ପୁରୀ: ବାହାର ରାଜ୍ୟରୁ ଫେରି ଜଣେ ସ୍ଥାନୀୟ ଯୁବକ କୱାରେଣ୍ଟିନ ନିୟମ ଭାଙ୍ଗି ସହରରେ ବୁଲୁ ଥିବା କାରଣରୁ ତାଙ୍କ ବିରୁଦ୍ଧରେ ପ୍ରଶାସନ ତରଫରୁ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି I
Sambad is now on WhatsApp
Join and get latest news updates delivered to you via WhatsApp
ଗତ ୫.୭ ୨୦୨୦ ରେ ତେଲେଙ୍ଗାନା ରାଜ୍ୟରୁ ସ୍ଥାନୀୟ କୁମ୍ଭାରପଡା ଅଂଚଳର ଜଣେ ଯୁବକ ନିର୍ବେନ୍ଦୁ କୁମାର ପଟ୍ଟନାୟକ ପୁରୀ ଫେରି ଥିଲେ ଏବଂ ସ୍ଥାନୀୟ ମ୍ୟୁନିସିପାଲିଟି କଲ୍ୟାଣ ମଣ୍ଡପ ଠାରେ ପଂଜିକୃତ ହୋଇଥିଲେ I ପରେ ନିଜ ଘରେ ସଙ୍ଗରୋଧରେ ରହିବେ ଏବଂ ଘରୁ ବାହାରିବେ ନାହିଁ ବୋଲି ଲିଖିତ ଅଣ୍ଡରଟେକିଂ ଦେବାପରେ ତାଙ୍କୁ ନିଜ କୁମ୍ଭାରପଡ଼ାସ୍ଥିତ ବାସସ୍ଥାନରେ ରହିବାକୁ ଅନୁମତି ଦିଆ ଯାଇଥିଲା I କିନ୍ତୁ ଯେତେବେଳେ ସେଠାର ୱାର୍ଡ ନୋଡାଲ ଅଫିସର (୨୨ ନମ୍ବର ୱାର୍ଡ ) ରବି ନାରାୟଣ ମହାପାତ୍ର ତାଙ୍କ ବାସଗୃହକୁ ସଂଗରୋଧ ଷ୍ଟିକର ମାରିବାକୁ ଗଲେ, ସେ ନିର୍ବେନ୍ଦୁ ପଟ୍ଟନାୟକଙ୍କୁ ତାଙ୍କ ଘରେ ପାଇ ନ ଥିଲେ I ସେ ଫୋନ ଯୋଗେ ତାଙ୍କ ସହ ଯୋଗାଯୋଗ କରି ତାଂକୁ ନିୟମ ଅନୁଯାଇ ନିଜ ଘରେ ସଙ୍ଗରୋଧରେ ରହିବାକୁ ତାଗିଦ କରିଥିଲେ I କିନ୍ତୁ ନିର୍ବେନ୍ଦୁ ସମସ୍ତ ନିୟମ ଉଲ୍ଲଙ୍ଘନ କରି ତାଙ୍କ ସ୍କୁଟିରେ ସମୁଦ୍ରକୂଳ ଏବଂ ବଡଦାଣ୍ଡରେ ବୁଲିବା ଜଣା ପଡିଥିଲା I ନିର୍ବେନ୍ଦୁ ମଧ୍ୟ ନିଜ ବାହାରେ ବୁଲିବା ଫଟୋ ନିଜ ଫେସବୁକରେ ଛାଡିଥିଲେ I
ଆଜି ୱାର୍ଡ ନୋଡଲ ଅଫିସରଙ୍କ ଅଭିଯୋଗ ପରେ ପୌରପାଳିକାର ଅତିରିକ୍ତ ନିର୍ବାହୀ ଅଧିକାରୀ ସରୋଜ ସ୍ୱାଇଁ ଏବଂ ସ୍ଥାନୀୟ ତହସିଲଦାର ଆଶିଷ ସାହୁ ନିର୍ବେନ୍ଦୁ ପଟନାୟକଙ୍କୁ ତାଙ୍କ ଘରୁ ଆଣି ସ୍ଥାନୀୟ ରୁମାନୀ ହୋଟେଲରେ ଦେୟଯୁକ୍ତ କୱାରେଣ୍ଟିନରେ ରଖଛନ୍ତି I ଏଥି ସହ ପ୍ରଶାସନ ତରଫରୁ ତାଙ୍କ ବିରୋଧରେ ବିପର୍ଯ୍ୟୟ ପରିଚାଳନା ଆଇନ ୨୦୦୫ର ସେକ୍ସନ ୫୧ ଏବଂ ଆଇପିସି ଧାରା ୧୮୮ ଅନୁଯାୟୀ ଆଇନଗତ କାର୍ଯ୍ୟନୁଷ୍ଠାନ ଗ୍ରହଣ ପାଇଁ ପଦକ୍ଷେପ ନିଆ ଯାଉଛି I