ନୂଆପଡ଼ାରୁ ପୁଣି ୧୨ ଜଣ ଯୁବକ କରୋନା ପଜିଟିଭ ଚିହ୍ନଟ, ଜିଲ୍ଲାରେ ସଂଖ୍ୟା ହେଲା ୨୬
ନୂଆପଡ଼ା: ନୂଆପଡ଼ା ଜିଲ୍ଲାରେ ଆଜି ପୁଣି ୧୨ ଜଣ ଯୁବକ କରୋନା ପଜିଟିଭ ଚିହ୍ନଟ ହୋଇଛନ୍ତି । ସାମ୍ବାଦିକ ସମ୍ମିଳନୀରେ ଜିଲ୍ଲାପାଳ ମଧୁସ୍ମିତା ସାହୁ ଏହି ସୂଚନା ଦେଇଛନ୍ତି । ଜିଲ୍ଲାପାଳ କହିଛନ୍ତି, ୧୨ ଜଣଙ୍କ ମଧ୍ୟରୁ ୧୧ ଜଣ ନିକଟରେ ମୁମ୍ବାଇରେ ଫେରିଥିଲେ । ସେହିପରି ଅନ୍ୟ ଜଣେ ବ୍ୟକ୍ତି ହାଇଦ୍ରାବାଦରୁ ଫେରି କ୍ୱାରେଣ୍ଟଇନ ସେଣ୍ଟରରେ ଥିଲେ । ଏମାନେ ସମସ୍ତେ ପୁରୁଷ ଓ ସେମାନଙ୍କର ବୟସ ୧୮ରୁ ୩୦ ବର୍ଷ ମଧ୍ୟରେ ହେବ । ସେ କହିଛନ୍ତି, ନୂଆ ଚିହ୍ନଟ ୪ ଜଣ ବ୍ୟକ୍ତିଙ୍କ ଠାରେ କରୋନା ଲକ୍ଷଣ ଥିବା ବେଳେ ଅନ୍ୟ ୮ ଜଣ ବ୍ୟକ୍ତିଙ୍କ ଠାରେ କରୋନାର କୌଣସି ଲକ୍ଷଣ ଦେଖାଯାଇ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲାପାଳ ଶ୍ରୀମତୀ ସାହୁ କହିଛନ୍ତି, ସିନାପାଲି ବ୍ଲକର ନିର୍ଜି ଟିଏମସିରୁ ଜଣେ, ଗଣ୍ଡାବେହେଲି ଟିଏମସିରୁ ଜଣେ, ଉଚ୍ଚାଗୁଡ଼ା ଟିଏମସିରୁ ଜଣେ, ବୋଡେନ ବ୍ଲକର ଯୁକ୍ତ ତିନି କଲେଜ ଟିଏମସିରୁ ଜଣେ, ବୋର୍ଡେନ ହାଇସ୍କୁଲର ଟିଏମସିରୁ ୨ ଜଣ, ଖଡ଼ିଆଲ ବ୍ଲକର ଦୋହେଲପଡ଼ା ଟିଏମସିରୁ ୪ ଜଣ, ନୂଆପଡ଼ା ସରକାରୀ ବିଜ୍ଞାନ କଲେଜର ଟିଏମସିରୁ ଜଣେ ଓ ନୂଆପଡ଼ାସ୍ଥିତ ଅନ୍ୱେଷା ହଷ୍ଟେଲ ଟିଏମସିରୁ ଜଣେ କରୋନ ପଜିଟିଭ ଚିହ୍ନଟ ହୋଇଛନ୍ତି । ଏହିସବୁ ସ୍ଥାନଗୁଡ଼ିକୁ ସିଲ କରାଯାଇଛି ।
ସୂଚନାଯୋଗ୍ୟ, ନୂଆପଡ଼ାରେ ଏପର୍ଯ୍ୟନ୍ତ ୨୬ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ପୂର୍ବରୁ ୧୨ ଜଣ ପଜିଟିଭ ଚିହ୍ନଟ ହୋଇଥିଲେ । ଜିଲ୍ଲାକୁ ବାହାର ରାଜ୍ୟରୁ ପ୍ରବାସୀମାନଙ୍କର ଆଗମନ ଜାରି ରହିଥିବାରୁ ଆଗାମୀ ଦିନରେ ଆହୁରି କରୋନା ପଜିଟିଭ ଚିହ୍ନଟ ହେବାର ଆଶଙ୍କା ରହିଛି ।