କାନରେ ଇୟରଫୋନ ଲଗାଇ ‌ରେଳ ଧାରଣା ପାର ହେବା ମହିଳାଙ୍କୁ ମହଙ୍ଗା ପଡ଼ିଲା

ହୋଷଙ୍ଗାବାଦ: ମଧ୍ୟପ୍ରଦେଶର ହୋଷଙ୍ଗାବାଦରୁ ଏକ ଲୋମଟାଙ୍କୁରା ଘଟଣା ସାମ୍ନାକୁ ଆସିଛି। ଏହି ଘଟଣାରେ  ଜଣେ ମହିଳାଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ମହିଳାଙ୍କ ମୃତ୍ୟୁର ଏହି ଭୟଙ୍କର ଦୃଶ୍ୟ ସିସିଟିଭିରେ କଏଦ ହୋଇଛି।

ଡୋଲରିୟା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ କାର୍ଯ୍ୟରତ ଏହି ମହିଳା ଗତକାଲି କରୋନା ଭ୍ୟାକସିନ୍ ନେବା ପାଇଁ ଯାଉଥିଲେ। କିନ୍ତୁ ଭ୍ୟାକସିନ ନେବା ପୂର୍ବରୁ ଟ୍ରେନ ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି।

ସୂଚନାଯୋଗ୍ୟ, ୪୦ ବର୍ଷ ବୟସ୍କ ଏଏନଏମ ଚନ୍ଦା ସୋନାଙ୍କ ଗତକାଲି ରାତି ଡ୍ୟୁଟି ଥିଲା। ରାତି ଡ୍ୟୁଟି ସାରି ସକାଳୁସକାଳୁ ସେ ଘରକୁ ଫେରୁଥିଲେ। ଏହି ସମୟରେ କାନରେ ଇଅରଫୋନ ଲଗାଇ ଚନ୍ଦା ରେଲୱେ ଫାଟକ ପାର କରୁଥିଲେ। ଏତିକି ବେଳେ ଟ୍ରେନ୍ ଆସୁଥିବା ସେ ଜାଣିପାରି ନଥିଲେ।

ଠିକ୍ ଏହି ସମୟରେ ଇଟାରସି ଯାଉଥିବା ସୋମନାଥ ଏକ୍ସପ୍ରେସ ମହିଳାଙ୍କ ଉପରକୁ ଚଢ଼ିଯାଇଥିଲା। ଆଖିପିଛୁଳାକେ ମହିଳାଙ୍କ ଶରୀର ଠାରୁ ମୁଣ୍ଡ ଅଲଗା ହୋଇଯାଇଥିଲା। ଏହି ଲୋମଟାଙ୍କୁରା ଘଟଣା ସେଠାରେ ଲାଗିଥିବା ସିସିଟିଭି କ୍ୟାମେରାରେ କୈଦ ହୋଇଯାଇଥିଲା।