ବେଆଇନ ଲଘୁ ଖଣିଜଦ୍ରବ୍ୟ ଚାଲାଣ: ୧୦ ମାସରେ ୨ କୋଟି ଟଙ୍କା ଜୋରିମାନା ଆଦାୟ
ଖୋର୍ଦ୍ଧା: ଗତ ୧୦ ମାସ ମଧ୍ୟରେ ଖୋର୍ଦ୍ଧା ଉପଖଣ୍ଡରୁ ବେଆଇନ ଭାବେ ଲଘୁ ଖଣିଜ ଦ୍ରବ୍ୟ ଚାଲାଣ କରୁଥିବା ଗାଡ଼ି ଉପରେ ଚଢ଼ଉ କରାଯାଇ ୨ କୋଟି ଟଙ୍କା ଜୋରିମାନା ଆଦାୟ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଖୋର୍ଦ୍ଧା ଉପଜିଲ୍ଲାପାଳଙ୍କ କାର୍ଯ୍ୟାଳୟରୁ ମିଳିଥିବା ସୂଚନାନୁସାରେ, ଲଘୁ ଖଣିଜ ଦ୍ରବ୍ୟ ଚୋରା ଚାଲାଣ ଉପରେ ଖୋର୍ଦ୍ଧା ଉପଖଣ୍ଡର ବିଭିନ୍ନ ତହସିଲରେ ୨୦୨୦ ଅପ୍ରିଲ୍ ୧ ତାରିଖରୁ ବିଭିନ୍ନ ସ୍ଥାନରେ ଚଢ଼ଉ ଜାରି ରହିଛି ।
ବର୍ତମାନ ସୁଦ୍ଧା ୧କୋଟି ୯୬ଲକ୍ଷ ୧୮ ହଜାର ଟଙ୍କା ଆଦାୟ ହୋଇଛି । ୧୯ ତାରିଖରେ ଚଢ଼ଉ କରାଯାଇ ଖୋର୍ଦ୍ଧା ଉପଖଣ୍ଡରୁ ୨ଲକ୍ଷ ୧୫ ହଜାର ଟଙ୍କା ଆଦାୟ ହୋଇଥିଲା । ଏହା ମଧ୍ୟରୁ ଖୋର୍ଦ୍ଧା ତହସିଲରୁ ୧ଲକ୍ଷ ୫୦ହଜାର ଟଙ୍କା, ଟାଙ୍ଗୀ ତହସିଲରୁ ୩୦ହଜାର ଟଙ୍କା, ବୋଲଗଡ଼ ତହସିଲରୁ ୨୫ହଜାର ଟଙ୍କା ଓ ବାଣପୁର ତହସିଲରୁ ୧୦ହଜାର ଟଙ୍କା ଜୋରିମାନା ଆଦାୟ କରାଯାଇଛି ।
ବର୍ତମାନ ସୁଦ୍ଧା ଖୋର୍ଦ୍ଧା ତହସିଲରୁ ସର୍ବାଧିକ ୬୩ ଲକ୍ଷ ୫୨ ହଜାର ୫୦୦ଟଙ୍କା ଆଦାୟ ହୋଇଥିବା ବେଳେ ଟାଙ୍ଗୀରୁ ୪୮ଲକ୍ଷ ୪୩ହଜାର ୨୯୦ଟଙ୍କା, ବେଗୁନିଆରୁ ୩୭ଲକ୍ଷ୪୯ହଜାର ଟଙ୍କା, ବାଣପୁରରୁ ୨୦ଲକ୍ଷ୭୮ ହଜାର ୨୮୦ଟଙ୍କା, ବୋଲଗଡ଼ରୁ ୧୩ଲକ୍ଷ ୫ ହଜାର ୨୯୮ଟଙ୍କା, ଚିଲିକାରୁ ୧୦ଲକ୍ଷ ୭୫ହଜାର ୫୬୦ଟଙ୍କା ଆଦାୟ ହୋଇଛି । ବର୍ତମାନ ଜୋରିମାନା ଆଦାୟ କରିବାକୁ ବେଗୁନିଆ ଓ ଖୋର୍ଦ୍ଧାରେ ଇଲେକ୍ଟ୍ରୋନିକ୍ -ଅନ୍ଲାଇନ୍ ମାଧ୍ୟମ କାର୍ଯ୍ୟକାରୀ ହୋଇଥିବା ବେଳେ ଅନ୍ୟ ତହସିଲରେ ଖୁବ୍ ଶୀଘ୍ର ଏହା ଆରମ୍ଭ ହେବ ବୋଲି ଉପଜିଲ୍ଲାପାଳ ଅଶୋକ ବେଉରିଆ କହିଛନ୍ତି ।