ଯଦି ତୁମେ ମୋ ଝିଅକୁ ସତରେ ଭଲ ପାଉଛ ତେବେ ନିଜକୁ ଗୁଳି କରି ଦେଖାଅ! ପ୍ରେମିକାର ବାପାଙ୍କଠାରୁ ଏହା ଶୁଣି ନିଜକୁ ଗୁଳି କଲେ ବିଜେପି ନେତା
ଭୋପାଲ : ଭାରତୀୟ ଜନତା ପାର୍ଟିି ଯୁବ ମୋର୍ଚ୍ଚାର ଜଣେ ନେତା ପ୍ରେମ ପାଇଁ ନିଜକୁ ଗୁଳି କରିଥିବା ଖବର ଏବେ ଚର୍ଚ୍ଚାର ବିଷୟ ପାଲଟିଛି । ମଧ୍ୟପ୍ରଦେଶର ଭୋପାଲରେ ଏହି ଘଟଣା ଘଟିଥିବା ବେଳେ ପ୍ରେମିକା ଘରକୁ ଯାଇଥିବା ସମୟରେ ଏହି ଘଟଣା ଘଟିଥିବାର ସୂଚନା ମିଳିଛି । ଯଦି ତୁମେ ମୋ ଝିଅକୁ ସତରେ ଭଲ ପାଉଛ ତେବେ ନିଜକୁ ଗୁଳି କରି ଦେଖାଅ ବୋଲି ପ୍ରେମିକାର ବାପା କହିଥିଲେ । ଏହା ଶୁଣି ନିଜକୁ ପ୍ରମାଣ କରିବାକୁ ଯାଇ ବିଜେପି ନେତା ନିଜ ମୁଣ୍ଡକୁ ଗୁଳି କରିଥିଲେ । ଏହି ଘଟଣା ପରେ ତାଙ୍କୁ ତୁରନ୍ତ ଡ଼ାକ୍ତରଖାନା ନିଆ ଯାଇଥିବା ବେଳେ ତାଙ୍କର ବ୍ରେନ୍ ଡ଼େଡ଼୍ ହୋଇ ଯାଇଥିବା ଡ଼ାକ୍ତର କହିଛନ୍ତି । ଏବେ ତାଙ୍କୁ ଭେଣ୍ଟିଲିଟରରେ ରଖା ଯାଇଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ପୁଲିସ ଦେଇଥିବା ସୂଚନା ଅନୁଯାୟୀ, ଭାରତୀୟ ଜନତା ପାର୍ଟିି ଯୁବ ମୋର୍ଚ୍ଚାର ଉପାଧ୍ୟକ୍ଷ ଅତୁଲ ଲୋଖଣ୍ଡେ ମଙ୍ଗଳବାର ସକାଳେ ଏକ ଫେସ୍ବୁକ୍ ପୋଷ୍ଟ କରିଥିଲେ । ଏଥିରେ ତାଙ୍କୁ ପ୍ରେମିକାଙ୍କ ବାପା ପ୍ରେମକୁ ସାବ୍ୟସ୍ତ କରିବା ପାଇଁ ଜୀବନ ହାରିବାର ସର୍ତ୍ତ ରଖିଥିବା କଥା ଜଣାଇଥିଲେ । ଏହା ସହ ଯଦି ସେ ଆତ୍ମହତ୍ୟା ଉଦ୍ୟମ କରି ବଞ୍ଚି ଯାଉଛନ୍ତି ତେବେ ଦୁଇ ଜଣଙ୍କର ବିବାହ କରାଯିବ । ଯଦି ସେ ମରିଯିବେ ତେବେ ଆର ଜନ୍ମରେ ଦୁହେଁ ସାଥିରେ ରହିବ ବୋଲି ପ୍ରେମିକାଙ୍କ ବାପା କହିଥିବା ସେ ଉଲ୍ଲେଖ କରିଥିଲେ । ମୋ ସହ କିଛି ହେଲେ ମୋ ପ୍ରେମିକାକୁ ମିଛି କହିବ ନାହିଁ । ତା’ର କିଛି ଭୁଲ ନାହିଁ । ମୁଁ ତାକୁ ବହୁତ ଭଲପାଏ ବୋଲି ଲେଖି ୪୦ଟି ଫଟୋ ଅପ୍ଲୋଡ଼ କରିଥିଲେ ଅତୁଲ । ଏହି ପୋଷ୍ଟ କରିବା ପରେ ମଙ୍ଗଳବାର ସମୟ ପ୍ରାୟ ୯.୩୦ରେ ନିଜ ପ୍ରେମିକାଙ୍କ ଘର ବାହାରେ କାର୍ ରଖି ନିଜକୁ ଗୁଳି ମାରିଥିଲେ ।
ଏ ନେଇ ଖବର ପ୍ରକାଶ ପାଇବା ପରେ ଅତୁଲଙ୍କ ଦାଦା ଏବଂ ତାଙ୍କ ସାଙ୍ଗ ଆହତ ଅବସ୍ଥାରେ ତାଙ୍କୁ ଡ଼ାକ୍ତରଖାନା ନେଇଥିଲେ । ଚିକିତ୍ସା ପରେ ତାଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାପଡ଼ିଛି । ଅତୁଲଙ୍କ ସାଙ୍ଗ ଦେଇଥିବା ସୂଚନା ଅନୁଯାୟୀ,ଅତୁଲ ଏବଂ ତାଙ୍କ ପ୍ରେମିକାଙ୍କ ସଂପର୍କ ୧୩ ବର୍ଷର । ତାଙ୍କ ପ୍ରେମିକା ଏକ ବ୍ୟାଙ୍କରେ ଚାକିରି କରୁଥିବା ବେଳେ ଅତୁଲ ତାଙ୍କ ଘରକୁ ବିବାହ ପ୍ରସ୍ତାବ ପଠାଇଥିଲେ । କିନ୍ତୁ ପ୍ରେମିକାଙ୍କ ବାପା ବାହାଘର କରିବା ପାଇଁ ମନା କରି ଦେଇଥିଲେ । ଏହା ଜାଣି ଅତୁଲ ତାଙ୍କ ପ୍ରେମିକାଙ୍କ ଉପରେ ବିବାହ କରିବା ପାଇଁ ଚାପ ପକାଇବାରୁ ପ୍ରେମିକା ମଧ୍ୟ ବିବାହ ପାଇଁ ମନା କରି ଦେଇଥିଲେ ।