ନୂଆଦିଲ୍ଲୀ: ଗୁଜୁରାଟରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଜଣେ ବୋହୂ ସମ୍ପତ୍ତି ପାଇଁ ଏ‌ତେ ତଳକୁ ଖସି ଯାଇଛି କି ସେ ଶ୍ବଶୁରଙ୍କୁ ଗୋଇଠା ମାରିବାକୁ ବି ପଛାଇଲା ନାହିଁ। କେବଳ ଏତିକି ନୁହେଁ ଉକ୍ତ ବୋହୂ ଜଣକ ତାର ଶାଶୁଙ୍କ କେଶ ଘୋଷ‌ାରି ମାରିବା ସହିତ କାମୁଡ଼ି ବି ପକାଇଥିଲା।

Advertisment

ତେବେ ଏହି ଘଟଣାର ଭିଡିଓ ପୀଡିତ ବୃଦ୍ଧ ଦମ୍ପତିଙ୍କ ପୁଅ ରେକର୍ଡ କରିଥିଲେ। ଏହାପରେ ଏହି ଭିଡିଓକୁ ଆଧାର କରି ସେ ପୁଲିସରେ ଅଭିଯୋଗ କରିଥିଲେ। ପୁଲିସ ଏହି ଭିଡିଓକୁ ଆଧାର କରି ଯାଞ୍ଚ ଆରମ୍ଭ କରିଛି। ଏହି ଯାଞ୍ଚରୁ ଯିଏ ବି ଦୋଷୀ ସାବ୍ୟସ୍ତ ହେବେ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୁଲିସ ପ୍ରତିଶ୍ରୁତି ଦେଇଛି।

ତେବେ ପୀଡିତ ବୃଦ୍ଧ ଓ ବୃଦ୍ଧାଙ୍କ ପୁଅ କହିଛନ୍ତି, ସମ୍ପତ୍ତି ପାଇଁ ମୋ ସ୍ତ୍ରୀ ସବୁବେଳେ ଝଗଡ଼ା କରେ। ନିକଟରେ ତ ସେସବୁ ସୀମା ଟପିଗଲା। ସମ୍ପତ୍ତି ପାଇଁ ସ୍ତ୍ରୀ ମୋ‌ତେ ଗାଳିଗୁଲଜ କରିବା ସହିତ  ମୋ’ ମା’ଙ୍କୁ କେଶ ଘୋଷାରି ମାଡ଼ ମାରିଥିଲା। ବାପା ଅଟକାଇବାକୁ ଚେଷ୍ଟା କରିବାରୁ ସେ ବାପାଙ୍କୁ ବି ଗୋଇଠା ମାରିଥିଲା। ମୁଁ ବି ତାକୁ ପାରି ନଥିଲି। ତେଣୁ ଭିଡିଓ କରି ପ୍ରମାଣ ରଖି ଦେଇଥିଲି। ଏମିତି କି ସେ ମୋ ମା’ଙ୍କ ଗାଲକୁ ବି କାମୁଡ଼ି ଦେଇଥିଲା। ଯାହାକି ଆପଣମାନେ ଭିଡିଓ ଜରିଆରେ ସ୍ପଷ୍ଟ ଭାବେ ଦେଖି ପାରିବେ। ଏଭଳି ଲଜ୍ଜ୍ୟନୀୟ ଘଟଣା ସମୟରେ ମୋର ଦୁଇ ପିଲା ବି ଘଟଣାସ୍ଥଳରେ ଉପସ୍ଥିତ ଥିଲେ। ସେମା‌ନଙ୍କ ଉପରେ ଏହି ଘଟଣାକୁ ନେଇ କ’ଣ ଯେ ବିତିଥିବା ତାହା ମୁଁ କଳ୍ପନା ବି କରି ପାରୁନାହିଁ।’