ଖଣ୍ଡଗିରି: ଜାନୁଆରି ୧୦ ତାରିଖ ରାତିରେ ସ୍ଥାନୀୟ ପାତ୍ରପଡ଼ାରେ ଘନଘନ ବୋମାମାଡ଼ କରି ଆତଙ୍କ ସୃଷ୍ଟି କରିଥିବା ଅଭିଯୁକ୍ତ ବାବୁ ନାଏକକୁ ଗିରଫ କରାଯାଇଛି। ଆସନ୍ତାକାଲି ତାକୁ କୋର୍ଟ ଚାଲାଣ କରାଯିବ ବୋଲି ଖଣ୍ଡଗିରି ଥାନା ସୂତ୍ରରୁ ସୂଚନା ମିଳିଛି। ଏହି ମାମଲାରେ ସମ୍ପୃକ୍ତ ଥିବା ବାବୁର ଅନ୍ୟ ଦୁଇ ସହଯୋଗୀ ଫେରାର୍ ଅଛନ୍ତି। ସୂଚନାନୁସାରେ ବହୁ ଚର୍ଚ୍ଚିତ ଦିଲ୍ଲୀପ ନାଏକ ହତ୍ୟାକାଣ୍ଡରେ ମୁଖ୍ୟ ଅଭିଯୁକ୍ତ ରାଜୁ ବାରିକର ସହଯୋଗୀ ଭାବେ ବାବୁ ନାଏକ ଜଣାଶୁଣା। ଉକ୍ତ ମାମଲାରେ ବାବୁ ଗିରଫ ହୋଇ ପରେ ଜାମିନ୍‌ରେ ଆସିଥିଲା। ଏହାପରେ ସେ ଦିଲ୍ଲୀପ ନାଏକ ଦାଦା କରୁଣାକରଙ୍କୁ ଧମକ ଦେଇ ପୁଣି ଥରେ ଗିରଫ ହୋଇଥିଲା। ତେବେ ଉକ୍ତ ମାମଲାରେ ଜାମିନ୍ ଆସିବା ପରେ ବାବୁ ଗତ ମାସ ୧୦ ତାରିଖ ବିଳମ୍ବିତ ରାତିରେ ପାତ୍ରପଡ଼ା ଗାଁ ଭିତରେ ବୋମାମାଡ଼ କରିଥିଲା। ପ୍ରାୟ ୩/୪ଟି ସ୍ଥାନରେ ବାବୁ ଓ ତା’ର ଅନ୍ୟ ଦୁଇ ସହଯୋଗୀ ବୋମାମାଡ଼ କରିଥିଲେ ଓ ଗାଁ ଭିତରେ ବୋମା ମାଡ଼ କରୁଥିବା ଦୃଶ୍ୟ ସିସିଟିଭିରେ କଏଦ୍‌ ହୋଇଥିଲା। କିନ୍ତୁ ଗାଁ ଭିତରେ ସେ ପକାଇଥିବା ବୋମା ଗୁଡ଼ିକ ଫୁଟିନଥିବାରୁ କାହାର କିଛି କ୍ଷୟକ୍ଷତି ହୋଇନଥିଲା। ବାବୁର ଏଭଳି କାଣ୍ଡକୁ ନେଇ ପାତ୍ରପଡ଼ାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା।