ଛାଡ଼ପତ୍ର ପରେ ସ୍ତ୍ରୀ ଅନ୍ୟ ପୁରୁଷ ସହ କଥା ହେଉଥିବାରୁ ନିର୍ମମ ଭାବେ ହତ୍ୟା କଲା ସ୍ୱାମୀ
ମହୁ : କିଛି ଦିନ ତଳେ ମଧ୍ୟପ୍ରଦେଶର ମହୁ ସହରରେ ଜଣେ ମହିଳାଙ୍କ ଖଣ୍ଡ ବିଖଣ୍ଡିତ ଶରୀର ମିଳିଥିଲା । ମହିଳାଙ୍କ ମୃତ୍ୟୁ ପଛରେ ପ୍ରକୃତରେ କାହାର ହାତ ରହିଛି, ସେ ନେଇ ପୁଲିସ ତଦନ୍ତ ଆରମ୍ଭ କରିଥିବା ବେଳେ ସୋମବାର ଜଣେ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି ପୁଲିସ । ମହିଳାଙ୍କ ଶରୀରର କିଛି ଅଙ୍ଗ ରବିବାର ମୋହନ ଟକିଜ୍ରୁ ପୁଲିସ ଉଦ୍ଧାର କରିଥିବା ବେଳେ ତାଙ୍କ ନାଁ ରୁଖ୍ସାନା ବୋଲି ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସିସିଟିଭି ଭିଡିଓକୁ ଆଧାର କରି ପୁଲିସ ଅଭିଯୁକ୍ତ ଅନୁପ ମାହେଶ୍ୱରୀକୁ ଗିରଫ କରିଥିବା ବେଳେ ମୁଖ୍ୟ ଅଭିଯୁକ୍ତ ରୁଖ୍ସାନାଙ୍କ ପୂର୍ବ ସ୍ୱାମୀ ସଦିକି ବୋଲି ଜଣାପଡ଼ିଛି । ଦୁହେଁ ୮ବର୍ଷ ତଳେ ବିବାହ କରିଥିବା ବେଳେ ୨୦୧୪ରେ ତାଙ୍କର ଛାଡ଼ପତ୍ର ହୋଇଥିଲା, ଯାହା ପରେ ରୁଖ୍ସାନା ନିଜ ମାତା-ପିତାଙ୍କ ସହ ରହିବା ଆରମ୍ଭ କରିଥିଲେ ।
ପୁଲିସର ସୂଚନାନୁସାରେ, ସିସିଟିଭିରେ ଆମେ ଅନୁପଙ୍କୁ ଏକ ଅଖାକୁ ନିଜ ବାଇକ୍ରେ ବାନ୍ଧି ମଧ୍ୟ ରାତିରେ ନେଉଥିବାର ଦେଖିଥିଲୁ । କିନ୍ତୁ ଫେରିବା ସମୟରେ ତାଙ୍କ ଗାଡ଼ିରେ ଅଖାଟି ନଥିଲା, ଯାହା ଆମ ସନ୍ଦେହକୁ ବଢ଼ାଇଥିଲା । ଅନୁପଙ୍କୁ ଅଟକ ରଖି ପଚରାଉଚରା କରାଯିବା ପରେ ସବୁ ସତ ସାମ୍ନାକୁ ଆସିଥିଲା । ଅନୁପ ସଦିକିଙ୍କର ପଡ଼ୋଶୀ ଥିଲେ । ରୁଖ୍ସାନାଙ୍କର ଅନ୍ୟ ପୁରୁଷ ସହ କଥା ହେବାକୁ ସଦିକି ପସନ୍ଦ କରୁ ନଥିବାରୁ ତାଙ୍କୁ ନିଜ ଘରକୁ ଡ଼ାକି ହତ୍ୟା କରିଥିଲେ । ହତ୍ୟା ପରେ ଅନୁପ ତାଙ୍କୁ ମୃତଦେହକୁ ଫିଙ୍ଗିବାରେ ସାହାଯ୍ୟ କରିଥିଲେ । ପୁଲିସ ଅନୁପଙ୍କୁ ଗିରଫ କରିଥିବା ବେଳେ ସଦିକି ଏବେ ଫେରାର ଥିବା ଜଣାପଡ଼ିଛି ।