ଭିସୁଟରେ ଅଚଳାବସ୍ଥା: ମୁଖ୍ୟ ଫାଟକରେ ତାଲା ଠୁଙ୍କିଲେ, ରାସ୍ତାରେ ମଧ୍ୟାହ୍ନ ଭୋଜନ ଖାଇ ପ୍ରତିବାଦ ଜଣାଇଲେ ଛାତ୍ରଛାତ୍ରୀ
ସମ୍ବଲପୁର: ବୀର ସୁରେନ୍ଦ୍ର ସାଏ ବୈଷୟିକ ବିଶ୍ୱବିଦ୍ୟାଳୟରେ ଉଭୟ ଶିକ୍ଷକ ଓ ଛାତ୍ରଙ୍କ ଧାରଣା ପରେ ଏକ ପ୍ରକାର ଅଚଳାବସ୍ଥା ସୃଷ୍ଟି ଦେଖାଯାଇଛି। ଦ୍ଵିତୀୟ ବର୍ଷ ଇଞ୍ଜିନିୟରିଂର ମେକାନିକ୍ସ, ମ୍ୟାଥ୍-୨ ଓ ରସାୟନ ବିଜ୍ଞାନ ଛାତ୍ରଛାତ୍ରୀଙ୍କ ଇୟର ବ୍ୟାକ୍ ଲାଗିଥିବା ଘଟଣାକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି। ବୁଧବାର ସକାଳ ୧୦ଟାରୁ ଛାତ୍ରଛାତ୍ରୀ ବିଶ୍ୱବିଦ୍ୟାଳୟର ମୁଖ୍ୟ ଫାଟକରେ ତାଲା ଝୁଲାଇ ଦେଇଥିଲେ। ତେବେ ବୁଧବାରଠାରୁ ବିଟେକ୍ ପ୍ରଥମ ବର୍ଷ ଓ ଇଣ୍ଟିଗ୍ରେଟେଡ ଏମ୍ଏସ୍ସିର ନାମ ଲେଖା ଆରମ୍ଭ ହୋଇଥିବାରୁ ଛାତ୍ରଛାତ୍ରୀ ଓ ଅଭିଭାବକଙ୍କ ଭିଡ଼ ଜମିଥିଲାଯ। ପରେ ସେମାନଙ୍କୁ ଭିତରକୁ ପଶି ଆଡମିସନ କରିବାକୁ ସୁଯୋଗ ଦିଆଯାଇଥିବା ବେଳେ ବାହାରକୁ କିନ୍ତୁ ଛଡ଼ା ଯାଇନଥିଲା। ଫଳରେ ଦୀର୍ଘ ସମୟ ଧରି ନୂତନ ଛାତ୍ରଛାତ୍ରୀ ଓ ଅଭିଭାବକ ବିଶ୍ୱ ବିଶ୍ୱବିଦ୍ୟାଳୟ ପରିସରରେ ଅଟକି ରହିଥିଲେ।
Sambad is now on WhatsApp
Join and get latest news updates delivered to you via WhatsApp
ପ୍ରାୟ ୧ ହଜାର ଛାତ୍ରଛାତ୍ରୀ କ୍ୟାମ୍ପସ ରାସ୍ତାରେ ତଳେ ବସି ଧାରଣା ଦେଇଥିଲେଯ। ଦିନତମାମ୍ ପ୍ରବଳ ବର୍ଷା ଲାଗି ରହିଥିବା ସତ୍ତ୍ୱେ ଛାତ୍ରଛାତ୍ରୀ ଧାରଣାରୁ ଉଠିନଥିଲେ। ସେପଟେ, ରାସ୍ତା ଉପରେ ମଧ୍ୟାହ୍ନ ଭୋଜନ ଖାଇ ଛାତ୍ରଛାତ୍ରୀ ଅଭିନବ ଉପାୟରେ ବିରୋଧ ପ୍ରଦର୍ଶନ କରିଥିଲେ।