ଅଙ୍ଗନବାଡ଼ି କର୍ମୀଙ୍କ ବିକ୍ଷୋଭ ଓ ଦାବିପତ୍ର ପ୍ରଦାନ

ଖୋର୍ଦ୍ଧା : ପ୍ରାୟ ଏକ ମାସ ଧରି ସିଡିପିଓ କାର୍ଯ୍ୟାଳୟ ସମ୍ମୁଖରେ ଧାରଣା ଦେବା ପରେ ଆଜି ଜିଲ୍ଲାର ଶତାଧିକ ଅଙ୍ଗନବାଡ଼ି କର୍ମୀ ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଧାରଣା ଦେବା ସହ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କ ଉଦେ୍ଦଶ୍ୟରେ ଏକ ଦାବିପତ୍ର ପ୍ରଦାନ କରିଛନ୍ତି ।

ବୁଧବାର ପୂର୍ବାହ୍ଣରେ ଭାରତୀୟ ମଜଦୁର ସଂଘ ଅନୁବନ୍ଧିତ ଅଲ ଓଡ଼ିଶା ଅଙ୍ଗନୱାଡ଼ି ଲେଡ଼ିଜ୍ ୱାର୍କରସ ଆସୋସିଏସନ୍ର ନେତୃତ୍ୱରେ ସଂଘର ଖୋର୍ଦ୍ଧା ଜିଲ୍ଲା ଶାଖର ଶତାଧିକ ସଦସ୍ୟ ହାତରେ ପ୍ଲାକାର୍ଡ, ବ୍ୟାନର ସହ ସ୍ଲୋଗାନ ଆଦି ଦେଇ ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ପହଂଚିଥିଲେ । ସେଠାରେ ଏକ ବିକ୍ଷୋଭ ସଭାର ଆୟୋଜନ କରାଯାଇଥିଲା । ଏଥିରେ ଜିଲ୍ଲା ସଭାପତି ପ୍ରଭାତୀ ପଟ୍ଟନାୟକ ଅଧ୍ୟକ୍ଷତା କରିଥିଲେ । ଏଥିରେ ସଂଗଠନର ରାଜ୍ୟ ସଭାନେତ୍ରୀ ସୁମିତା ମହାପାତ୍ର, ଉପସଭାନେତ୍ରୀ ବନିତାଂଜଳି ଦାସ, କୋଷାଧ୍ୟକ୍ଷା କୁଂଜଲତା ଦାସ, ଭାରତୀୟ ମଜଦୁର ସଂଘର ରାଜ୍ୟ କୋଷାଧ୍ୟକ୍ଷ ଲକ୍ଷ୍ମଣ ଦାସ, କାର୍ଯ୍ୟକାରିଣୀ ସଦସ୍ୟ ବିଜୟ ପାତ୍ର ପ୍ରମୁଖ ବକ୍ତବ୍ୟ ରଖିଥିଲେ ।

ଏନେଇ ସଭାପତି ଶ୍ରୀମତି ପଟ୍ଟନାୟକ କହିଛନ୍ତି ଯେ ଅଙ୍ଗନୱାଡ଼ି ର୍କମୀଙ୍କ ଆନେ୍ଦାଳନ ଦୀର୍ଘ ୩୮ ଦିନ ବିତି ଯାଇଥିଲେ ମଧ୍ୟ ସେମାନଙ୍କ ଦାବିପତ୍ର ସରକାର ସମ୍ବେଦନଶୀଳତା ଦେଖାଇନାହାନ୍ତି । ସେମାନଙ୍କ ଦାବିଗୁଡ଼ିକ ମଧ୍ୟରେ କର୍ମୀଙ୍କ ଦରମା ୧୮ହଜାର ଓ ସହାୟିକାଙ୍କ ଦରମା ୯ହଜାରକୁ ବୃଦ୍ଧି, ଇପିଏଫ୍, ଇଏସ୍ଆଇସି ଆଦି ପ୍ରଦାନ କରିବା, ମିନି ଅଙ୍ଗନବାଡ଼ି କର୍ମୀ ପଦବୀ ଉଚ୍ଛେଦ, ଅବସରକାଳୀନ ସହାୟତା ରାଶି ୫ଲକ୍ଷ ଟଙ୍କା ପ୍ରଦାନ, ଅଙ୍ଗନବାଡ଼ି କର୍ମୀଙ୍କୁ ଶିକ୍ଷାଗତ ଯୋଗ୍ୟ ଓ ବରିଷ୍ଠତା ଭିତ୍ତିରେ ପ୍ରି ପ୍ରାଇମେରୀ ଶିକ୍ଷୟିତ୍ରୀ ଓ ସୁପରଭାଇଜର ଆଦି ପଦୋନ୍ନତି ପ୍ରଦାନ ଆଦି ଦାବି ରହିଛି ।
ଏହି କାର୍ଯ୍ୟକ୍ରମକୁ ଅନ୍ୟମାନଙ୍କ ମଧ୍ୟରେ ଜିଲ୍ଲା ସମ୍ପାଦିକା ସରସ୍ୱତୀ ବଳିଆରସିଂହ, କୋଷାଧ୍ୟକ୍ଷା ଶ୍ରୀମତୀ ମନ୍ଦାକିନୀ ପ୍ରଧାନ, କାର୍ଯ୍ୟକାରୀ ସଭାନେତ୍ରୀ ପ୍ରଭାତୀ ମଙ୍ଗରାଜ, ଡଲି ରାଉତରାୟ, ସୂର୍ଯ୍ୟମଣୀ ମିଶ୍ର, ନମିତା ପ୍ରଧାନ, ରୀନି ଦେଈ ପ୍ରମୁଖ ପରଚାଳନା କରିଥିଲେ ।