କେଶୁରା ବଧୂହତ୍ୟା ଘଟଣା, ଶ୍ବଶୁର ଓ ଦିଅର ଗିରଫ
ଭୁବନେଶ୍ବର: କେଶୁରା ଆଶୁତୋଷନଗର କଲୋନି ଅଞ୍ଚଳର ମହିଳା ପ୍ରୀତିମତି ମହାରଣାଙ୍କ ସନ୍ଦେହଜନକ ମୃତ୍ୟୁ ଘଟଣାରେ ସହିଦନଗର ଥାନା ପୁଲିସ ଆଜି ଆଉ ୨ଜଣଙ୍କୁ ଗିରଫ କରିଛି। ସେମାନେ ହେଲେ, ଶ୍ବଶୁର ଆର୍ତ୍ତତ୍ରାଣ ମହାରଣା(୬୭) ଓ ଦିଅର ପବିତ୍ର ମହାରଣା(୨୫)। ଏହି ଘଟଣାରେ ପୁଲିସ ଗତ ୬ ତାରିଖ ଦିନ ସ୍ୱାମୀ ପ୍ରଭାତ ଓ ଶାଶୂ ଭାନୁଙ୍କୁ ଗିରଫ କରି କୋର୍ଟଚାଲାଣ କରିଥିଲା। ପୁଲିସ ସୂଚନା ମୁତାବକ, ୪ ବର୍ଷ ତଳେ କେନ୍ଦ୍ରାପଡ଼ା ଅଞ୍ଚଳର ପ୍ରୀତିମତି ପ୍ରଭାତଙ୍କୁ ବିବାହ କରିଥିଲେ। ଯୌତୁକ ପାଇଁ ପ୍ରଭାତ ଏବଂ ତାଙ୍କ ପରିବାରଲୋକ ପ୍ରୀତିମତିଙ୍କୁ ବିଭିନ୍ନ ସମୟରେ ନିର୍ଯାତନା ଦେଇଆସୁଥିଲେ। ଗତ ୫ ତାରିଖ ଅପରାହ୍ଣ ପ୍ରାୟ ସାଢ଼େ ୨ଟାରେ ପ୍ରୀତିମତିଙ୍କ ଶବ ଘରେ ଝୁଲୁଥିବା ଦେଖି ପ୍ରଭାତଙ୍କ ପରିବାରଲୋକ ସହିଦନଗର ଥାନାକୁ ଜଣାଇଥିଲେ। ତେବେ ଝିଅକୁ ହତ୍ୟା କରି ଆତ୍ମହତ୍ୟାର ରୂପ ଦେବାକୁ ଚେଷ୍ଟା କରାଯାଇଛି ବୋଳି ବାପା ବଙ୍ଗାଳି ଓଝା ଅଭିଯୋଗ କରିଥିଲେ।