ସଲ୍‌ମାନଙ୍କ ଘର ସାମ୍ନାରେ ଗୁଳି କରିଥିବା ଅଭିଯୁକ୍ତର ଜାମିନ୍‌ ଆବେଦନ ଖାରଜ

ମୁମ୍ବାଇ: ବଲିଉଡ ସୁପରଷ୍ଟାର ସଲମାନ ଖାନଙ୍କ ବାନ୍ଦ୍ରାସ୍ଥିତ 'ଗାଲାକ୍ସି ଆପାର୍ଟମେଣ୍ଟ' ବାହାରେ ଗୁଳି ଚଳାଇଥିବା ଅଭିଯୁକ୍ତ ଭିକି ଗୁପ୍ତାଙ୍କ ଜାମିନ ଆବେଦନକୁ କୋର୍ଟ ପ୍ରତ୍ୟାଖ୍ୟାନ କରିଛନ୍ତି। ମହାରାଷ୍ଟ୍ର କଣ୍ଟ୍ରୋଲ୍ ଅଫ୍ ଅର୍ଗାନାଇଜଡ୍ କ୍ରାଇମ୍ ଆକ୍ଟର ସ୍ୱତନ୍ତ୍ର କୋର୍ଟ କହିଛନ୍ତି ଯେ ଅଭିଯୁକ୍ତଙ୍କ ମଧ୍ୟରେ ହତ୍ୟା କରିବାର ଉଦ୍ଦେଶ୍ୟ ରହିଛି। ଯଦି ତାଙ୍କୁ ମୁକ୍ତ କରାଯାଏ, ଭବିଷ୍ୟତରେ ସେ ଏପରି ଘଟଣା ଘଟାଇ ପାରନ୍ତି। ସେଥିପାଇଁ ତାଙ୍କ ଜାମିନକୁ ଆବେଦନକୁ ଅଦାଲତ ଖାରଜ କରି ଦେଇଛନ୍ତି।

ସୂଚନାନୁସାରେ, ଇଦ୍ ପରେ ସକାଳ ପ୍ରାୟ ୫ଟା ସମୟରେ ସଲମାନ ଖାନଙ୍କ ଘର ବାହାରେ ଗୁଳି ବିନିମୟ ହୋଇଥିଲା। ବାଇକରେ ଯାଉଥିବା ଦୁଇ ଆକ୍ରମଣକାରୀ ୪ ରାଉଣ୍ଡ ଗୁଳି ଚଳାଇଥିଲେ। ଆକ୍ରମଣ ସମୟରେ ସଲମାନ ତାଙ୍କ ଘରେ ଉପସ୍ଥିତ ଥିଲେ। ଗୁଳି ଚଳାଇଥିବା ଅଭିଯୁକ୍ତ ଭିକି ଗୁପ୍ତା ଏବଂ ସାଗର ପାଲଙ୍କୁ ଗିରଫ କରାଯାଇଥିଲା। ପରେ ଅନୁଜ ଥାପନ ଏବଂ ଅନ୍ୟ ଜଣେ ବ୍ୟକ୍ତିଙ୍କୁ ପଞ୍ଜାବରୁ ଗିରଫ କରାଯାଇଥିଲା।

ଅଭିଯୁକ୍ତ ଭିକି ଗୁପ୍ତାଙ୍କ ଜାମିନ ଆବେଦନକୁ ପ୍ରତ୍ୟାଖ୍ୟାନ କରି କୋର୍ଟ କହିଛନ୍ତି ଯେ ଅଭିଯୁକ୍ତ ସେହି ସ୍ଥାନରେ ଗୁଳି ଚଳାଇଥିଲେ ଯେଉଁଠାରେ ସଲମାନ ତାଙ୍କ ପ୍ରଶଂସକଙ୍କୁ ଅଭିବାଦନ ଜଣାଇବା ପାଇଁ ବାଲକୋନିକୁ ଆସନ୍ତି ଏବଂ ପ୍ରତିଦିନ ସକାଳେ ମଧ୍ୟ ବସିଥାନ୍ତି। ଆକ୍ରମଣ ପରେ ସଲମାନ ଖାନଙ୍କ ଦ୍ୱାରା ଦିଆଯାଇଥିବା ଏଫଆଇଆରରେ ଏହା ଉଲ୍ଲେଖ କରାଯାଇଛି। ଏଥିରୁ ଏହା ସ୍ପଷ୍ଟ ହୋଇଛି ଯେ ଉଭୟ ଅଭିଯୁକ୍ତ ଅଭିନେତାଙ୍କୁ ହତ୍ୟା କରିବା ଉଦ୍ଦେଶ୍ୟରେ ଆସିଥିଲେ।