ଭଲ ବ୍ୟବହାର ପାଇଁ ଜେଲ୍ରୁ ବାହାରିଥିବା ବେଳେ ପୁଣି ଦୁଇଟି ହତ୍ୟା କରି ସେହି ଜେଲ୍କୁ ଗଲେ ଯୁବକ, ଜାଣନ୍ତୁ କାରଣ
ଔରାଙ୍ଗାବାଦ୍: ଟିକେ ଭାବନ୍ତୁ ତ, ଜଣେ ଅଭିଯୁକ୍ତ ଅପରାଧ କରି ଜେଲ୍ରେ ରହିବା ପରେ ତା’ର ଭଲ ବ୍ୟବହାର ପାଇଁ ତାକୁ ଜେଲ୍ ଦଣ୍ଡରୁ ମୁକ୍ତ କରାଯାଉଛି; କିନ୍ତୁ କିଛି ଦିନ ପରେ ଅଭିଯୁକ୍ତ ଜଣକ ପୁଣି ଦୁଇଟି ହତ୍ୟା କରି ଜେଲକୁ ଫେରୁଛି । କଥାଟି ଗପ ପରି ଲାଗୁଥିଲେ ମଧ୍ୟ ସତ । ଏଭଳି ଏକ ଘଟଣା ଘଟିଛି ବିହାରର ଔରାଙ୍ଗାବାଦ୍ରେ । ଜଣେ ୨୭ବର୍ଷୀୟ ଯୁବକଙ୍କ ନାମରେ ଅନେକ ଅଭିଯୋଗ ଆସିବା ପରେ ତାଙ୍କୁ ଜେଲ ଦଣ୍ଡ ମିଳିଥିଲା । କିନ୍ତୁ ତାଙ୍କ ବ୍ୟବହାରରେ ପରିବର୍ତ୍ତନ ଦେଖି ତାଙ୍କୁ ଜେଲଦଣ୍ଡରୁ ମୁକ୍ତ କରାଯାଇଥିଲା । ଗାନ୍ଧୀ ଜୟନ୍ତୀରେ ଯୁବକଙ୍କୁ ଜେଳରୁ ମୁକ୍ତ କରାଯାଇଥିବା ବେଳେ ଜେଲରୁ ବାହାରିବାର କିଛି ସମୟ ପରେ ସେ ଦୁଇ ଜଣଙ୍କୁ ହତ୍ୟା କରିବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଜେଲ୍ ଭିତରେ ଥିବା ବେଳେ ତାଙ୍କ ସ୍ତ୍ରୀଙ୍କର ମହମ୍ମଦ ସଫିକ୍ ନାମକ ଜନୈକ ବ୍ୟକ୍ତିଙ୍କ ସହ ଅନୈତିକ ସଂପର୍କ ଥିବା ଜାଣିବା ପରେ ପବନ କୁମାର ସିଂହ ଜେଲ୍ରୁ ବାହାରକୁ ଆସିବାର ଯୋଜନା କରିଥିଲେ । ଭଲ ବ୍ୟବହାର ଦେଖାଇ ସେ ଜେଲ୍ରୁ ମୁକ୍ତ ହେବା ପରେ ନଭେମ୍ବର ୪ରେ ସଫିକ୍ଙ୍କୁ ଗୁଳି କରି ହତ୍ୟା କରିବା ସହ ତାଙ୍କ ଭାଇ ମହମ୍ମଦ ଗଡ଼୍ଡିଙ୍କୁ ପାଣିରେ ବୁଡ଼ାଇ ହତ୍ୟା କରିଥିଲେ । ପ୍ରଥମେ ପୁଲିସ କିଛି ଜାଣି ପାରି ନଥିବା ବେଳେ ସଫିକ୍ଙ୍କ ଫୋନ ଚେକ୍ କରି ପବନଙ୍କ ସ୍ତ୍ରୀଙ୍କ ନମ୍ବର ପାଇଥିଲା । ଯାହା ପରେ ସବୁ ଘଟଣା ସାମ୍ନାକୁ ଆସିଥିଲା । ନଭେମ୍ବର ୧୮ରେ ପବନଙ୍କୁ ଗିରଫ କରାଯାଇଥିବା ବେଳେ ଏବେ ପୁଣି ସେ ଜେଲ ଭିତରେ ଦଣ୍ଡ ଭୋଗୁଥିବା ଜଣା ପଡ଼ିଛି ।