ଟ୍ରକ-ପଲସର ମୁହାଁମୁହିଁ ଧକ୍କା, ୨ ଗୁରୁତର

ଖୋର୍ଦ୍ଧା : ଆଜି ରାତି ପ୍ରାୟ ୯ଟା ବେଳେ ଖୋର୍ଦ୍ଧା ଉପକଣ୍ଠ ଜୟମଙ୍ଗଳ ଠାରେ ଏକ ସଡ଼କ ଦୁର୍ଘଟଣାରେ ଦୁଇଜଣ ଗୁରୁତର ଆହତ ହୋଇ ଖୋର୍ଦ୍ଧା ଜିଲ୍ଲା ଚିକିତ୍ସାଳୟରେ ଭର୍ତି ହୋଇଛନ୍ତି । ଦୁଇଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କ ପରିଚୟ ଠାବ କରାଯାଇପାରିନାହିଁ ।

ସୂଚନାନୁସାରେ, ୫୭ ନମ୍ବର ଜାତୀୟ ରାଜପଥରେ ରାତି ପ୍ରାୟ ୯ଟା ବେଳେ ଏକ ପଲସର ମୋଟର ସାଇକଲରେ(ଓଡି୦୨ୟୁ ୪୭୬୨)ରେ ଦୁଇଜଣ ଯୁବକ ଖୋର୍ଦ୍ଧାରୁ ବେଗୁନିଆ ଯାଉଥିଲେ । ଏହି ସମୟରେ ବିପରୀତ ଦିଗରୁ ଆସୁଥିବା ଏକ ଦ୍ରୁତଗାମୀ ଟ୍ରକ୍ ସେମାନଙ୍କୁ ଧକ୍କା ଦେଇ ଚାଲିଯାଇଥିଲା । ଘଟଣାସ୍ଥଳରୁ ମୁମୂର୍ଷୁ ଅବସ୍ଥାରେ ସ୍ଥାନୀୟ ଲୋକ ଉଦ୍ଧାର କରି ଆମ୍ବୁଲାନ୍ସକୁ ସୂଚନା ଦେଇଥିଲେ । ଆମ୍ବୁଲାନ୍ସରେ ସେମାନଙ୍କୁ ଜିଲ୍ଲା ଚିକିତ୍ସାଳୟ ଅଣାଯାଇଛି । ଉଭୟ ଯୁବକଙ୍କ ଘର ବେଗୁନିଆ ବୋଲି ଜଣାପଡ଼ିଥିଲେ ମଧ୍ୟ ଉଭୟ ଅଚେତ ଥିବାରୁ ଓ ସେମାନଙ୍କ ନିକଟରୁ କୌଣସି ପରିଚୟପତ୍ର ମିଳିନଥିବାରୁ ସବିଶେଷ ଠିକଣା ଜଣାପଡ଼ିନାହିଁ । ଖବର ଲେଖାଯିବା ବେଳକୁ ଘଟଣାସ୍ଥଳରେ ବର୍ତମାନ ସୁଦ୍ଧା ପୁଲିସ ପହଂଚିନାହିଁ ।
ସୂଚନାଯୋଗ୍ୟ, ୪ ତାରିଖ ଭୋରରେ ସେହି ତରତୁଆ- ଜୟମଙ୍ଗଳ ରାସ୍ତାରେ ଏକ ଟ୍ରକ୍ ରାସ୍ତା ଉପରେ ଶୋଇଥିବା ଗାଈଙ୍କୁ ଧକ୍କା ଦେଇ ଚାଲିଯାଇଥିଲା । ଏଥିରେ ୪ଟି ଗାଈଙ୍କ ମୃତ୍ୟୁ ଘଟିଥିଲା । ଏହି ରାସ୍ତାରେ ନିୟମିତ ଭାବେ ଦୁର୍ଘଟଣା ଘଟୁଥିବା ଓ ଏନେଇ ପୁଲିସ ପ୍ରଶାସନ ପକ୍ଷରୁ କୌଣସି ବ୍ୟବସ୍ଥା ଗ୍ରହଣ କରାଯାଉନଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି ।