ଫୁଲବାଣୀ: ଏକ ବଡ ଧରଣର ଡକାୟତି ଯୋଜନାକୁ ପଣ୍ଡ କରିଛି ଫୁଲବାଣୀ ପୁଲିସ। ଦୁଇ ଅନ୍ତଃରାଜ୍ୟ ଡକାୟତ ସହ ୩ ଜଣଙ୍କୁ ପୁଲିସ ଗିରଫ କରିଥିବା ବେଳେ ୨ ଜଣ ଫେରାର ହୋଇଯାଇଛନ୍ତି। ଡକାୟତଙ୍କ ନିକଟରୁ ପୁଲିସ ଗୋଟିଏ କାର, ଗୋଟିଏ ପିସ୍ତଲ,୧୨ ରାଉଣ୍ଡ ଗୁଳି, ଗୋଟିଏ ଛୁରି, ୨ଟି ମନିଫର୍ସ, ୩ଟି ମୋବାଇଲ, ୨ଟି ଲୁହାରଡ ଓ ନଗଦ ୫ ହଜାର ୩୪୦ ଟଙ୍କା ଜବତ କରିଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ ଏହି ଡକାୟତ ଦଳର ଟାର୍ଗେଟ ରହିଥିଲା ଗଂଜେଇ ଗାଡ଼ି। ବଡ଼ ଗାଡି କିମ୍ବା ମୋଟର ସାଇକେଲରେ ଯାଉଥିବା ଚାଲାଣକାରୀଙ୍କୁ ପିସ୍ତଲ ଦେଖାଇ ଓ ମାରଣାସ୍ତ୍ରରେ ଆକ୍ରମଣ କରି ଗଂଜେଇ ସହ ଗାଡି ନେବା ଦଳର ଯୋଜନା ରହିଥିଲା। ଯୋଜନା ମୁକାବକ ପଶ୍ଚିମବଙ୍ଗର ମଜାଫର ଅହମ୍ମଦ(୧୯) ଓ ମାଫିକୁଲ ଶେଖ(୨୭) ଆସି ଫୁଲବାଣୀ ସହରର ଏକ ହୋଟେଲରେ ୨ ଦିନ ପୂର୍ବେ ପହଞ୍ଚିଥିଲେ। ସେମାନଙ୍କ ସହ ସାଥୀ ହୋଇଥିଲେ ଫିରିଙ୍ଗିଆ ଅଞ୍ଚଳର ମଳୟ କହଁର, ମିଥୁନ ଦିଗାଲ ଓ ତାର ଜଣେ ସାଙ୍ଗ।
ଗତକାଲି ସଂଧ୍ୟାରେ ଏହି ୫ ଜଣ ଫୁଲବାଣୀରୁ ଗୋଛାପଡା ଯିବା ରାସ୍ତା ପଟାବାଲି ସାହି ପୋଲ ନିକଟରେ ରହି ଡକାୟତି ପାଇଁ ଯୋଜନା ଚଳାଇଥିଲେ। ବିଶେଷ ସୁତ୍ରରୁ ଖବର ପାଇ ଫୁଲବାଣୀ ଟାଉନ ଥାନାଧିକାରୀ ନରେଶ କୁମାର ସାହୁଙ୍କ ନେତୃତ୍ୱବରେ ସେଠାରେ ଚଢ଼ାଉ କରାଯାଇଥିଲା। ପୁଲିସ ମଜାଫର, ମାଫିକୁଲ ଓ ମଳୟ କହଁରଙ୍କୁ ଧରିବାରେ ସଫଳ ହୋଇଥିଲା। ହେଲେ କୌଶଳକ୍ରମେ ମିଥୁନ ଦିଗାଲ ଓ ତାର ସାଙ୍ଗ ସେଠାରୁ ପଳାଇ ଯାଇଥିଲେ। ଏହି ଚଢ଼ାଉରେ ଏସ୍ଆଇ ଦୀପକ ସାମନ୍ତରାୟ, ହାବିଲଦାର ରାମଚନ୍ଦ୍ର ନାୟକ, କନେଷ୍ଟବଳ ସନ୍ତୋଷ ସ୍ୱାଇଁଙ୍କ ସମେତ ଏପିଆର ଫୋର୍ସ ସାମିଲ ଥିଲେ।
ଫେରାର ୨ ଡକାୟତଙ୍କୁ ଧରିବାକୁ ଉଦ୍ୟମ ଚାଲିଛି ବୋଲି ଥାନାଧିକାରୀ କହିଛନ୍ତି। ଏହି ଡକାୟତି ଗ୍ୟାଙ୍ଗ କେଉଁ ସବୁ ଘଟଣାରେ ସଂପୃକ୍ତ ଓ ସେମାନଙ୍କ ଅନ୍ୟ ଡକାୟତ ଦଳ ସହ ଲିଙ୍କ ଅଛି କି ନାହିଁ, ସେନେଇ ତଦନ୍ତ ଚାଲିଥିବା ପୁଲିସ କହିଛି।