ଠାରରେ ଆତ୍ମହତ୍ୟା କରିବାକୁ ଯାଉଛନ୍ତି ବୋଲି ଭିଡିଓ କରି ନିଜ ଦେହରେ ନିଆଁ ଲଗାଇ ଦେଲେ ଦିବ୍ୟାଙ୍ଗ ଦମ୍ପତ୍ତି
ତେଲେଙ୍ଗାନା: ତେଲେଙ୍ଗାନାର ନଲଗୋଣ୍ଡାରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ଏଠାରେ ଗୁରୁବାର ଜଣେ ଦିବ୍ୟାଙ୍ଗ ପ୍ରେମୀଯୁଗଳ ଆତ୍ମହତ୍ୟା କରିଥିବା ଜଣାପଡ଼ିଛି। ତେବେ ଆଶ୍ଚର୍ଯ୍ୟର କଥା ହେଉଛି ଆତ୍ମହତ୍ୟା କରିବା ପୂର୍ବରୁ ଦୁହେଁ ଠାରରେ ଏକ ଭିଡିଓ ସେଲଫି ନେଇ ସେଥିରେ ସେମାନେ ଆତ୍ମହତ୍ୟା କରିବାକୁ ଯାଉଛନ୍ତି ବୋଲି ଜଣାଇ ଦେଇଥିଲେ।
ଏହି ଆତ୍ମହତ୍ୟା ଖବର ପାଇ ପୁଲିସ ଘଟଣାସ୍ଥଳରେ ପହଂଚି ଉଭୟଙ୍କ ମୃତଦେହକୁ ଉଦ୍ଧାର କରିଛି। ତେବେ ଦିବ୍ୟାଙ୍ଗ ପ୍ରେମୀଯୁଗଳ ଆତ୍ମହତ୍ୟାର ଭିଡିଓ ସୁଟ୍ କରି ସାଙ୍ଗଙ୍କ ହ୍ବାଟସଆପକୁ ପଠାଇଥିଲେ ଏବଂ ଲୋକେସନର ସୂଚନା ଦେଇଥିଲେ।
ସାଙ୍ଗ ପାଖରେ ଏହି ଭିଡିଓ ପହଂଚିବା କ୍ଷଣି ସେ ତୁରନ୍ତ ପୁଲିସକୁ ଏହାର ସୂଚନା ଦେଇଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଂଚିଲା ବେଳକୁ ଦିବ୍ୟାଙ୍ଗ ଦମ୍ପତ୍ତି ଆତ୍ମହତ୍ୟା କରି ସାରିଥିଲେ।
Sambad is now on WhatsApp
Join and get latest news updates delivered to you via WhatsApp
ପୁଲିସ ସୂତ୍ରରୁ ପ୍ରକାଶ, ଶେଖ ମସ୍ତାନ ଅଲି ଏବଂ ଏନ.ଅଶ୍ବିନୀ ଏକ ଇ-କମର୍ସ କମ୍ଫାନିରେ ପ୍ୟାକିଂ କାମ କରୁଥିଲେ। ୬ମାସ ତଳେ ଯୁବତୀ କେଉଁଆଡ଼େ ନିଖୋଜ ହୋଇ ଯାଇଥିଲେ। ହାଇଦ୍ରାବାଦର ଏକ ମହିଳା ଥାନାରେ ନିଖୋଜ ରିପୋର୍ଟ ଲେଖାଯାଇଥିଲା। ବୁଧବାର ଦୁହେଁ ନଲଗୋଣ୍ଡା ପହଞ୍ଚିଥିଲେ ଏବଂ ଏକ ଶୁନଶାନ ସ୍ଥାନରେ ଉଭୟେ ପରସ୍ପର ଦେହରେ ନିଆଁ ଲଗାଇ ଦେଇଥିଲେ। ପୁଲିସ ଏହି ମାମଲା ରୁଜୁ କରି ତଦନ୍ତ ଆରମ୍ଭ କରି ଦେଇଛି।