ନାବାଳିକା ସହ ଦୁଷ୍କର୍ମ କଲା ସ୍ୱାମୀ, ଜେଲ୍ ଯିବାରୁ ବଞ୍ଚାଇବା ପାଇଁ ଦୁହିଁଙ୍କ ବିବାହ କରାଇଦେଲେ ପତ୍ନୀ
ନୂଆଦିଲ୍ଲୀ : କର୍ଣ୍ଣାଟକରେ ଏକ ଆଶ୍ଚର୍ଯ୍ୟ କଲା ଭଳି ଘଟଣା ଘଟିଛି । ସ୍ୱାମୀକୁ ଜେଲ୍ ଯିବାରୁ ବଞ୍ଚାଇବା ପାଇଁ ଜଣେ ପତ୍ନୀ ନିଜ ସ୍ୱାମୀ ସହ ଦୁଷ୍କର୍ମ ପୀଡ଼ିତାଙ୍କ ବିବାହ କରାଇଦେବା ଘଟଣା ସ୍ଥାନୀୟ ବାସିନ୍ଦାଙ୍କୁ ଆଶ୍ଚର୍ଯ୍ୟ କରିଛି । ଘଟଣାଟି କୋଲାର ଜିଲ୍ଲାରେ ଘଟିଥିବା ବେଳେ ବିବାହ ପାଇଁ ଅଭିଯୁକ୍ତଙ୍କ ପତ୍ନୀ ପୀଡ଼ିତାଙ୍କୁ ବାଧ୍ୟ କରିବା ସହ ଜୋର ଜବରଦସ୍ତ ବିବାହ କରାଇ ଦେଇଥିଲେ । ଏହି ଘଟଣା ସାମ୍ନାକୁ ଆସିବା ପରେ ଉଭୟ ସ୍ୱାମୀ-ସ୍ତ୍ରୀଙ୍କୁ ଗିରଫ କରିବା ସହ ପୋସ୍କୋ ଆକ୍ଟ ଅନୁଯାୟୀ ମାମଲା ରୁଜୁ କରିଛି ପୁଲିସ ।
Sambad is now on WhatsApp
Join and get latest news updates delivered to you via WhatsApp
ପୁଲିସ ଦେଇଥିବା ସୂଚନା ମୁତାବକ, ଗଙ୍ଗରାଜୁ ନିଜ ଗ୍ରାମର ଜଣେ ଦଳିତ ନାବାଳିକାଙ୍କ ସହ ବନ୍ଧୁତା କରିବା ସହ ଦିନେ ତାଙ୍କୁ ଘରକୁ ଡ଼ାକି ତାଙ୍କ ସହ ଦୁଷ୍କର୍ମ କରିଥିଲେ । ପରେ ଏ ବିଷୟରେ କାହାକୁ ନ ଜଣାଇବା ପାଇଁ କହିଥିବା ବେଳେ ଧୀରେ ଧୀରେ କଥାଟି ଚାରିଆଡ଼େ ପ୍ରଘଟ ହୋଇ ଯାଇଥିଲା । ଘଟଣାର ଚାଇଲଡ୍ ହେଳ୍ପଲାଇନ୍କୁ ମିଳିବା ପରେ ସେମାନେ ଏହାର ସୂଚନା ପୁଲିସକୁ ଦେଇଥିଲେ । ପୁଲିସ ଆସି ପୀଡ଼ିତାଙ୍କୁ ପଚରାଉଚରା କରିବା ପରେ ସେ ଡ଼ରରେ ପୁଲିସକୁ କିଛି ବି କହି ନଥିଲେ ।
ଅନ୍ୟ ପକ୍ଷରେ ପୁଲିସ ପଚରାଉଚରା କରିଥିବା କଥା ଜାଣି ସ୍ୱାମୀଙ୍କୁ ଜେଲ୍ ଯିବାରୁ ରୋକିବା ପାଇଁ ଅଭିଯୁକ୍ତଙ୍କ ପତ୍ନୀ ପୀଡ଼ିତାଙ୍କ ସହ ନିଜ ସ୍ୱାମୀଙ୍କ ବିବାହ କରାଇ ଦେଇଥିଲେ । କିଛି ଦିନ ପରେ ପୁଲିସ ପୁଣି ଥରେ ପୀଡ଼ିତାଙ୍କୁ ନ୍ୟାୟ ଦେବାର ବିଶ୍ୱାସ ଦେଇ ପଚରାଉଚରା କରିବା ପରେ ପୀଡ଼ିତା ପୂରା ଘଟଣା ବିଷୟରେ ଜଣାଇଥିଲେ । ପରେ ପୀଡ଼ିତାଙ୍କ ବାପାଙ୍କ ଅଭିଯୋଗକ୍ରମେ ପୁଲିସ ଅଭିଯୁକ୍ତ ଏବଂ ତାଙ୍କ ପତ୍ନୀଙ୍କୁ ଗିରଫ କରିଥିବା ଜଣା ପଡ଼ିଛି ।