ଭଦ୍ରକ : ରାତି ଅଧରେ ଘରେ ଲାଗିଲା ନିଆଁ, କିଛି ବୁଝିବା ଆଗରୁ ସବୁଯାକ ନିଆଁରେ ପୋଡି ପାଉଁଶ ହୋଇଗଲା ।  ଚାନ୍ଦବାଲି ବ୍ଲକ ଭାଟପଡ଼ା ଗ୍ରାମପଞ୍ଚାୟତ ଉଗ୍ରତରା ପତିସାହି ଗାଁରେ ଭୟାବହ ଅଗ୍ନିକାଣ୍ଡ ଘଟି ଦୁଇ ଭାଇଙ୍କ ୭ ବଖରା ଘର ପୋଡ଼ିଯାଇଛି । ଦୁଇ ଭାଇ ସୁକାନ୍ତ ଓ ସନ୍ତୋଷ ପତି  ସବୁଦିନ ପରି ଗତକାଲି  ରାତିରେ ଖାଇ ପିଇ ଶୋଇଥିଲେ । କିନ୍ତୁ ରାତି ଦୁଇଟାରେ  ଘରେ ନିଆଁ ଲାଗିଯାଇଥିବା ଜାଣିବାକୁ ପାଇଲେ । ପିଲାଛୁଆଙ୍କ ଧରି ଘରୁ ବାହାରକୁ  ବାହାରି ଆସିଥିଲେ । ଗାଁଲୋକଙ୍କୁ ଡାକ ପକାଇଥିଲେ । ଗାଁରେ ପୋଖରୀ ନଥିବାରୁ ନିଆଁ ଲିଭାଇବା ସମ୍ଭବ ହୋଇନଥିଲା ଦମକଳ ଆସିଲା ବେଳକୁ ସବୁକିଛି ଜଳିପୋଡ଼ି ପାଉଁଶ ହୋଇଗଲା । ଖଟ ପଲଙ୍କ ଟିଭି ଫ୍ରିଜ୍ ଟଙ୍କା ଧାନ ଚାଉଳ ସୁନାରୁପା, ବାସନ କୁସନ ସବୁକିଛି ଜଳି ପାଉଁଶ ହୋଇଯାଇଥିଲା । ଏତେ ଭୟଙ୍କର ଥିଲା ଯେ  ବିପନ୍ନ ପରିବାର ଖାଲି ପିନ୍ଧା ଲୁଗା ଛାଡିଦେଲେ ଅନ୍ୟ କିଛି ସାମଗ୍ରୀକୁ ରକ୍ଷା କରିପାରି ନଥିଲେ  ।