ଢେଙ୍କାନାଳରେ ୬ ଲୁଟେରା ଗିରଫ
ଢେଙ୍କାନାଳ : ସହରର କଂଟାନାଳୀ ବାଇପାସ୍ ନିକଟରେ ଥିବା ଜଣେ ବ୍ୟକ୍ତିଙ୍କ ଘରେ ୩ ଜଣ ଯୁବକ ପଶି ମାରଣାସ୍ତ୍ର ଦେଖାଇ ଟଙ୍କା ସୁନା ଲୁଟିନେଇଥିଲେ । ଏହି ଘଟଣାରେ ଟାଉନ୍ ଥାନା ପୁଲିସ୍ ୬ ଜଣ ଯୁବକଙ୍କୁ ଗିରଫ କରି କୋର୍ଟ ଚାଲାଣ କରିଛି ।
Sambad is now on WhatsApp
Join and get latest news updates delivered to you via WhatsApp
ପୁଲିସ୍ ସୂଚନା ଅନୁଯାୟୀ, ସହରର କଂଟାନାଳୀ ବାଇପାସ୍ ସ୍ଥିତ ଜଣେ ବ୍ୟକ୍ତିଙ୍କ ଘରେ ଗତ ୧୦ ତାରିଖ ରାତି ୮ଟା ୪୦ ମିନିଟ୍ ସମୟରେ ୩ ଜଣ ଯୁବକ ମୁହଁରେ ଗାମୁଛା ଘୋଡେଇ ହୋଇ ବିଭିନ୍ନ ମାରଣାସ୍ତ୍ର ସହ ପଶିଥିଲେ । ସଂପୃକ୍ତ ପରିବାରର ସଦସ୍ୟଙ୍କୁ ଭୟଭୀତ କରାଇ ସେମାନଙ୍କ ଠାରୁ ଦୁଇଟି ମୋବାଇଲ୍, ସୁନା ଚେନ୍, ସୁନା କାନଫୁଲ,ସୁନା ମୁଦି, ରୂପା ଅଳଙ୍କାର ଲୁଟି ନେଇଯାଇଥିଲେ । ସଂପୃକ୍ତ ପରିବାର ଅଭିଯୋଗ କ୍ରମେ ଟାଉନ୍ ଥାନାରେ ୨୩୬/୨୧ ଦଫା ୪୫୭/୩୯୨/୩୯୭ ଏବଂ ୩୪ ଆଇପିସି, ୨୭ ଆର୍ମସ୍ ଆକ୍ଟରେ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଥିଲା । ଏହି ଘଟଣାରେ ପୁଲିସ୍ ପ୍ରଥମେ ଦୁଇଜଣ ମୁଖ୍ୟ ଅଭିଯୁକ୍ତଙ୍କୁ ଧରିବା ସହ ସେମାନଙ୍କ ଠାରୁ ମାରଣାସ୍ତ୍ର ଏବଂ ଚୋରୀ ସମଗ୍ରୀ ଜବତ କରିଥିଲେ । ଅଭିଯୁକ୍ତମାନଙ୍କ ଠାରୁ ଚୋରୀ ସାମଗ୍ରୀ ରଖିଥିବା ଅଭିଯୋଗରେ ଅନ୍ୟ ୪ଜଣଙ୍କୁ ପୁଲିସ୍ ଗିରଫ କରିଛନ୍ତି । ଗିରଫ ଅଭିଯୁକ୍ତମାନଙ୍କ ଠାରୁ ୨ଟି ମୋବାଇଲ୍, ଏକ ସୁନା, ସୁନା କାନଫୁଲ ଏକହଳ, ସୁନା ମୁଦି ୧ଟା, ରୁପା ପାଉଁଜି ହଳେ, ଭୁଜାଲି ୧ଟା, ଛୁରୀ ୧ଟା ସହ ୭ହଜାର ୬୦୦ଟଙ୍କା ଜବତ କରାଯାଇଛି । ଗିରଫ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି ବୋଲି ଟାଉନ୍ ଥାନାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏସ୍ଡିପିଓ ବିକାଶ ବେହୁରା ସୂଚନା ଦେଇଛନ୍ତି । କାର୍ଯ୍ୟକ୍ରମରେ ଟାଉନ୍ ଥାନା ଅଧିକାରୀ ନମିତା ନାୟକ, ଏସ୍ଆଇ ଚନ୍ଦ୍ରକାନ୍ତ ସେଠୀ ଉପସ୍ଥିତ ଥିଲେ ।