ମହିଳା ଦିବସରେ ଛାତ୍ରୀଙ୍କୁ ଅସଦାଚରଣ : ହାତ କଟା ପୋଷାକ ପିନ୍ଧି ଥିବାରୁ ର୍ଦୁବ୍ୟବହାରର କଲେ କଲେଜର ଛାତ୍ର
କୋଲକାତା : ଗତକାଲି ସାରା ବିଶ୍ୱରେ ଅନ୍ତର୍ଜାତୀୟ ମହିଳା ଦିବସ ପାଳନ କରିଥିବା ବେଳେ ମହିଳାମାନଙ୍କୁ ସମ୍ମାନ ଏବଂ ସମ୍ବର୍ଦ୍ଧନା ଦିଆ ଯାଇଥିଲା । କିନ୍ତୁ ଏହି ଦିନ ପଶ୍ଚିମବଙ୍ଗର ରାଜଧାନୀ କୋଲକାତାରେ ଯେଉଁ ଘଟଣା ଘଟିଥିଲା, ତାହାକୁ ନେଇ ଏବେ ଚର୍ଚ୍ଚା ଜୋର ଧରିଛି । ଅନ୍ତର୍ଜାତୀୟ ମହିଳା ଦିବସ ଦିନ ଜଣେ କଲେଜ ଛାତ୍ରୀ ହାତ କଟା ପୋଷାକ ପିନ୍ଧି କଲେଜ ଯାଇଥିବା ଦେଖି ଛାତ୍ର ଗୋଷ୍ଠିର କିଛି ଛାତ୍ର ପୀଡ଼ିତାଙ୍କ ସହ ର୍ଦୁବ୍ୟବହାର କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ଯେଉଁ ଦିନ ମହିଳାମାନଙ୍କୁ ସମ୍ମାନ ଦିଆ ଯାଇଥାଏ, ସେହି ଦିନ ଜଣେ ଛାତ୍ରୀଙ୍କୁ ମାଡ଼ ମାରି ଅପମାନ ଦିଆଯିବା ଘଟଣାକୁ ନେଇ ଏବେ ତୀବ୍ର ପ୍ରତିକ୍ରିୟା ଦେଖା ଯାଇଛି । କିଛି ଛାତ୍ର ପୀଡ଼ିତାଙ୍କ ସହ ର୍ଦୁବ୍ୟବହାର କରି ତାଙ୍କୁ ମାଡ଼ ମାରିବା ସହ କଲେଜକୁ ଏଭଳି ପୋଷାକ ପିନ୍ଧି ଆସିବ ନାହିଁ । ଏଠାରେ ଏ ସବୁ ଚଳିବ ନାହିଁ ବୋଲି କହି ଆଗକୁ ଏପରି ନ କରିବାକୁ ଧମକ ଦେଇଥିଲେ । ଏ ନେଇ ପୀଡ଼ିତା ଅଭିଯୋଗ କରିଥିବା ବେଳେ ତୃଣମୁଳ ଛାତ୍ର ପରିଷଦର ଅଭିଯୁକ୍ତ ଛାତ୍ରମାନେ ପୀଡ଼ିତାଙ୍କ ଅଭିଯୋଗକୁ ଖଣ୍ଡନ କରିଛନ୍ତି ।
ବାଣିଜ୍ୟର ପ୍ରଥମ ବର୍ଷ ଛାତ୍ରୀଙ୍କ ଅଭିଯୋଗ ଅନୁଯାୟୀ, ମୁଁ ଶ୍ରେଣୀଗୃହରେ ଏକା ବସିଥିବା ବେଳେ କିଛି ଛାତ୍ର ଭିତରକୁ ଆସିଥିଲେ । ଏହା ପରେ ସେମାନେ ମୋ ପୋଷାକକୁ ନେଇ ପ୍ରଶ୍ନ ଉଠାଇଥିଲେ । ସେମାନେ ମୋ ପୋଷାକକୁ କଲେଜର ନିୟମ ବିରୁଦ୍ଧ ବୋଲି କହି ଗାଳି ଦେବା ଆରମ୍ଭ କରିଥିଲେ । ସେମାନଙ୍କ ପଛରେ ରାଜନେତାଙ୍କ ହାତ ରହିଥିବାରୁ କଲେଜର ପ୍ରିନ୍ସିପାଲଙ୍କୁ ଜଣାଇ ମଧ୍ୟ କିଛି ଲାଭ ନାହିଁ ବୋଲି କହିଛନ୍ତି ପୀଡ଼ିତା । ଏ ନେଇ ପୁଲିସରେ ଅଭିଯୋଗ କରାଯାଇଥିବା ବେଳେ ତଦନ୍ତ ଆରମ୍ଭ କରିଛି ପୁଲିସ ।