ଡାକ୍ତରଖାନା ଯିବା ବାଟରେ ପୀଡ଼ିତାଙ୍କୁ ଅପହରଣ କରି ନେଇ ୩ଘଣ୍ଟା ପର୍ଯ୍ୟନ୍ତ ଦୁଷ୍କର୍ମ କଲେ ୨ ଅଭିଯୁକ୍ତ

ଭୋପାଳ: ଦେଶ ଏବେ କରୋନା ଭଳି ମହାମାରୀ ସହ ଲଢ଼ୁଥିବା ବେଳେ ମହିଳା ଏବଂ ଶିଶୁଙ୍କ ପ୍ରତି ହେଉଥିବା ଯୌନ ଅପରାଧ ଥମିବାର ନାଁ ନେଉ ନାହିଁ। ପୋସ୍କୋ ପରି କଠୋର ନିୟମ ମଧ୍ୟ ଯୌନ ପିଶାଚମାନଙ୍କୁ ରୋକିବାରେ ବିଫଳ ହୋଇଛି । ଏକ ଆଶ୍ଚର୍ଯ୍ୟଜନକ ଘଟଣାରେ ମଧ୍ୟପ୍ରଦେଶର ରାଜଧାନୀ ଭୋପାଳର ଡାକ୍ତରଖାନାକୁ ଯାଉଥିବା ବେଳେ ଜଣେ ୧୭ ବର୍ଷର ବାଳିକାକୁ ଅପହରଣ କରି ତିନି ଘଣ୍ଟା ଧରି ଦୁଷ୍କର୍ମ କରାଯାଇଥିବାର ଖବର ସାମ୍ନାକୁ ଆସିଛି । ଲକଡାଉନ୍ ଅବଧିରେ ଭୋପାଳରେ ଏହା ଦ୍ୱିତୀୟ ଦୁଷ୍କର୍ମ ମାମଲା ବୋଲି କୁହାଯାଉଛି।

ସୂଚନା ମୁତାବକ, ଏହି ଘଟଣା ଏପ୍ରିଲ ୧୮ରେ ଗୋବିନ୍ଦପୁରାର ଭେଲ ଟାଉନସିପ୍ ଅଞ୍ଚଳରେ ଘଟିଥିଲା। ନାବାଳିକା ପୀଡିତାଙ୍କୁ କାର ଭିତରକୁ ଟାଣି ନେଇ ଏକ ନିଛାଟିଆ ସ୍ଥାନକୁ ନିଆଯାଇ ତାଙ୍କ ସହ ଦୁଷ୍କର୍ମ କରାଯାଇଥିଲା। ସବୁଠାରୁ ଆଶ୍ଚର୍ଯ୍ୟଜନକ ବିଷୟ ହେଉଛି ଯେ, ଲକଡାଉନ୍ ମଧ୍ୟରେ ଜେପି ହସ୍ପିଟାଲ୍ ଏବଂ ଗୋବିନ୍ଦପୁରା ମଧ୍ୟରେ ଅତି କମରେ ୮ କିଲୋମିଟର ଦୂରତାରେ ଥିବା କୌଣସି ପୁଲିସ ଚେକପଏଣ୍ଟରେ କାରକୁ ଅଟକାଯାଇ ନଥିଲା। ପରଦିନ ପୀଡିତାଜଣକ ତାଙ୍କ ବନ୍ଧୁଙ୍କୁ ପୁରା ଘଟଣା ବିଷୟରେ ଜଣାଇବା ପରେ ସେ ପୀଡ଼ିତାଙ୍କୁ ପୁଲିସରେ ଅଭିଯୋଗ କରିବାକୁ ପରାମର୍ଶ ଦେଇଥିଲେ। ପରେ ପୀଡିତ ଏକ ଜିରୋ ଏଫଆଇଆର ଦାଖଲ କରିଥିଲେ, ଯାହା ପରେ ହବିବଗଞ୍ଜ ପୁଲିସ ଷ୍ଟେସନକୁ ସ୍ଥାନାନ୍ତର କରାଯାଇଥିଲା।

ପୁଲିସର ସୂଚନାନୁସାରେ, ପୀଡିତା ତାଙ୍କ ଅଭିଯୋଗରେ ଶଫିକ୍ ଖାନ୍ ଏବଂ ଆବିଦ୍ ଖାନ୍ ନାମକ ଦୁଇଜଣ ଅଭିଯୁକ୍ତଙ୍କ ନାମ ଲେଖିଛନ୍ତି। ତାଙ୍କ ଅଭିଯୋଗରେ ପୀଡିତା କହିଛନ୍ତି ଯେ, ଅଭିଯୁକ୍ତ ତାଙ୍କୁ କାର ଭିତରୁ ଟାଣି ନେଇ ଏକ ନିର୍ଜନ ସ୍ଥାନକୁ ନେବା ସହ ଦୁଷ୍କର୍ମ କରିଥିଲେ। ସାହାଯ୍ୟ ପାଇଁ ଚିତ୍କାର କରିଥିଲେ ମଧ୍ୟ କେହି ଲୋକ ନଥିବାରୁ କାହାକୁ ତାଙ୍କ ଚିତ୍କାର ଶୁଣା ଯାଇ ନଥିଲା | ଏସପି ରଜତ ସାକଲେଚା କହିଛନ୍ତି ଯେ, ଆମେ ପୋସ୍କୋ ଅଧିନିୟମ ଅନୁଯାୟୀ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛୁ |