କରୋନା ଚିକିତ୍ସା ଲାଗି ଗଂଜାମରେ ପ୍ଲାଜମା ଦାନ କରିବେ ୨୦୫ ଜଣ
ଆଜି ଗଂଜାମ ଜିଲ୍ଲାରେ ୨ ମହିଳାଙ୍କ ସମେତ ୭ ମୃତ୍ୟୁ
ବ୍ରହ୍ମପୁର: କରୋନା ଚିକତ୍ସାରେ ପ୍ଲାଜମା ଥେରାପି ଚିକିତ୍ସାକୁ ଓଡ଼ିଶାରେ ଗୁରୁତ୍ୱ ଦିଆଯାଉଛି । ରାଜ୍ୟ ସରକାର ଏଦିଗରେ କାମ କରୁଛନ୍ତି । ରାଜ୍ୟରେ ଏବେ ପ୍ଲାଜମା ବ୍ୟାଙ୍କ ଆରମ୍ଭ ହେବା ପରେ କୋଭିଡ-ଯୁଦ୍ଧରେ ବିଜୟୀ ହୋଇଥିବା ଯୋଦ୍ଧାମାନେ ପ୍ଲାଜମା ଦାନ କରିବାକୁ ଆଗେଇ ଆସିଛନ୍ତି । ଗଂଜାମ ଜିଲ୍ଲାରେ ଏପର୍ଯ୍ୟନ୍ତ ୨୦୫ ଜଣ ଲୋକ ପ୍ଲାଜମା ଦାନ କରିବାକୁ ଆଗ୍ରହ ପ୍ରକାଶ କରିଛନ୍ତି । ଗ୍ରାମାଂଚଳରେ ୧୫୫ ଜଣ ଓ ସହରାଂଚଳରେ ୫୦ ଜଣ ପ୍ଲାଜମା ଦାନ କରିବାକୁ ଆଗ୍ରହ ପ୍ରକାଶ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କରୋନା ଭାଇରସ ଯୋଗୁଁ ସମଗ୍ର ରାଜ୍ୟବାସୀଙ୍କ ମନରେ ଆଶଙ୍କା ସୃଷ୍ଟି ହୋଇଥିବା ବେଳେ ଗଂଜାମରେ ଏହି ମହାମାରୀ ଅଧିକ ବ୍ୟାପିବାରେ ଲାଗିଛି । ଆଜି ଗଂଜାମ ଜିଲ୍ଲାରେ ୪୮୪ ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି । ଏଥି ସହିତ ଜିଲ୍ଲାରେ ମୋଟ ୮୬୭୮ ଜଣ କରୋନା ଆକ୍ରାନ୍ତ ଥିବା ଜଣାପଡ଼ିଛନ୍ତି । ଏଥିରୁ ୫୪୦୪ ଜଣ ସୁସ୍ଥ ହୋଇଥିବା ବେଳେ ୩୧୯୫ ଜଣ ସକ୍ରିୟ ଆକ୍ରାନ୍ତ ଅଛନ୍ତି । କିନ୍ତୁ ଦୁଃଖର ବିଷୟ ଯେ, ଏପର୍ଯ୍ୟନ୍ତ ଗଂଜାମ ଜିଲ୍ଲାରୁ ୭୯ ଜଣ କରୋନା ଆକ୍ରାନ୍ତଙ୍କର ମୃତ୍ୟୁ ହୋଇସାରିଛି ।
ଆଜି ଗଂଜାମ ଜିଲ୍ଲାରେ କରୋନା ଭାଇରସ ଲାଗି ୨ ମହିଳାଙ୍କ ସମେତ ୭ ଜଣଙ୍କର ମୃତ୍ୟୁ ହୋଇଛି । ଗୋଟିଏ ଦିନରେ ଏବଂ ଗୋଟିଏ ଜିଲ୍ଲାରୁ ଏହା ସର୍ବାଧିକ ମୃତ୍ୟୁ । ମହିଳାମାନଙ୍କ ମଧ୍ୟରୁ ଜଣେ ଗର୍ଭବତୀ ବୋଲି ଜଣାପଡ଼ିଛି । କିନ୍ତୁ ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି ଯେ, ଗର୍ଭବତୀ ମହିଳାଜଣକ ଅଣକୋଭିଡରେ ମୃତ୍ୟୁ ହୋଇଛି ।