ଫେସ୍ବୁକ୍ ପ୍ରେମ ଆଗରେ ଫିକା ପଡ଼ିଲା ମା’ର ମମତା, ପ୍ରେମିକ ସହ ଯିବା ପାଇଁ ରୋକିବାରୁ ମା’କୁ ହତ୍ୟା କଲା ଝିଅ
ନୂଆଦିଲ୍ଲୀ : ପ୍ରେମରେ ଲୋକମାନେ ଅନ୍ଧ ହୋଇ ଯାଆନ୍ତି, ଏ ବିଷୟରେ ଆପଣମାନେ ଶୁଣିଥିଲେ । କିନ୍ତୁ ପ୍ରେମରେ ଅନ୍ଧ ହୋଇ ନିଜ ଜନ୍ମ କଲା ମା’କୁ ହତ୍ୟା କରିବା ନିହାତି ଭାବରେ ଆଶ୍ଚର୍ଯ୍ୟଜନକ । ଫେସ୍ବୁକ୍ ପ୍ରେମିକ ସହ ଯିବା ପାଇଁ ରୋକିବାରୁ ଜଣେ ନାବାଳିକା ନିଜ ମା’ଙ୍କୁ ହତ୍ୟା କରିବା ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଘଟଣାଟି ତାମିଲନାଡ଼ୁରେ ଘଟିଥିବା ଜଣା ପଡ଼ିଛି । ଅଭିଯୁକ୍ତ ଝିଅର ନାଁ ଦେବୀ ପ୍ରିୟା ହୋଇଥିବା ବେଳେ ପ୍ରେମିକର ନାଁ ବିବେକ ବୋଲି ଜଣାପଡ଼ିଛି । ବିବେକ ଦେବୀପ୍ରିୟଙ୍କାଙ୍କୁ ଫେସ୍ବୁକ୍ରେ ଦେଖା କରିବା ସହ ତାଙ୍କୁ ନିଜ ଘରକୁ ଆଣିବା ପାଇଁ ଚାହୁଁଥିଲେ । କିନ୍ତୁ ଦେବୀପ୍ରିୟାଙ୍କ ମା’ ଏହାକୁ ବିରୋଧ କରିବାରୁ ଦେବୀପ୍ରିୟା ରାଗରେ ନିଜ ମା’ଙ୍କୁ ଛୁରାମାଡ଼ କରି ହତ୍ୟା କରିଥିଲେ । ପୁଲିସ ଏବେ ଅଭିଯୁକ୍ତ ଝିଅ ସମେତ ଦୁଇ ଜଣ ଯୁବକଙ୍କୁ ଗିରଫ କରିଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବିବେକ ଏକ କପଡ଼ା କମ୍ପାନୀରେ କାମ କରୁଥିବା ବେଳେ ଦେବୀପ୍ରିୟାଙ୍କୁ ଆଣିବା ପାଇଁ ସେ ନିଜର ଦୁଇ ସାଙ୍ଗଙ୍କୁ ପଠାଇଥିଲେ । ଦୁଇ ସାଙ୍ଗ ଦେବୀପ୍ରିୟାଙ୍କ ଘରେ ପହଞ୍ଚିବା ପରେ ସେ ନିଜ ବ୍ୟାଗ୍ ପ୍ୟାକ୍ କରିବା ଆରମ୍ଭ କରିଥିଲେ । ଦେବୀପ୍ରିୟାଙ୍କୁ ଏଭଳି କରୁଥିବା ଦେଖି ମା’ ଭାନୁମତୀ ରୋକିଥିଲେ । କିଛି ସମୟ ଦୁହିଁଙ୍କ ମଧ୍ୟରେ ଝଗଡ଼ା ହେବା ପରେ ଦେବୀପ୍ରିୟା ଭାନୁମତୀଙ୍କୁ ଛୁରାମାଡ଼ କରି ଖସି ପଳାଇଥିଲେ । କିନ୍ତୁ ଗାଁ ଲୋକେ ଦେବୀପ୍ରିୟା ଏବଂ ତାଙ୍କୁ ନେବାକୁ ଆସିଥିବା ଦୁଇ ଯୁବକଙ୍କୁ କାବୁ କରି ପୁଲିସ ଜିମା ଦେଇଥିଲେ । ପୁଲିସ ଏବେ ଏହି ଘଟଣାକୁ ନେଇ ତଦନ୍ତ କରିବା ଆରମ୍ଭ କରିଛନ୍ତି ।