ଦୁଷ୍କର୍ମ କରିବାକୁ ରୋକିଥିବାରୁ ଯୁବକଙ୍କୁ ଜଳାଇ ହତ୍ୟା ଉଦ୍ୟମ କଲେ ୩ ଦୁର୍ବୃତ୍ତ
ଗ୍ରେଟର ନୋଏଡା : କିଛି ଦିନ ତଳେ ଜଣେ ଯୁବତୀଙ୍କୁ ଦୁଷ୍କର୍ମ କରିବାରୁ ରୋକିଥିଲେ ସିକ୍ୟୁରିଟି ଗାର୍ଡ ଭାବେ କାମ କରୁଥିବା ଯୁବକ । କିନ୍ତୁ ତାଙ୍କୁ ଜଣା ନ ଥିଲା, ଏହାର ପରବର୍ତ୍ତୀ ପରିଣାମ କ’ଣ ହେବ? ଯେଉଁ ୩ଜଣଙ୍କୁ ସେ ପାପ କରିବାକୁ ରୋକିଥିଲେ, ସେହି ୩ଜଣ ତାଙ୍କୁ ହତ୍ୟା କରିବାର ଉଦ୍ୟମ କରିବେ ବୋଲି ଚିନ୍ତା କରି ନ ଥିଲେ ପୀଡ଼ିତ । ରାତିରେ ନିଜ କୁଡ଼ିଆରେ ଶୋଇଥିବା ବେଳେ ୩ଜଣ ଅଭିଯୁକ୍ତ ନିଆଁ ଲଗାଇ ଦେଇଥିଲେ । କିନ୍ତୁ ସୌଭାଗ୍ୟବଶତଃ ପୀଡ଼ିତ ନିଜକୁ ବଞ୍ଚାଇବାରେ ସକ୍ଷମ ହୋଇଥିଲେ । ସାମାନ୍ୟ ଆଘାତ ଲାଗିଥିବା ବେଳେ ଏବେ ସେ ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଘଟଣାର କିଛି ଦିନ ପୂର୍ବରୁ ପୀଡ଼ିତ ନିଜ କୁଡ଼ିଆ ଭିତରେ ଥିବା ସମୟରେ ଜଣେ ଯୁବତୀଙ୍କ ଚିତ୍କାର ଶୁଣିଥିଲେ । ବାହାରକୁ ଆସିବା ପରେ ୩ଜଣ ଅଭିଯୁକ୍ତ ପୀଡ଼ିତାଙ୍କୁ ଏକ ଜନଶୂନ୍ୟ ସ୍ଥାନକୁ ନେବା ପାଇଁ ଟାଣୁଥିବାର ଦେଖିଥିଲେ ପୀଡ଼ିତ । ଏହା ଦେଖି ପୀଡ଼ିତ ସେଠାକୁ ଯିବା ସହ ୩ଜଣଙ୍କୁ ପାଟି କରି ସେଠାରୁ ଯିବା ପାଇଁ କହିଥିଲେ । ଯାହାର ରାଗ ରଖି ଅଭିଯୁକ୍ତମାନେ ଏଭଳି ଅପରାଧ କରିଥିବା କହିଛନ୍ତି ପୀଡ଼ିତ । ଏ ନେଇ ଏତଲା ଦିଆଯାଇ ସାରିଥିଲେ ମଧ୍ୟ ୩ଜଣ ଅଭିଯୁକ୍ତଙ୍କୁ ଗିରଫ କରି ପାରିନାହିଁ ପୁଲିସ ।