ରାୟପୁର: ଛତିଶଗଡର ଦୁର୍ଗ ଜିଲ୍ଲାରେ ସାଧୁଙ୍କୁ ଅତି ନିର୍ମମ ଭାବେ ମାଡ଼ ମାରିବା ଘଟଣା ସାମ୍ନାକୁ ଆସିଛି । ପିଲା ଚୋରି ସନ୍ଦେହରେ ୩ ସାଧୁଙ୍କୁ ମାଡ଼ ମରାଯାଇଥିଲା। ଏପରିକି ମାଡ଼ ଖାଉଥିବା ସାଧୁମାନଙ୍କୁ ଉଦ୍ଧାର କରିବାକୁ ଆସିଥିବା ପୁଲିସଙ୍କୁ ବି ନିସ୍ତାର ମିଳି ନଥିଲା । ଏହି ବିବାଦ ବଢ଼ିବାରେ ଲାଗିଲା । ସାଧୁମାନଙ୍କୁ ପ୍ରାଥମିକ ଚିକିତ୍ସା ପରେ ଡାକ୍ତରଖାନାରୁ ଡିସଚାର୍ଜ କରାଯାଇଥିଲା । ବେଶ ବଦଳାଇ ସାଧୁ ବନିଥିବା ଅଭିଯୋଗରେ ସେମାନଙ୍କ ବିରୋଧରେ ମାମଲା ରୁଜୁ କରିଛି ଭିଲାଇ ପୁଲିସ।
Sambad is now on WhatsApp
Join and get latest news updates delivered to you via WhatsApp
ପ୍ରକୃତରେ ଘଟଣା ଏମିତି। କିଛି ଦିନ ପୂର୍ବରୁ ଦୁର୍ଗ ଜିଲ୍ଲାର ଖୁରସିପର ପୁଲିସ ଷ୍ଟେସନ ଅଞ୍ଚଳରେ ଏକ ପିଲା ଚୋରି ଗ୍ୟାଙ୍ଗ ଧରାପଡ଼ିଥିଲା । ସେବେଠାରୁ ଅଭିଭାବକମାନେ ସେମାନଙ୍କ ପିଲାମାନଙ୍କ ବିଷୟରେ ଚିନ୍ତା କରିବା ଆରମ୍ଭ କରି ଦେଇଛନ୍ତି । ଦୁର୍ଗ ଜିଲ୍ଲାର ଭିଲାଇ-୩ ପୁଲିସ ଷ୍ଟେସନ ପରିସରର ଚାରୋଦା ବସ୍ତିରେ ଥିବା ଦଶହରା ମହୋତ୍ସବରେ ଭିକ୍ଷା ମାଗୁଥିବା ତିନି ଜଣ ସାଧୁଙ୍କୁ ପିଲା ଚୋରି ଅଭିଯୋଗରେ ସ୍ଥାନୀୟ ଲୋକମାନେ ଧରିବା ସହ ମାଡ଼ ମାରିଥିଲେ । ସାଧୁଙ୍କୁ ମାଡ ମାରିବାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଲୋକମାନେ କିପରି ଅତି ନିର୍ମମଭାବେ ୩ ସାଧୁଙ୍କୁ ଚାରିପଟୁ ଘେରି ସେମାନଙ୍କୁ ମାଡ଼ମାରୁଛନ୍ତି ତାହା ଭିଡିଓରୁ ସ୍ପଷ୍ଟ ଦେଖିବାକୁ ମିଳୁଛି।
ସାଧୁଙ୍କୁ ମାଡ ମାରିବା ସମ୍ପର୍କରେ ସୂଚନା ପାଇବା ପରେ ପୁଲିସ ଚରୋଦା ବସ୍ତି ଆଡକୁ ଯାଇଥିଲେ । ପୁଲିସ ଯେତେବେଳେ ସାଧୁଙ୍କୁ ମାଡରୁ ରକ୍ଷା କରିବା ପାଇଁ ସେଠାରେ ପହଞ୍ଚିଥିଲେ ସେତେବେଳେ ଲୋକମାନେ ରାଗି ଯାଇଥିଲେ । ବସ୍ତିବାସିନ୍ଦାମାନେ ପୁଲିସ ସହ ଯୁକ୍ତିତର୍କ ମଧ୍ୟ କରିଥିଲେ । ଭିଡିଓରେ ଏଥିରୁ ସ୍ପଷ୍ଟ ଜଣାପଡୁଛି ଯେ ପୋଲିସ ସାଧୁମାନଙ୍କୁ ବଞ୍ଚାଇବାକୁ ଚେଷ୍ଟା କରୁଥିଲା, କିନ୍ତୁ ଲୋକମାନେ ପୁଲିସକୁ ମଧ୍ୟ ଛାଡ଼ି ନାହାନ୍ତି । ଏସପି ଡକ୍ଟର ଅଭିଷେକ ପାଲ୍ଲାଭ କହିଛନ୍ତି ଯେ ଭିକ୍ଷା ମାଗୁଥିବା ସାଧୁଙ୍କୁ ମାଡ ମାରିବା ମାମଲା ସାମ୍ନାକୁ ଆସିଛି । ପିଲା ଚୋରି ସନ୍ଦେହରେ ଏହି ଘଟଣା ଘଟିଛି । ସେମାନଙ୍କୁ ପ୍ରାଥମିକ ଚିକିତ୍ସା ପରେ ଡାକ୍ତରଖାନାରୁ ଡିସଚାର୍ଜ କରାଯାଇଛି । ଯେଉଁମାନେ ସାଧୁଙ୍କୁ ମାଡ ମାରିଛନ୍ତି ସେମାନଙ୍କ ବିରୋଧରେ ଅପରାଧିକ ମାମଲା ପଞ୍ଜୀକୃତ ହେବ । ପୁଲିସ ଘଟଣାର ତଦନ୍ତ କରୁଛି, ସେପଟେ ପିଲା ଚୋରିର ଗୁଜବ ପ୍ରତି ଧ୍ୟାନ ଦିଅନ୍ତୁ ନାହିଁ ବୋଲି ଏସପି କହିଛନ୍ତି । ଯଦି ତୁମେ କିଛି ସନ୍ଦେହଜନକ ଦେଖୁଛ, ତୁରନ୍ତ ପୁଲିସକୁ ଜଣାନ୍ତୁ।