ମାଲାପୁରମ୍ : ବିବାହର କିଛି ସମୟ ପୂର୍ବରୁ ଲିଭି ଯାଇଛି କନ୍ୟାର ଜୀବନ ଦୀପ । ନିଜ ସ୍ୱପ୍ନର ରାଜକୁମାରକୁ ବିବାହ କରିବାର ସ୍ୱପ୍ନ ଅଧୁରା ରହି ଯାଇଛି । ଅଲଗା ଜାତିରେ ଝିଅ ଭଲପାଇ ବିବାହ କରୁଥିବାରୁ ରାଗରେ ନିଜ ଝିଅକୁ ହତ୍ୟା କରିଛି ବାପା । ଏହି ଘଟଣାଟି କେରଳର ମାଲାପୁରମ୍ ଜିଲ୍ଲା ଅନ୍ତର୍ଗତ ଏରିକୋଡ଼େ ଗ୍ରାମରେ ଘଟିଥିବା ବେଳେ ଅଭିଯୁକ୍ତ ବାପାକୁ ଗିରଫ କରାଯାଇଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମଞ୍ଜରୀ ମେଡ଼ିକାଲ କଲେଜରେ ଡ଼ାଏଲିସିସ୍ ସେଣ୍ଟରରେ କାମ କରୁଥିବା ମୃତ ଅଥିରା ଜଣେ ଅନୁସୂଚିତ ଜାତିର ଯବାନଙ୍କୁୁ ଭଲ ପାଇ ବସିଥିଲେ । ଘରେ ବିବାହ କଥା ଉଠିବାରୁ ଅଥିରା ନିଜ ଭଲ ପାଇବା ବିଷୟରେ ଘରେ ଜଣାଇଥିଲେ । ଅଥିରା ଥିୟା ସଂପ୍ରଦାୟର ହୋଇଥିବାରୁ ଅଥିରାଙ୍କ ବାପା ରଜନ୍ ବିବାହ ପାଇଁ ମନା କରି ଦେଇଥିଲେ । ଏ ନେଇ ପୁଲିସରେ ଅଭିଯୋଗ ହେବା ପରେ ରଜନ୍ ଅଥିରାଙ୍କ ବିବାହ ପାଇଁ ରାଜି ହୋଇଥିଲେ ।
କିନ୍ତୁ ଝିଅ ଅନ୍ୟ ଜାତିରେ ବିବାହ କଲେ ତାଙ୍କର ସମ୍ମାନ ହାନି ହେବ ବୋଲି ଭାବି ସେ ଚୁପ୍ ରହି ନଥିଲେ । ଗୁରୁବାର ଏ ନେଇ ଅଥିରା ଏବଂ ତାଙ୍କ ବାପାଙ୍କ ମଧ୍ୟରେ ଝଗଡ଼ା ହେବା ପରେ ରଜନ୍ ଏକ ଧାରୁଆ ଅସ୍ତ୍ରରେ ଅଥିରାଙ୍କୁ ହାଣି ଦେଇଥିଲେ । ତାଙ୍କ ରାଗ ଏତେ ଥିଲା ଯେ ସେ ବାରମ୍ବାର ଅଥିରାଙ୍କ ଶରୀରକୁ ଚୋଟ ଉପରେ ଚୋଟ ମାରି ଚାଲିଥିଲେ । ପରିବାର ଲୋକ ତାଙ୍କୁ ସଙ୍ଗେ ସଙ୍ଗେ ଡ଼ାକ୍ତରଖାନା ନେଇଥିଲେ ମଧ୍ୟ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ । ଶୁକ୍ରବାର ଅଥିରାଙ୍କ ବିବାହ ଥିଲା ବୋଲି ଜଣାପଡ଼ିଛି ।