ଢେଙ୍କାନାଳରୁ ୭୧ ଲକ୍ଷ ଟଙ୍କାର ବ୍ରାଉନସୁଗାର ଜବତ

ଢେଙ୍କାନାଳ: ଆଜି ଢେଙ୍କାନାଳରେ ବିପୁଳ ପରିମାଣର ବ୍ରାଉନସୁଗାର ଜବତ କରାଯାଇଛି । ଦୁଇଟି ସ୍ଥାନରେ ଚଢ଼ାଉ କରାଯିବା ପରେ ୭୧୧ ଗ୍ରାମ ବ୍ରାଉନସୁଗାର ଜବତ ହୋଇଛି । ଢେଙ୍କାନାଳ ଟାଉନଥାନା ଅନ୍ତର୍ଗତ ତାରିଣୀନଗରରୁ ୬୮୫ ଗ୍ରାମ ବ୍ରାଉନସୁଗାର ଜବତ ହୋଇଥିବାବେଳେ ଭୁବନ ଗଁପୁର ବାଜିରାଉତ ମେମୋରିଆଲ କଲେଜ ନିକଟରୁ ୨୬ ଗ୍ରାମ ବ୍ରାଉନସୁଗାର ଜବତ ହୋଇଛି। ଏହି ଘଟଣାରେ ଦୁଇ ଅଭିଯୁକ୍ତ ରଞ୍ଜିତ ରାଉତ ଓରଫ କାଳିଆ ଏବଂ ପ୍ରଶାନ୍ତ ବେହେରାଙ୍କୁ ଗିରଫ କରାଯାଇଛି ।

ଟାଉନ ଥାନା ଅନ୍ତର୍ଗତ ତାରିଣୀ ନଗର ଅଞ୍ଚଳରେ ବ୍ରାଉନସୁଗାର ବ୍ୟବସାୟ କରୁଥିବା ରଞ୍ଜିତ ରାଉତଠାରୁ ଅଢେଇ ଲକ୍ଷ ଟଙ୍କା ଓ ଏକ ବୁଲେଟ ଜବତ କରାଯାଇଛି। ଭୁବନ ଅଞ୍ଚଳର ବେପାରୀ ପ୍ରଶାନ୍ତ ବେହେରା ଭଦ୍ରକର ନରିପୁର ଅଞ୍ଚଳର ବ୍ରାଉନସୁଗାର ବେପାରୀ ବୋଲି ଜଣାପଡିଛି। ମୋଟ ୭୧ ଲକ୍ଷ ଟଙ୍କାର ବ୍ରାଉନସୁଗାର ଜବତ ହୋଇଛି। କଟକ ଅବକାରୀ ବିଭାଗ ସହ ଢେଙ୍କାନାଳ ଜିଲ୍ଲା ପକ୍ଷରୁ ମିଳିତ ଚଢାଉ କରାଯାଇଥିଲା। ଏନେଇ ଅଧିକ ତଦନ୍ତ ଜାରି ରହିଛି।