ମାଲଦା: ପଶ୍ଚିମବଙ୍ଗର ମାଲଦା ଜିଲ୍ଲାରେ ଜଣେ ବ୍ୟକ୍ତି ଜଣେ ମହିଳାଙ୍କ ସହ ଦୁଷ୍କର୍ମ କରି ନିଅାଁ ଲଗାଇ ଦେବାରୁ ସେ ଜଳନ୍ତା ମହିଳା ତାଙ୍କୁ ଜାବୁଡ଼ି ଧରିଥିଲେ। ଫଳରେ ସେ ୩୫ ବର୍ଷିୟ ବ୍ୟକ୍ତି ସାଙ୍ଘାତିକ ଆହତ ହୋଇ ଡାକ୍ତରଖାନାରେ ମୃତ୍ୟୁ ବରଣ କରିଥିବା କଥା ମଙ୍ଗଳବାର ଦିନ ପୁଲିସ କହିଛି।
Sambad is now on WhatsApp
Join and get latest news updates delivered to you via WhatsApp
ମୁହଁ ଓ ହାତରେ ପୋଡ଼ା ଘା’ ଥାଇ ସେ ବିଧବା ମହିଳାଜଣକ ଏବେ ମାଲଦା ମେଡିକାଲ୍ କଲେଜ ଏବଂ ହସ୍ପିଟାଲ୍ରେ ଚିକିତ୍ସାଧୀନା ଅଛନ୍ତି।
ସେ ଅଭିଯୋଗ କରିଛନ୍ତି କି, ଅଭିଯୁକ୍ତ ତାଙ୍କୁ ବରାବର ହଇରାଣ ହରକତ କରେ। ସୋମବାର ସନ୍ଧ୍ୟାରେ କେହି ନ ଥିବା ବେଳେ ସେ ତାଙ୍କ ଘରେ ପଶିଥିଲେ। ତାଙ୍କ ସହ ଦୁଷ୍କର୍ମ କରିବା ପରେ ନିଆଁ ଲଗାଇ ଦେଇଥିଲେ କିନ୍ତୁ, ଜଳନ୍ତା ଅବସ୍ଥାରେ ମହିଳାଜଣକ ସେ ବ୍ୟକ୍ତିଙ୍କୁ ଜାବୁଡ଼ି ଧରି ପକାଇଥିଲେ।
ଧୂଆଁ ବାହାରୁଥିବା ଦେଖି ସ୍ଥାନୀୟ ଲୋକେ ଘର ଭିତରକୁ ଧାଇଁ ଯାଇ ଦେଖିଲେ ଘରଭିତରେ ଦୁହେଁ ନିଆଁରେ ପୋଡ଼ି ହେଉଛନ୍ତି।
ଉଭୟଙ୍କୁ ସେମାନେ ସ୍ଥାନୀୟ ଡାକ୍ତରଖାନାକୁ ନେଇଥିଲେ। ସେଠାରୁ ସେମାନଙ୍କୁ ମାଲଦା ମେଡିକାଲ୍ କଲେଜ୍ ଓ ହସ୍ପିଟାଲ୍କୁ ସ୍ଥାନାନ୍ତର କରାଯାଇଥିଲା। ମଙ୍ଗଳବାର ସକାଳେ ସେ ବ୍ୟକ୍ତିଜଣଙ୍କର ମୃତ୍ୟୁ ଘଟିଥିବା ପୁଲିସ କହିଛି।
ମାଣିକଛକ ଥାନା ଅନ୍ତର୍ଗତ ସୁଭାଷ କଲୋନିରେ ମହିଳାଜଣକ ରହନ୍ତି। ତାଙ୍କର ତିନିଟି ଝିଅ ଅଛନ୍ତି ଏବଂ ବଡ଼ ଝିଅଟି ବାହାହୋଇ ଅନ୍ୟତ୍ର ରହୁଛି।
୩୫ କିଲୋମିଟର ଦୂର ଚଞ୍ଚଳର ସେ ଅଭିଯୁକ୍ତ ବ୍ୟକ୍ତିଜଣକ କାହିଁକି ସୁଭାଷ କଲୋନିକୁ ଆସୁଥିଲେ ପୁଲିସ ତା’ର ତଦନ୍ତ ଆରମ୍ଭ କରିଛି। ସ୍ଥାନୀୟ ଲୋକେ କହୁଛନ୍ତି ସେ ବରାବର ସେଠାକୁ ଆସେ।