେ ଦୁହିଁଙ୍କୁ ଦେଖା ହେବାକୁ ମନା କରିଥିଲେ | ଏହା ସତ୍ତ୍ୱେ ବି ଦୁହେଁ ପରସ୍ପରକୁ ଦେଖା ହେବା ସହ ଫୋନରେ କଥା ହେଉଥିଲେ | ଏବିଷୟରେ ଜାଣିବା ପରେ ରେବାନ୍ତ, ଝିଅକୁ ଆମେରିକା ପଠାଇ ଦେଇଥିଲେ | ପ୍ରେମିକାଠାରୁ ଅଲଗା ହେବାରୁ ରାଗରେ ବଲୱିନ୍ଦର, ରେବାନ୍ତଙ୍କ ଘରକୁ ଆସି ତାଙ୍କ ସହ ଝଗଡା କରିଥିଲେ | ଏହି ସମୟରେ ଝଗଡା ବଢ଼ିବାରୁ ବଲୱିନ୍ଦର, ରେବାନ୍ତଙ୍କୁ ଅତି ପାଖରୁ ଗୁଳି ମାରିଥିଲେ, ଯାହା ତାଙ୍କ ଆଖିରେ ଯାଇ ବାଜିଥିଲା |