ସମ୍ବଲପୁର: ସଦର ଥାନା ପୁଲିସ ଓ ସ୍ପୋଶାଲ ସ୍କାର୍ଡର ଏକ ଟିମ ଆଜି ସଦର ଥାନା ଅଂଚଳରୁ ୨୩୦୯ ବୋତଲ କୋରେକ୍ସ କଫସିରଫ, ୫ ଲିଟର ଅପମିଶ୍ରିତ କୋରେକ୍ସ ଓ ୫୦ଟି ନାଇଟ୍ରୋସନ ଟାବଲେଟ ଜବତ କରିଛି । ଏହି ଘଟଣାରେ ପୁଲିସ ୩ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି । ଏହି ଅଂଚଳରେ ଦୀର୍ଘଦିନ ଧରି କୋରେକ୍ସ ବେପାର ଚାଲିଥିବା ନେଇ ଗୁଇନ୍ଦା ବିଭାଗ ପକ୍ଷରୁ ଖବର ମିିଳବା ପରେ ଚଢ଼ାଉ କରିଥିଲା । ପ୍ରଥମେ ଠେମରା ଗ୍ରାମର ସୁବ୍ରତ ବଢ଼େଇକୁ ପୁଲିସ ଧରିବା ସହ ତାଙ୍କ ଘର ଯାଞ୍ଚ କରିବା ପରେ ସେଠାରୁ କେରାକ୍ସ ଜବତ କରିଥିଲା । ଏହି ଘଟଣା ସହ ଜଡ଼ିତ ରୋଶନ ମିଶ୍ର ନାମକ ଜଣେ ଅନ୍ୟତମ ଅଭିଯୁକ୍ତ ଫେରାର ହୋଇଯାଇଥିଲା । କିନ୍ତୁ ପୁଲିସ ରୋଶନକୁ ଶାସନ ଥାନା ଅଂଚଳରୁ ଗିରଫ କରିବା ପରେ ତା ଘର ଓ ଏକ ସାର ଦୋକାନରେ ଚଢ଼ାଉ କରିଥିଲା । କୋରେକ୍ସ ଆଣିବାରେ ସାହାଯ୍ୟ କରୁଥିବା ଶାସନ ଥାନା ପରମାଣପୁର ଗ୍ରାମର ବଳରାମ ଦୀପକୁ ମଧ୍ୟ ପୁଲିସ ଗିରଫ କରିଛି ।
Sambad is now on WhatsApp
Join and get latest news updates delivered to you via WhatsApp
ସମ୍ବଲପୁରରେ ବର୍ଦ୍ଧିତ କାରବାରକୁ ନେଇ ଦୁଇ ଦିନ ତଳେ ସମ୍ବାଦରେ ଖବର ପ୍ରକାଶ ପାଇବା ପରେ ପୁଲିସର ତତ୍ପରତା ପ୍ରକାଶ ପାଇଛି । ପୁଲିସ ଆଜି ଅତର୍କିତ ଭାବେ ଚଢ଼ାଉ କରିବା ସହ ଏକ ବଡ଼ ଧରଣର ରାକେଟକୁ ଧରିବାରେ ସଫଳ ହୋଇଛି ।
ତେବେ ମୁଖ୍ୟ ଅଭିଯୁକ୍ତ ରୋଶନ ଓ ସୁବ୍ରତ ବରଗଡ଼ ଜିଲ୍ଲାରୁ କୋରେକ୍ସ ଆଣି ସମଗ୍ର ସହରରେ ବ୍ୟବସାୟ କରୁଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି । ସୂଚନାଯୋଗ୍ୟ, ଚଳିତ ମାସ ପ୍ରଥମ ସପ୍ତାହରେ ବୁର୍ଲା ଅଂଚଳରେ ଜଣେ ବ୍ୟକ୍ତିଙ୍କ ଘରେ ବିପୁଳ ପରିମାଣର କୋରେକ୍ସ ଥିବା ସୂଚନା ନେଇ ଖୋଦ ଜିଲ୍ଲାପାଳଙ୍କ ନିର୍ଦ୍ଦେଶରେ ଏକ ଟିମ ଚଢ଼ାଉ କରିଥିଲା । ଏହି ଘଟଣାରେ ଡ୍ରଗସ ଇନ୍ସପେକ୍ଟର ଜଣେ ବ୍ୟକ୍ତିଙ୍କର ଠାକୁର ଘରୁ ଏକ ହଜାରରୁ ଅଧିକ ବୋତଲ କୋରେକ୍ସ ଜବତ କରିଥିଲା ।