ବାରଙ୍ଗ: ଥାନାରେ ଅଭିଯୋଗ କରିବାର ୩ ଦିନ ପରେ ମଧ୍ୟ ଅଭିଯୁକ୍ତମାନଙ୍କୁ ଗିରଫ କରାନଯିବା ପ୍ରତିବାଦରେ ଆଜି ନନ୍ଦନକାନନ ଥାନା ଅନ୍ତର୍ଗତ ଝିଙ୍କରଡିହ ଗ୍ରାମବାସୀମାନେ ରାସ୍ତା ଅବରୋଧ କରିଥିଲେ। ବହୁ ସଂଖ୍ୟାରେ ପୁରୁଷ ଓ ମହିଳାମାନେ ନନ୍ଦନକାନନ ଥାନା ସମ୍ମୁଖ ମୁଖ୍ୟ ରାସ୍ତାକୁ ଅବରୋଧ କରିବାରୁ ଟ୍ରାଫିକ୍‌ ସମସ୍ୟା ସୃଷ୍ଟି ହୋଇଥିଲା। ତେବେ ପରିସ୍ଥିତି ଅଣାୟତ୍ତ ହେଉଥିବା ଦେଖି ପୁଲିସ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କ ସହ ଆଲୋଚନା କରି ପ୍ରତିଶ୍ରୁତି ଦେବା ପରେ ପରିସ୍ଥିତି ଶାନ୍ତ ପଡ଼ିଥିଲା। ପରେ ରାସ୍ତାରୋକ ହଟିଥିଲା। ସୂଚନା ଅନୁଯାୟୀ, ଜମି ବିବାଦକୁ କେନ୍ଦ୍ର କରି ଗତ ୪ ତାରିଖ‌ରେ ଗ୍ରାମର ପ୍ରକାଶ ପାଣିଙ୍କ ପରିବାରକୁ ବିପିନ ପାଣିଙ୍କ ପରିବାର ଖଣ୍ଡା ଓ ଭୁଜାଲିରେ ସଂଘବଦ୍ଧ ଆକ୍ରମଣ କରିଥିଲେ। ଏଥିରେ ପ୍ରକାଶ ଓ ତାଙ୍କ ଭାଇ ସୁରେଖ ଗୁରୁତର ଆହତ ହୋଇଥିଲେ। ସେମାନେ କଟକ ବଡ଼ ମେଡିକାଲରେ ଚିକିତ୍ସିତ ହେଉଛନ୍ତି। ତେବେ ଏ ସଂପର୍କରେ ପ୍ରକାଶଙ୍କ ପରିବାର ପକ୍ଷରୁ ୩ ଦିନ ତଳେ ଥାନାରେ ଅଭିଯୋଗ କରାଯାଇଥିଲା। କିନ୍ତୁ ପୁଲିସ ବର୍ତ୍ତମାନ ସୁଦ୍ଧା ଅଭିଯୁକ୍ତମାନଙ୍କୁ ଗିରଫ କରିନଥିବାରୁ ଆଜି ଏପରି ପରିସ୍ଥିତି ଦେଖାଦେଇଥିଲା।