ଦାଦନ ଖଟିବାକୁ ଯିବାବେଳେ ବସ ଦୁର୍ଘଟଣା, ଗୋଟିଏ ପରିବାରର ୨ ଶିଶୁ ଆଖିବୁଜିଲେ
ତେନ୍ତୁଳିଖୁଣ୍ଟି : ଦାଦନ ଖଟିବାକୁ ବିଜୟୱାଡା ଯାଉଥିବା ସମୟରେ ବସ ଦୁର୍ଘଟଣାରେ ଗୋଟିଏ ପରିବାର ଦୁଇଜଣ ଶିଶୁ ମୃତ୍ୟୁବରଣ କରିଥିବା ସୂଚନା ମିଳିଛି । ଏହି ଦୁର୍ଘଟଣାରେ ମୃତ ଶିଶୁଙ୍କ ପିତାମାତା ଆହତ ହୋଇ ଆନ୍ଧ୍ରପ୍ରଦେଶର ଭଦ୍ରାଞ୍ଚଳମ ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡିଛି । ମୃତ ଦୁଇ ଶିଶୁ ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ ଲମତାଗୁଡା ପଂଚାୟତ ଅନ୍ତର୍ଗତ କହେଁଇମୁଣ୍ଡା ଗ୍ରାମର ବୋଲି ଜଣାପଡିଛି । ଏହି ଖବର ପ୍ରଚାରିତ ହେବା ପରେ କହେଁଇମୁଣ୍ଡା ଗ୍ରାମରେ ଶୋକର ଛାୟା ଖେଳିଯାଇଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ କହେଁଇମୁଣ୍ଡା ଗ୍ରାମର ଲକ୍ଷ୍ମଣ ହରିଜନ (୩୦) ବହୁ ବର୍ଷ ଧରି ବାହାର ରାଜ୍ୟରେ ଦାଦନ ଖଟି ପରିବାର ପ୍ରତିପୋଷଣ କରନ୍ତି । ଲକ୍ଷ୍ମଣ କିଛି ମାସ ବ୍ୟବଧାନରେ ନିଜ ଗାଁ କହେଁଇମୁଣ୍ଡା ଆସି ପରିବାର ସହ ସମୟ ବିତାଇ ପୁଣି ଦାଦନ ଖଟିବାକୁ ଯାଇଥାନ୍ତି । ତେବେ ଲକ୍ଷ୍ମଣ ଏକ ସପ୍ତାହ ପୂର୍ବରୁ ନିଜ ଗ୍ରାମ କହେଁଇମୁଣ୍ଡାକୁ ଆସିଥିଲେ । ପ୍ରଥମ ଥର ପାଇଁ ନିଜ ପତ୍ନୀ ସୁକାନ୍ତିଙ୍କ ସମେତ ପୁଅ ଜିତୁ (୫) ଏବଂ ଝିଅ ସୁନୈନା(୨) ଙ୍କୁ ନେଇଁ ବିଜୟୱାଡା ଅଭିମୁଖେ ଏକ ଘରୋଇ ବସରେ ଯାତ୍ରା କରୁଥିଲେ । ତେବେ ଆଜି ଭୋର ୪ଟା ସମୟରେ ମୋଟୁ ଠାରୁ ୨୦ କିଲୋମିଟର ଦୂର ବୁଦୁଗୁଡ଼ୁମ ନିକଟରେ ବସଟି ଦୁର୍ଘଟଣା ଗ୍ରସ୍ତ ହୋଇଥିଲା। ଏଥିରେ ପାଞ୍ଚ ଜଣଙ୍କ ମୃତ୍ୟୁ ବରଣ ହୋଇଥୁବା ସୂଚନା ମିଳିଛି । ସେହିପରି ଦୁର୍ଘଟଣା ରେ ୬ ଜଣ ଗୁରୁତର ହୋଇ ଭଦ୍ରାଚଳମ ଡାକ୍ତରଖାନା ଚିକିତ୍ସା ହେଉଥୁବା ତଥ୍ୟ ହସ୍ତଗତ ହୋଇଛି ! ଏହି ଖବର ଶୁଣି କହେଁଇମୁଣ୍ଡା ଗ୍ରାମରେ ଶୋକର ଛାୟା ଖେଳିଯାଇଛି ।