ମା’-ଶିଶୁ ପୁତ୍ରର ମୃତଦେହ ଉଦ୍ଧାର, ହତ୍ୟା ସନ୍ଦେହରେ ତଦନ୍ତ ଜାରି
ବାଲୁଗାଁ: ଖୋର୍ଦ୍ଧା ଜିଲ୍ଲା ବାଲୁଗାଁ ନିକଟସ୍ଥ ଆଙ୍କୁଲାଚଟି ଗ୍ରାମ ହରିଜନ ସାହିରେ ମା’-ପୁଅଙ୍କ ମୃତଦେହ ଉଦ୍ଧାର ହୋଇଛି। ହରିଜନ ସାହିରେ ଏକ ଘରର ଉପର ମହାଲାରେ ଥିବା ଏକ କୋଠରୀରୁ ମା’ ଓ ୨ ବର୍ଷର ଶିଶୁପୁତ୍ର ମୃତ ଅବସ୍ଥାରେ ଚଟାଣରେ ପଡିଥିବା ଦେଖିବାକୁ ମିଳିଛି । ଏ ସମ୍ପର୍କରେ ମୃତ ମହିଳାଙ୍କ ପରିବାର ପକ୍ଷରୁ ବାଲୁଗାଁ ଥାନାରେ ହତ୍ୟା ଅଭିଯୋଗ ହୋଇଛି । ପୁଲିସ ଘଟଣାସ୍ଥଳରେ ପହଞ୍ଚି ମୃତ ମହିଳାଙ୍କ ଶାଶୁ ଓ ଶ୍ବଶୁରଙ୍କୁ ଅଟକ ରଖି ସାଇଣ୍ଟଫିକ ଟିମ ସହାୟତାରେ ବାଲୁଗାଁ ଏସ୍ଡିପିଓ ଓ ବାଲୁଗାଁ ଥାନାଆଇଆଇସି ମିଳିତ ଭାବେ ତଦନ୍ତକୁ ଜୋରଦାର କରିଛନ୍ତି । ଅଭିଯୋଗକୁ ଭିତ୍ତିକରି ପୁଲିସ ଏକ ହତ୍ୟା ମାମଲାରୁଜୁ କରି ୨ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।
Sambad is now on WhatsApp
Join and get latest news updates delivered to you via WhatsApp
ଘଟଣାରୁ ପ୍ରକାଶ ଆଙ୍କୁଲାଚଟି ଗ୍ରାମ ହରିଜନ ସାହିର ଭାଗିରଥି ନାୟକଙ୍କ ପୁଅ ବିଭୁ ନାୟକ ନିକଟସ୍ଥ ନୂଆଗଡ଼ ଗ୍ରାମର ଧ୍ରୁବ ନାୟକଙ୍କ ଝିଅ ସସ୍ମିତାଙ୍କୁୁ ୩ ବର୍ଷ ତଳେ ବିବାହ କରିଥିଲେ। ତାଙ୍କ ଔରସରୁ ଏକ ୨ବର୍ଷର ଶିଶୁପୁତ୍ର ଜନ୍ମ ନେଇଥିଲା। ଗତ କିଛି ମାସ ତଳେ ବିଭୁ ସୁଦୂର ଦୁବାଇ ରୋଜଗାର କରିବା ପାଇଁ ଯାଇଥିବା ବେଳେ ସସ୍ମିତା ନିଜ ପୁଅ ସହ ଶାଶୁ, ଶ୍ବଶୁର, ନଣନ୍ଦ ଓ ଦିଅରଙ୍କ ରହୁଥିଲେ। ସ୍ବାମୀ ବିଭୁ ଦୁବାଇ ଯିବା ପରେ ପୁତୁରା ସହିତ ଏକ ପ୍ରକାର ସମ୍ପର୍କ ଗଢି ଉଠିଥିଲା। ପରସ୍ପର ସର୍ଵଦା ମୋବାଇଲରେ କଥାବାର୍ତ୍ତା କରୁଥିଲେ ବୋଲି ଶ୍ବଶୁର କହୁଥିବା ବେଳେ ଏ କଥାକୁ ନେଇ ସ୍ୱାମୀ ଜାଣିବାପରେ ସସ୍ମିତାକୁ ଗାଳି କରିଥିଲେ।
ଗତ ମଙ୍ଗଳବାର ସନ୍ଧ୍ୟାରେ ସସ୍ମିତା ଓ ପୁଅ ବହୁ ସମୟ ପର୍ଯ୍ୟନ୍ତ ତଳକୁ ନ ଆସିବାରୁ ଶ୍ବଶୁର ଭାଗିରଥି ଉପର ମହଲାକୁ ଯାଇଥିଲେ। ସେଠାରେ ସେ ଦେଖିଲେ ଯେ, ସସ୍ମିତା ଓ ଶିଶୁପୁତ୍ରର ମୃତଦେହ ଫ୍ୟାନରେ ଦଉଡି ଲଗାଇ ଝୁଲୁଛି। ଭାଗିରଥି ଘଟଣା ସମ୍ପର୍କରେ ପୁଲିସକୁ ଖବର ଦେଇଥିଲେ। ପୁଲିସ ବୁଧବାର ସକାଳେ ଘଟଣାସ୍ଥଳରେ ପହଞ୍ଚି ସସ୍ମିତାର ବାପା ଘରକୁ ଖବର ଦେଇଥିଲେ । ସସ୍ମିତାର ମା’ ସଜନୀ ନାୟକ ମୋ ଝିଅ ଓ ନାତିକୁ ଶାଶୁ, ଶ୍ବଶୁର, ନଣନ୍ଦ ଓ ଦିଅର ମିଶି ମାରିଦେଇଥିବା ଲିଖିତ ଅଭିଯୋଗ କରିଛନ୍ତି। ପୁଲିସ ଅଭିଯୋଗକୁ ଭିତ୍ତିକରି ଏକ ହତ୍ୟା ମାମଲା ରୁଜୁକରି ମୃତଦେହ ଦୁଇଟିକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ଜଣାପଡିଛି । ସାଇଣ୍ଟଫିକ ଟିମ ଓ ବାଲୁଗାଁ ଏସ୍ଡିପିଓ ମାନସରଞ୍ଜନ ବାରିକ, ବାଲୁଗାଁ ଥାନା ଆଇଆଇସି ରମାକାନ୍ତ ମହାଳିକ ଘଟଣାର ତଦନ୍ତ ଆରମ୍ଭ କରି ଶାଶୁ ଓ ଶଶୁରଙ୍କୁ ଅଟକ ରଖିଥିବା ଜଣାପଡିଛି। ଘଟଣାଟି ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି ।