ନମ୍ବର ପ୍ଲେଟରେ ନିଜର ନାମ ଲେଖି ହଟହଟା ହେଲେ ଚାଳକ

ନୂଆଦିଲ୍ଲୀ: ଆଜିକାର ଯୁବପିଢ଼ିମାନେ ନିଜର ବୁଲେଟକୁ ପରିବର୍ତ୍ତନ କରି ନୂଆ ରୁପ ଦେଇ ଚଲାଉଥିବାର ଦେଖିବାକୁ ମିଳୁଛି।

ଅନେକ ଥର ରାସ୍ତାରେ ବୁଲେଟଗାଡ଼ିର ସାଇଲେନ୍ସରରୁ ବାଣ ଫୁଟୁଥିବା ଭଳି ଶବ୍ଦ ଶୁଣିବାକୁ ମିଳିଛି। ରାସ୍ତାରେ ହଠାତ ବାଣଫୁଟିବା ଭଳି ଶବ୍ଦ ହେବା ହେତୁ ଉକ୍ତ ରାସ୍ତା ଦେଇ ଯାଉଥିବା ଅନ୍ୟ ଯାତ୍ରୀମାନେ କିଛି ସମୟ ପାଇଁ ଭୟଭୀତ ହୋଇ ଯାଇଥାଆନ୍ତି।  

ରାସ୍ତାରେ ଗାଡ଼ିରୁ ବାହାରୁ ଥିବା ଏଭଳି ଶବ୍ଦ ପାଇଁ ପୁଲିସ ପକ୍ଷରୁ ଅନେକଥର ଚାଳକଙ୍କ ବିରୋଧରେ କାର୍ଯ୍ୟାନୁଷ୍ଠାନ ବି ନିଆଯାଇଛି। ସମ୍ପ୍ରତି ପୁଲିସ ଇଟାୱାରେ ଜଣେ ବୁଲେଟ ଆରୋହୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି। 

ପୁଲିସ ହାତରେ ଧରାପଡ଼ିଥିବା ଯୁବକଙ୍କ ବୁଲେଟର ପଛ ନମ୍ବର ପ୍ଲେଟରେ କୌଣସି ନମ୍ବର ଲେଖା ନଥିଲା, ବରଂ ଏଥିରେ ଚାଳକଙ୍କ ନିଜ ନାମ ଲେଖାଥିଲା। ଏହି କାରଣରୁ ଧରାପଡ଼ିଥିବା ବୁଲେଟ ଚାଳକଙ୍କ ନାମରେ ପୁଲିସ ୩୨ହଜାର ଟଙ୍କା ଜରିମାନା ଲାଗୁ କରି ଗାଡ଼ିକୁ ଜବତ କରି ନେଇଛି। ଏହାର ଏକ ଭିଡିଓ ସୋସିଆଲ ମିଡିଆରେ ଘୁରି ବୁଲୁଛି।

ପୁଲିସ ଅଧିକାରୀ ବୁଲେଟ ଚାଳକଙ୍କୁ ଅଟକାଇ ପଚାରିଥିଲେ, ଏହି ନମ୍ବର ପ୍ଲେଟର ଉଦ୍ଦେଶ୍ୟ କ'ଣ ତୁମେ ଜାଣିଛ। ତୁମେ ଗାଡ଼ି ନମ୍ବର ସ୍ଥାନରେ ନିଜର ନାମ ହର୍ଷ ଲେଖି ଦେଇଛି । ଏମିତି ସଡ଼କ ନିୟମ ଭଙ୍ଗ କରିବା କ’ଣ ଉଚିତ।’

ପୁଲିସ ଅଧିକାରୀଙ୍କ ପ୍ରଶ୍ନର ଉତ୍ତର ଦେଇ ହର୍ଷ କହିଥିଲେ,‘ ଗାଡ଼ି ବାହାରକୁ ବେଶୀ ବାହାର କରେ ନାହିଁ। ନମ୍ବର ପ୍ଲେଟରେ ମୋ ନାମ ଏକ ସଉକରେ ଲେଖି ଦେଇଛି। ମୋର ଭୁଲ ହୋଇଯାଇଛି। ଖବୁଶୀଘ୍ର ନମ୍ବରପ୍ଲେଟ କରିଦେବି।’