ଠେଙ୍ଗାରେ ସ୍ତ୍ରୀକୁ ପିଟୁଥିଲା ସ୍ବାମୀ, ମାରପିଟରେ ଚାଲିଗଲା କୋଳରେ ଥିବା ୫ମାସ ଶିଶୁର ଜୀବନ
ନୂଆଦିଲ୍ଲୀ : ଦିଲ୍ଲୀରେ ଘଟିଛି ଏକ ଆଚମ୍ବିତ କରିବା ଭଳି ଘଟଣା। ମାତା-ପିତାଙ୍କ କଳହ ପାଇଁ ଜଣେ ୫ମାସର ଶିଶୁ ମୃତ୍ୟୁବରଣ କରିଥିବା ଜଣା ପଡ଼ିଛି । ଶିଶୁର ମୁଣ୍ଡରେ ଲୁହା କଣ୍ଟା ପଶିଯିବାରୁ ତା’ର ମୃତ୍ୟୁ ହୋଇଛି । ଘଟଣା ପରେ ଗିରଫ ଡ଼ରରେ ଅଭିଯୁକ୍ତ ବାପା ଫେରାର ଥିବା ବେଳେ ଖୋଜିବା ଆରମ୍ଭ କରିଛି ପୁଲିସ ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଅଭିଯୁକ୍ତ ଏକ ଘରୋଇ ଡାକ୍ତରଖାନାରେ ଅପରେସନ ଥିଏଟର ଟେକ୍ନିସିଆନ୍ ଭାବେ କାମ କରୁଥିବା ବେଳେ ତାଙ୍କ ସ୍ତ୍ରୀ ଏକ କ୍ଲିନିକ୍ରେ ନର୍ସ ଭାବେ କାମ କରୁଥିଲେ । କିନ୍ତୁ କିଛି ମାସ ହେବ ଅଭିଯୁକ୍ତ ଚାକିରି ଛାଡ଼ି ଘରେ ରହୁଥିଲେ । ରବିବାର ଶିଶୁକୁ କୋଳରେ ଧରି ଖାଇବାକୁ ଦେଉଥିବା ବେଳେ ଅଭିଯୁକ୍ତ ଆସି ନିଜ ପତ୍ନୀଙ୍କ ସହ ଝଗଡ଼ା କରିବା ଆରମ୍ଭ କରିଥିଲା । ଏହା ସହ ଏକ ବାଡ଼ିରେ ନିଜ ପତ୍ନୀକୁ ମାଡ଼ ମାରିବା ଆରମ୍ଭ କରିଥିଲେ । ବାଡ଼ି ଆଗରେ ଏକ ଲୁହା କଣ୍ଟା ଲାଗିଥିବାରୁ ନିଜ ପତ୍ନୀକୁ ମାଡ଼ ମାରିବା ସମୟରେ ତାହା କୋଳରେ ଶୋଇଥିବା ଶିଶୁ ମୁଣ୍ଡରେ ପଶି ଯାଇଥିଲା । ରକ୍ତ ପ୍ରବାହ ଦେଖି ମାତା-ପିତା ଦୁହେଁ ଶିଶୁକୁ ପାଖ କ୍ଲିନିକ୍କୁ ନେଇ ପହଞ୍ଚିଥିଲେ । ସେଠାରେ ପ୍ରାଥମିକ ଚିକିତ୍ସା କରିବା ପରେ ଶିଶୁକୁ ସୁସ୍ଥ ବୋଲି କହି ଡାକ୍ତର ଘରକୁ ପଠାଇଥିଲେ ।
କିନ୍ତୁ ମଙ୍ଗଳବାର ଶିଶୁର ଅବସ୍ଥା ଗମ୍ଭୀର ହେବାରୁ ତାକୁ ପୁଣି ଥରେ ପାଖ କ୍ଲିନିକ୍କୁ ନିଆଯାଇଥିଲା । ଯେଉଁଠି ଡାକ୍ତର ଅବସ୍ଥା ଗୁରୁତର ବୋଲି କହି ପ୍ରତାପଗଞ୍ଜରେ ଥିବା ଘରୋଇ ଡାକ୍ତରଖାନାକୁ ପଠାଇଥିଲେ । କିନ୍ତୁ ସେଠାରେ ଡାକ୍ତର ଶିଶୁକୁ ମୃତ ଘୋଷଣା କରିଥିଲେ । ଏ ନେଇ ପୁଲିସକୁ ଡାକ୍ତର ସୂଚନା ଦେବା ପରେ ଶିଶୁର ଶବ ବ୍ୟବଚ୍ଛେଦ କରାଯାଇଥିଲା । ବ୍ୟବଚ୍ଛେଦ ପରେ ମୁଣ୍ଡ ଭିତରେ ରକ୍ତ ପ୍ରବାହ ହେତୁ ଶିଶୁର ମୃତ୍ୟୁ ହୋଇଥିବା ଜଣା ପଡ଼ିଥିଲା । ପରେ ଶିଶୁର ମା’ଠାରୁ ପୂରା ଘଟଣା ଶୁଣି ଏବେ ପୁଲିସ ଅଭିଯୁକ୍ତ ବାପାକୁ ଖୋଜିବା ଆରମ୍ଭ କରିଛି ।