ଉତ୍ତରପ୍ରଦେଶ: ଉତ୍ତରପ୍ରଦେଶର ଗାଜିଆବାଦରେ ଜଣେ ୧୯ବର୍ଷର ବାଳିକା ନିଶ୍ବାସ ନେଇ ନପାରିବାରୁ ତାଙ୍କର ମୃତ୍ୟୁ ହୋଇଯାଇଛି। ଗୁରୁତର ଅବସ୍ଥାରେ ବାଳିକାଙ୍କୁ ତାଙ୍କ ବାପା ମୋଟରସାଇକେଲରେ ନେଇ ସରକାରୀ ଟ୍ରାମା ସେଣ୍ଟରରେ ପହଞ୍ଚିଥିଲେ। ସେଠାରେ ଝିଅକୁ ନିଶ୍ବାସ ନେବାରେ ଅସୁବିଧା ହେଉଥିବା ଦେଖି ସରକାରୀ ଟ୍ରାମା ସେଣ୍ଟର ଭର୍ତ୍ତି କରିବାକୁ ମନା କରିଦେଇଥିଲା। କାରଣ ସେଠାରେ ଅକ୍ସିଜେନ ନଥିଲା। ଶେଷରେ ଛଟପଟ ହୋଇ ବାଳିକାର ପ୍ରାଣବାୟୁ ଉଡ଼ି ଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ମୃତ ବାଳିକାର ବାପା ଶିବନାରାୟଣ ଭୋଭୋ ହୋଇ କାନ୍ଦିକାନ୍ଦି କହିଥିଲେ, ଝିଅକୁ ଚିକିତ୍ସା କି ଅକ୍ସିଜେନ ମିଳିଲା ନାହିଁ। ଝିଅ ମୋର ଯନ୍ତ୍ରଣାରେ ଆଖି ସାମ୍ନାରେ ଛଟପଟ ହେଉଥିବା ବେଳେ ମୁଁ ତାକୁ କୌଣସି ପ୍ରକାର ସାହାଯ୍ୟ କରି ପାରୁ ନଥିଲି। ଶେଷରେ ମୋରି ସାମ୍ନାରେ ଝିଅ ସବୁଦିନ ପାଇଁ ଆଖି ବୁଜି ଦେଇଥିଲା। ଡାକ୍ତରଙ୍କୁ ଦେଖାଇବା ପରେ ସେ ଝିଅକୁ ମୃତ ଘୋଷଣା କରିଥିଲେ। କେବଳ ଏତିକି ନୁହେଁ, ମୃତ ଝିଅକୁ ଘରକୁ ନେବା ପାଇଁ ଆମ୍ବୁଲାନ୍ସ ବି ମିଳି ନଥିଲା। ଶେଷରେ ବାଧ୍ୟ ହୋଇ ମୋଟରସାଇକେଲରେ ଝିଅର ମୃତଦେହକୁ ଘରକୁ ଆଣିଥିଲି। ଜଣେ ବାପା ହୋଇ ଝିଅର ଏଭଳି ଅବସ୍ଥା ଦେଖିବା କେତେ ଯେ କଷ୍ଟ ତାହା ମୁଁ ଶବ୍ଦରେ କହି ପାରିବି ନାହିଁ। ଖାଲି ଏତିକି କହିବି ଭଗବାନ ଏଭଳି କଷ୍ଟ କୌଣସି ବାପାଙ୍କୁ ନଦିଅନ୍ତୁ।