ସ୍କୁଲ ଘର ପାଲଟିଛି ଜୁଆଖେଳ ଆଡ୍ଡାସ୍ଥଳୀ: ୩ ଗିରଫ, ୧୭ ହଜାର ୭ ଶହ ଟଙ୍କା ଜବତ
ବାଲିଅନ୍ତା: ମହାମାରୀ କରୋନା ପାଇଁ ବନ୍ଦ ହୋଇପଡ଼ିଥିବା ସ୍ଥାନୀୟ ବଇଁଚୁଆ ହାଇସ୍କୁଲ ଏବେ ଜୁଆଖେଳର ଆଡ୍ଡାସ୍ଥଳୀ ପାଲଟିଛି । ଆଜି ସଂଧ୍ୟାରେ ଖୋର୍ଦ୍ଧା ଜିଲ୍ଲା ବାଲିଅନ୍ତା ଥାନା ଅଧିକାରୀ ପ୍ରଦୀପ କୁମାର ରାଉତ ପୁଲିସ ଟିମ ସହ ଦୀର୍ଘଦିନ ଧରି ଏଠାରେ ଚାଲିଥିବା ଏକ ଜୁଆ ଆଡ୍ଡାରେ ଅତର୍କିତ ଚଢ଼ଉ କରି ୩ ଜଣ ଜୁଆଡ଼ିଙ୍କୁ ଗିରଫ କରିଛନ୍ତି । ଅଭିଯୁକ୍ତମାନେ ହେଲେ ସ୍ଥାନୀୟ ବଇଁଚୁଆ ଅଞ୍ଚଳର ବାବାଜୀ ସାହୁ (୪୦), ଚୈତନ୍ୟ ସାହୁ, କୈଳାଶ ସାହୁ (୩୦ ) ଏବଂ ସରୋଜ କୁମାର ବାରିକ (୩୨) । ଆସନ୍ତାକାଲି ସେମାନଙ୍କୁ କୋର୍ଟ ଚାଲାଣ କରାଯିବ ବୋଲି ସୂଚନା ମିଳିଛି ।
Sambad is now on WhatsApp
Join and get latest news updates delivered to you via WhatsApp
ଘଟଣାସ୍ଥଳରୁ ପୁଲିସ ସେମାନଙ୍କ ନିକଟରୁ ୧୬ ହଜାର ୭୦୦ ଟଙ୍କା, ୩ଟି ଦାମୀ ମୋବାଇଲ ଫୋନ, ସୁନାମୁଦି, ଦୁଇଟି ସ୍କୁଟି ଓ ଗୋଟିଏ ଟାୱାଲ ଜବତ କରାଯାଇଛି । ପୁଲିସ ଚଢ଼ଉ ସମୟରେ ଆଉ କିଛି ଯୁବକ ଖସିପଳାଇଥିବା ଜଣାପଡ଼ିଛି । ପ୍ରାପ୍ତ ସୂଚନା ମୁତାବକ କରୋନା ପାଇଁ ସ୍କୁଲ ବନ୍ଦ ହେବା ପରେ ଏଠାରେ ଦୀର୍ଘ ୭ ମାସ ହେବ ଜୁଆ ଖେଳ ଚାଲିଥିଲା । ଏମିତିକି ସ୍କୁଲ ବାରଣ୍ଡା ଅସାମାଜିକ ଯୁବକଙ୍କ ଓପନ ପାର ପାଲଟିଥିଲା । ବିଳମ୍ବିତ ରାତି ଯାଏ ନିଶାଡ଼ିକ ଭିଡ଼ ଜମିବା ସହ ଜୁଆଖେଳ ଚାଲେ । ଆଜି କୌଣସି ସୂତ୍ରରୁ ଖବର ପାଇ ବାଲିଅନ୍ତା ଥାନା ପୁଲିସ ଚଢ଼ଉ କରି ବାବାଜୀ , ଚୈତନ୍ୟ ଓ କୈଳାଶକୁ କାବୁ କରି ନେଇଥିବା ବେଳେ ଅନ୍ୟମାନେ ଖସି ପଳାଇଥିଲେ । ଏନେଇ ଥାନାରେ ୨୪୭/୨୦ ରେ ମାମଲା ରୁଜୁ ହୋଇଛି ।