ଶ୍ମଶାନ ରାସ୍ତା ଅବରୋଧକୁ ନେଇ ଉତ୍ତେଜନା, ୩୨୬ ନଂ ଜାତୀୟ ରାଜପଥ ଅବରୋଧ
ରାୟଗଡ଼ା: ଶ୍ମଶାନ ରାସ୍ତା ଅବରୋଧକୁ ନେଇ ରାୟଗଡ଼ା-ଜେକେପୁର ରାସ୍ତାର ଖଲିଗୁଡ଼ାରେ ଉତ୍ତେଜନା ପ୍ରକାଶ ପାଇଛି। ଗ୍ରାମବାସୀ ୩୨୬ ନଂ ଜାତୀୟ ରାଜପଥ ଅବରୋଧ କରିବା ସହ ମୃତଦେହ ରଖି ଧାରଣାରେ ବସିଛନ୍ତି। ପ୍ରଶାସନର ବୁଝାସୁଝା ସତ୍ତ୍ବେ ସ୍ଥାୟୀ ସମାଧାନ ନ ହେବା ପର୍ଯ୍ୟନ୍ତ ରାସ୍ତାରୋକ ହଟିବ ନାହିଁ ବୋଲି ଗ୍ରାମବାସୀ ଅଡ଼ି ବସିଛନ୍ତି। ଫଳରେ ଅପରାହଣ୍ ୩ଟା ୪୫ ମିନିଟରୁ ଜାତୀୟ ରାଜପଥର ଗାଡ଼ି ଚଳାଚଳ ବ୍ୟାହତ ହୋଇଛି। ରାୟଗଡ଼ା ବ୍ଲକ୍ କୋତପେଟା ପଞ୍ଚାୟତ ଖଲିଗୁଡ଼ାବାସୀ ଗ୍ରାମ ନିକଟରେ ଥିବା ଏକ ବେସରକାରୀ ଜମିକୁ ୨୦ ବର୍ଷ ହେଲା ଶ୍ମଶାନ ଭାବେ ବ୍ୟବହାର କରି ଆସୁଥିଲେ। ଗତ କିଛି ମାସ ତଳେ ଜମି ମାଲିକ ଅନ୍ୟ ଜଣେ ବ୍ୟବସାୟୀକୁ ଉକ୍ତ ଜମି ବିକ୍ରି କରି ଦେବା ପରେ କପା ଚାଷ ପାଇଁ ନୂତନ ମାଲିକ ଶ୍ମଶାନ ରାସ୍ତାକୁ ବନ୍ଦ କରି ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ବାଉଁଶ ଓ ଅନ୍ୟାନ୍ୟ କାଠ ସାମଗ୍ରୀ ସାହାର୍ଯ୍ୟରେ ଉକ୍ତ ରାସ୍ତାକୁ ଜମି ମାଲିକ ବନ୍ଦ କରିଦେବା ପରେ ଗ୍ରାମବାସୀ ଶେଷକୃତ୍ୟ ପାଇଁ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଏ ନେଇ ଗ୍ରାମବାସୀ ପଞ୍ଚାୟତ ଓ ବ୍ଲକ୍ କର୍ତ୍ତୃପକ୍ଷଙ୍କୁ ଲିଖିତ ଭାବେ ଅଭିଯୋଗ କରିଛନ୍ତି। ୨/୩ଟି ବୈଠକ ମଧ୍ୟ ଗ୍ରାମବାସୀ ଓ ପ୍ରଶାସନ ମଧ୍ୟରେ ବସିଥିଲେ ସୁଦ୍ଧା ଉକ୍ତ ଜମି ପଟ୍ଟାଧାରୀ ବ୍ୟକ୍ତିଙ୍କ ନାଁରେ ଥିବାରୁ ସମାଧାନର ରାସ୍ତା ବାହାରି ପାରୁନି। ଏପରି ସ୍ଥିତିରେ ଆଜି ଗାଁର ଏନ୍. ବାବି (୧୭) ନାମକ ଜଣେ ଯୁବକର ଅକାଳ ବିୟୋଗ ହେବା ପରେ ଶେଷକୃତ୍ୟ ପାଇଁ ଚିନ୍ତାରେ ପଡ଼ିଥିଲେ ଗ୍ରାମବାସୀ। ଗାଁ ପାଖରେ ଅନ୍ୟ କୌଣସି ଖୋଲା ପଡ଼ିଆ ନଥିବାରୁ ଅପରାହଣରେ ମୃତଦେହକୁ ରାସ୍ତା ଉପରେ ରଖି ଗ୍ରାମବାସୀ ୩୨୬ ନଂ ଜାତୀୟ ରାଜପଥ ଅବରୋଧ କରିଥିଲେ।
ଖବର ପାଇ ଚାନ୍ଦିଲି ଥାନା ଅଧିକାରୀ ବିଜୟଲକ୍ଷ୍ମୀ ହିକକା ସଦଳବଳେ ଘଟଣାସ୍ଥଳରେ ପହଞ୍ଚି ଲୋକଙ୍କୁ ରାସ୍ତାରୁ ହଟିଯିବା ପାଇଁ ବୁଝାଶୁଝା କରିଥିଲେ। ହେଲେ ସ୍ଥାୟୀ ସମାଧାନ ଲାଗି ପ୍ରଶାସନ ପକ୍ଷରୁ ଲିଖିତ ପ୍ରତିଶ୍ରୁତି ନ ମିଳିଲେ ରାସ୍ତାରୋକ ହଟିବ ନାହିଁ ବୋଲି ଗ୍ରାମବାସୀ ଜିଦରେ ଅଟଳ ରହିବା ପରେ ରାୟଗଡ଼ା ଏସଡିପିଓ ଦିବ୍ୟଜ୍ୟୋତି ଦାଶ, ଅତିରିକ୍ତ ତହସିଲଦାର ସୁନୀଲ କୁମାର ଖରା ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କରିଛନ୍ତି। ଗ୍ରାମବାସୀ ଏସଡିପିଓ ଏବଂ ଅତିରିକ୍ତ ତହସିଲଦାରଙ୍କୁ ପୂର୍ବ ଶ୍ମଶାନ ସ୍ଥାନକୁ ନେଇ ଜାଗା ଚିହ୍ନଟ କରିବା ପାଇଁ ଦାବି କରିଛନ୍ତି। ଉଭୟ ଅଧିକାରୀ ସମାଧାନର ରାସ୍ତା ବାହାର କରିବାକୁ ଉଦ୍ୟମ ଜାରି ରଖିଛନ୍ତି। ୩ ଘଣ୍ଟା ଧରି ଜାତୀୟ ରାଜପଥ ଅବରୋଧ ଯୋଗୁ ଜେକେପୁର ଦେଇ ରାୟଗଡ଼ାରୁ ବ୍ରହ୍ମପୁର, ଭୁବନେଶ୍ବର, ବିଷମକଟକ, ଗୁଣପୁର ଏବଂ ଅନ୍ୟ ସ୍ଥାନକୁ ଗାଡ଼ି ଚଳାଚଳ ବ୍ୟାହତ ହୋଇଛି। ଦୂରଗାମୀ ଯାନବାହନ ସମେତ ମାଲବାହୀ ଗାଡ଼ିଗୁଡ଼ିକ ରାସ୍ତାର ଉଭୟ ପାର୍ଶ୍ବରେ ଅଟକି ରହିଛନ୍ତି।