ଜାତୀୟ ରାଜପଥରେ ବେଆଇନ ପାର୍କିଂ, ୮୭ ହଜାର ଟଙ୍କା ଜରିମାନା ଆଦାୟ
ଜୟପୁର: ଜୟପୁର ସହର ଦେଇ ଯାଇଥିବା ୨୬ ନମ୍ବର ଜାତୀୟ ରାଜପଥରେ ଗାଡି ପାର୍କିଂ ପାଇଁ ବାରଣ ହୋଇଛି। ଏନେଇ ଗାଡି ମାଲିକଙ୍କୁ ବାରମ୍ବାର ଅବଗତ କରାଯାଉଛି। ହେଲେ ସେଥିରେ କୌଣସି ସୁଫଳ ମିଳିପାରୁନାହିଁ। ଓଲଟା ଗାଡି ମାଲିକମାନେ ଟ୍ରକ ଓ ବସକୁ ଜାତୀୟ ରାଜପଥରେ ରଖି ଅଧାରାସ୍ତା ଅବରୋଧ କରୁଛନ୍ତି। ଏନେଇ ଆଜି ଆଞ୍ଚଳିକ ପରିବହନ ବିଭାଗ ଓ ପୁଲିସର ମିଳିତ ଭାବେ ଯାଞ୍ଚ କରି ଜରିମାନା ଆଦାୟ କରାଯାଇଛି।
ଆଜି ସ୍ଥାନୀୟ ଢ଼େପଗୁଡା ଠାରୁ ଗାନ୍ଧୀଛକ ମଧ୍ୟରେ ଜାତୀୟ ରାଜପଥରେ ପାର୍କିଂ କରିଥିବା ଗାଡିମାନଙ୍କୁଠାରୁ ଜରିମାନା ଆଦାୟ କରାଯାଇଛି। ଏଥିସହ ବାଇକ ଚାଳକଙ୍କ ହେଲମେଟ୍ ଓ ଗାଡିର କାଗଜପତ୍ର ଯାଞ୍ଚ କରାଯାଇଛି। ଆଞ୍ଚଳିକ ପରିବହନ ବିଭାଗ ପକ୍ଷରୁ ୨୨ଟି ଚାଲାଣରେ ୭୭ ହଜାର ଟଙ୍କା ଆଦାୟ କରାଯାଇଥିବାବେଳେ ଟାଉନ ପୁଲିସ ପକ୍ଷରୁ ୧୧ଟି ଚାଲାଣରେ ୧୦ ହଜାର ଟଙ୍କା ଆଦାୟ କରାଯାଇଛି।
ଏହି ଯାଞ୍ଚ ସମୟରେ କୋରାପୁଟ ଅତିରିକ୍ତ ଆଞ୍ଚଳିକ ପରିବହନ ଅଧିକାରୀ ତପନ କୁମାର ବେଟି, ସହକାରୀ ମୋଟର ଯାନ ନିରୀକ୍ଷକ ପି. ନାଗଭୂଷଣ ରାଓ, ଟାଉନ ଥାନା ଏସ୍ଆଇ ସଞ୍ଜିବ କୁମାର ମହାନ୍ତିଙ୍କ ସମେତ ପୁଲିସ ଟିମ୍ ସାମିଲ ହୋଇଥିଲେ।
