ନିଜକୁ ଜାହାଜ ମାଲିକ କହି ବ୍ୟବସାୟୀଙ୍କଠାରୁ ୧.୩ କୋଟି ଟଙ୍କା ଠକି ନେଲେ ମାଆ-ଝିଅ
ମୁମ୍ବାଇ: ମହାରାଷ୍ଟ୍ରରେ ଏକ ଚକିତ କରିବା ପରି ଠକେଇ ମାମଲା ସାମ୍ନାକୁ ଆସିଛି। ଅନ୍ଧେରୀର ଜଣେ ମହିଳା ଓ ତାଙ୍କ ଝିଅ ମିଶି ନିଜକୁ ଏକ ଜାହାଜର ମାଲିକ ପରିଚୟ ଦେଇ ଜଣେ ବ୍ୟବସାୟୀଙ୍କଠାରୁ ୧.୩ କୋଟି ଟଙ୍କା ଠକି ନେଇଥିବା ଅଭିଯୋଗ ହୋଇଛି। ଅଭିଯୁକ୍ତ ଦ୍ବୟଙ୍କୁ ବର୍ତ୍ତମାନ ମୁମ୍ବାଇ ପୁଲିସ ଗିରଫ କରିଛି। ଏହି ମାଆ-ଝିଅ ୨୦୨୦ ମସିହା କୋଭିଡ୍-୧୯ ସମୟରେ ଏକ ଚୁକ୍ତି କରି ବ୍ୟବସାୟୀ ସୁଶାନ୍ତଙ୍କୁ ଟଗ୍ବୋଟ୍ ଓ ବ୍ୟାରେଜ୍ ଭେସେଲ୍ ବିକ୍ରି କରିବା ନାମରେ ଟଙ୍କା ନେଇଥିଲେ। ମାତ୍ର ପରବର୍ତ୍ତୀ ମୁହୂର୍ତ୍ତରେ ଚୁକ୍ତି ମୁତାବକ କାମ ନ ହେବାରୁ ସୁଶାନ୍ତ ମାଆ-ଝିଅଙ୍କ ନାମରେ ପୁଲିସ୍ରେ ଅଭିଯୋଗ ଆଣିଲେ ଓ ସେ ଦୁହିଁଙ୍କ କଳା କାରନାମା ଉପରୁ ଧୀରେ ଧୀରେ ପରଦା ଉଠିବାରେ ଲାଗିଲା।
Sambad is now on WhatsApp
Join and get latest news updates delivered to you via WhatsApp
ରିପୋର୍ଟରୁ ଜାଣିବାକୁ ମିଳିଛି ଯେ ଅଭିଯୁକ୍ତ ଦ୍ବୟ ହେଲେ ୫୨ ବର୍ଷୀୟା ମହିଳା ରାଗିଣୀ ଖଣ୍ଡେଲୱାଲ୍ ଓ ତାଙ୍କ ୨୨ ବର୍ଷୀୟା ଝିଅ ମାନ୍ସୀ। ଏହି ମାଆ-ଝିଅଙ୍କ ବିରୋଧରେ ସୁଶାନ୍ତ ନିକଟରେ ଅନ୍ଧେରୀ ପୁଲିସ୍ ଷ୍ଟେସନ୍ରେ ଅଭିଯୋଗ ଆଣିଛନ୍ତି। ସେ ଅଭିଯୋଗ ଆଣି କହିଛନ୍ତି ଯେ କେବଳ ତାଙ୍କୁ ନୁହେଁ ଏହି ମାଆ-ଝିଅ ଜଣେ ରାଜନେତାଙ୍କ ସମେତ ଅନେକ ଲୋକଙ୍କୁ ଠକିଛନ୍ତି।
ମାଆ-ଝିଅ ଦୁହେଁ ଏକ ଜାହାଜ ଲୋକମାନଙ୍କୁ ଦେଖାଇ ତାହାକୁ ବିକ୍ରି କରିବା ନାଁରେ ଠକିଥିବା ଅଭିଯୋଗ ହୋଇଛି। ବ୍ୟବସାୟୀ ସୁଶାନ୍ତଙ୍କ ପତ୍ନୀ ପଦ୍ମା ପୁଲିସ୍ରେ ନିଜର ବୟାନ ଦେଇ କହିଛନ୍ତି କି ଏହି ମାଆ-ଝିଅ ସେହି ସମାନ ହଲ୍କୁ ଦେଖାଇ ଅନେକ ଲୋକଙ୍କୁୁ ଠକିଛନ୍ତି। ସେମାନେ ବିଭିନ୍ନ ଲୋକଙ୍କଠାରୁ ପ୍ରାୟ ୧୪ କୋଟି ଟଙ୍କା ଠକିଥିବା ପଦ୍ମା ଅଭିଯୋଗ ଆଣିଛନ୍ତି।