ଦୁଇଟି ଭିନ୍ନ ଚୋରି ମାମଲାରେ ୨ ଅଭିଯୁକ୍ତ ଗିରଫ, ଅଳଙ୍କାର ଓ ଟଙ୍କା ଜବତ

ଜୟପୁର: ଜୟପୁର ଟାଉନଥାନା ଅର୍ନ୍ତଗତ ଭୁପତ୍ତି ସାହିରେ ଜଣେ ବ୍ୟକ୍ତିଙ୍କ ଘରେ ପଶି ସୁନା ଅଳଙ୍କାର ଓ ଟଙ୍କା ଲୁଟ ମାମଲାରେ ପୁଲିସକୁ ମିଳିଛି ସଫଳତା। ମିଳିଥିବା ସୂଚନା ଅନୁଯାୟୀ, ଗତ କିଛି ଦିନ ତଳେ ଭୁପତ୍ତିସାହିର ଜଣେ ବ୍ୟକ୍ତି ଘରୁ ନିଜ ପତ୍ନୀଙ୍କୁ ନେଇ ବାହାରକୁ ଯାଇଥିଲେ। ଏହି ସମୟରେ ଘରେ ସେମାନେ ସୁନା ଅଳଙ୍କାର ଓ ଟଙ୍କା ଭୁଲିକି ଛାଡ଼ି ପଳାଇଥିଲେ। ପୁଣି ଘରକୁ ଫେରି ଆସି ଦେଖିବା ବେଳେ ସୁନା ଅଳଙ୍କାର ଓ ଟଙ୍କା ବାକ୍ସ ନଥିଲା। ଏ ନେଇ ଏହି ପରିବାରବର୍ଗ ଜୟପୁର ଟାଉନଥାନାରେ ଏତଲା ଦେଇଥିଲେ। ଟାଉନଥାନା ଅଧିକାରୀ ସମ୍ବିତ ବେହେରା, ସବଇନିସପେକ୍ଟର ସିଦ୍ଧାର୍ଥ ବେହେରା ଘଟଣାର ତଦନ୍ତ ଆରମ୍ଭ କରିଥିଲେ।

ଏହି ମାମଲାରେ ଟାଉନପୁଲିସ ଅଭିଯୁକ୍ତ ଅବିନାଶ ମହାନ୍ତିଙ୍କୁ ଗିରଫ କରି ତାଙ୍କ ନିକଟରୁ ସୁନା ଅଳଙ୍କାର ଓ ୩୦ହଜାର ଟଙ୍କା ଜବତ କରି କୋର୍ଟକୁ ଚାଲାଣ କରିଛନ୍ତି। ସେହିପରି ଅନ୍ୟ ଏକ ଘଟଣାରେ ସୌରାସାହିରେ ଭୋର ସମୟରେ ଘର ବାରଣ୍ଡାରେ ଝାଡୁ କରୁଥିବାବେଳେ ଜଣେ ମହିଳାଙ୍କ ବେକରୁ ବାଇକରେ ଆସି ଜଣେ ଯୁବକ ସୁନା ଚେନ୍ ଝାମ୍ପି ନେଇ ଯାଇଥିଲେ। ଏହି ମାମଲାରେ ଜୟପୁର ଟାଉନପୁଲିସକୁ ମିଳିଛି ସଫଳତା। ଏହି ମାମଲାରେ ଅଭିଯୁକ୍ତ ପୁଲିସ ସିନେମା ସାହିର ସୁରେଶ ମୁଦୁଲିଙ୍କୁ ଗିରଫ କରି ତା ନିକଟରୁ ଲୁଟ୍ ସୁନା ଅଳଙ୍କାର ଉଦ୍ଧାର କରିଛି। ଅଭିଯୁକ୍ତ ସୁରେଶକୁ କୋର୍ଟକୁ ଚାଲାଣ କରିଥିବା କହିଛନ୍ତି ଟାଉନଥାନା ଅଧିକାରୀ ସମ୍ବିତ ବେହେରା।