ସ୍ତ୍ରୀ’କୁ ୭୦ ହଜାର ଟଙ୍କାରେ କିଣିଥିଲେ; ଆଚରଣ ଅସହ୍ୟ ହେବାରୁ ମାରି ବଣରେ ଫିଙ୍ଗିଦେଲେ ସ୍ବାମୀ

ନୂଆଦିଲ୍ଲୀ: ୭୦ ହଜାର ଟଙ୍କା ଦେଇ କିଣି ବାହା ହୋଇଥିବା ସ୍ତ୍ରୀ’ର ଆଚରଣରେ ଅସନ୍ତୁଷ୍ଟ ହୋଇ ସ୍ବାମୀ ତା’ର ତଣ୍ଟି ଚିପି ହତ୍ୟା କରି ଦକ୍ଷିଣପଶ୍ଚିମ ଦିଲ୍ଲୀର ଫତେପୁର ବେରି ଅନ୍ତର୍ଗତ ଅରଣ୍ୟାଞ୍ଚଳରେ ଶବ ଫିଙ୍ଗି ଦେଇଥିବା କଥା ବୁଧବାର ଦିନ ପୁଲିସ କହିଛି।

ପୁଲିସ କହିଛି, ଅଭିଯୁକ୍ତ ସ୍ବାମୀ ଧରମବୀର ଓ ତାଙ୍କୁ ଏହି ହତ୍ୟାକାଣ୍ଡରେ ସହାୟତା କରିଥିବା ଅରୁଣ ଓ ସତ୍ୟବାନଙ୍କୁ ଗିରଫ କରାଯାଇଛି।

ଫତେପୁର ବେରି ଝୀଲ୍‌ କୁର୍ଦ ସୀମାନ୍ତ ନିକଟ ବଣରେ ଜଣେ ମହିଳାଙ୍କ ଶବ ପଡ଼ିଥିବା ବିଷୟରେ ଶନିବାର ଦିନ ‘ପିସିଆର୍‌’ କଲ୍‌ ମିଳିଥିଲା। ପୁଲିସ ଘଟଣାସ୍ଥଳକୁ ଯାଇ ଶବ ଉଦ୍ଧାର କରିଥିଲା ବୋଲି ଡେପୁଟି ପୁଲିସ କମିସନର୍‌ ଚନ୍ଦନ ଚୌଧୁରୀ କହିଛନ୍ତି।

ପୁଲିସ ‘ଟେକ୍‌ନିକାଲ୍‌’ ଓ ‘ମାନୁଆଲ୍‌ ସର୍ଭିଲେନ୍‌ସ୍‌’ ଜରିଆରେ ଏହି ମାମଲାର ତଦନ୍ତ ଆରମ୍ଭ କଲା। ଶନିବାର ରାତି ୧.୪୦ରେ ଗୋଟାଏ ଅଟୋରିକ୍ସାର ଚଳାଚଳ ସନ୍ଦେହଜନକ ମନେହୋଇଥିଲା ବୋଲି ସେ କହିଛନ୍ତି।

ସେ ଅଟୋରିକ୍ସାକୁ ଟ୍ରାକ୍‌ କରାଯାଇ ତା’ର ରେଜିଷ୍ଟ୍ରେସନ୍‌ ନମ୍ବର ଚିହ୍ନଟ କରାଗଲା। ଛତ୍ରପୁରନିବାସୀ ସେ ଅଟୋର ଡ୍ରାଇଭର୍‌ ଅରୁଣଙ୍କୁ ଗଦାଇପୁର ବ୍ୟାଣ୍ଡ୍‌ ରୋଡ୍‌ରେ ଧରାଯାଇ ଅଟୋକୁ ଜବତ କରାଗଲା ବୋଲି ମଧ୍ୟ ସେ କହିଛନ୍ତି।

Image Courtesy of Deccan Herald

ସେ ଆହୁରି ମଧ୍ୟ କହିଛନ୍ତି, ଅଟୋ ଡ୍ରାଇଭର୍‌ ଅରୁଣ ସେ ଅଞ୍ଚଳ ବିଷୟରେ ଅବଗତ ଥିଲେ। ତେଣୁ, ବଣରେ ଶବ ଫିଙ୍ଗିବା ପାଇଁ ଅଭିଯୁକ୍ତ ତାଙ୍କ ସହଯୋଗ ଲୋଡ଼ିଥିଲେ।

ଅରୁଣ କହିଛନ୍ତି, କିଛି ନ ଜଣାଇ ସ୍ତ୍ରୀ (ସୁଇଟି) ମାସ ମାସ ଧରି ଘରୁ ପଳାଇ ଯାଉଥିବାରୁ ଧରମବୀର ତା’ ଉପରେ ଅସନ୍ତୁଷ୍ଟ ଥିଲେ। ଧରମବୀର ତାଙ୍କୁ ୭୦ ହଜାର ଟଙ୍କା ଦେଇ କିଣି ବାହା ହୋଇଥିବାରୁ ତା’ର ବାପାମାଆ ଓ ପରିବାର ବିଷୟରେ କେହି କିଛି ଜାଣନ୍ତି ନାହିଁ। ଏତେ ଦିନ ଧରି ସେ କୁଆଡ଼େ ଯାଉଥିଲା ତାହା ମଧ୍ୟ ଜଣାପଡୁ ନ ଥିଲା।

ମୁଖ୍ୟ ଅଭିଯୁକ୍ତ ଧରମବୀର ମଧ୍ୟ କହିଛନ୍ତି ଯେ, ସୁଇଟି କେବେ ତା’ ବାପାମାଆ କିଂବା ପରିବାର ଲୋକଙ୍କ କଥା କହିନାହିଁ। କେବଳ ତାଙ୍କ ଘର ବିହାର ରାଜ୍ୟର ପାଟନାରେ ବୋଲି କହିଥିଲା।

ପୁଲିସ ଅଭିଯୁକ୍ତମାନଙ୍କ ନାଁରେ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।