ଦୁର୍ଘଟଣାଗ୍ରସ୍ତ ଛାତ୍ରୀଙ୍କ ଗୋଡ଼ ଅପରେସନ କରାଇଲା ଆମ ସଂଗଠନ

ବାଲିଅନ୍ତା : ସଡ଼କ ଦୁର୍ଘଟଣାରେ ଗୁରୁତର ଆହତ ହୋଇ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଥିବା ମେଧାବୀ କଲେଜ ଛାତ୍ରୀ ଜୟଶ୍ରୀ ଭୋଇଙ୍କ ଚିକିତ୍ସା ଲାଗି ଅର୍ଥ ବାଧକ ସାଜିଥିଲା । ଗୋଡ଼ରେ ଗଭୀର ଆଘାତ ଲାଗିଥିବା ଯୋଗୁ ଠିକ ସମୟରେ ଅପରେସନ ନହେଲେ ଗୋଡ଼ ହରାଇବାକୁ ପଡ଼ିବ ବୋଲି ଡାକ୍ତର ଜଣାଇ ଦେଇଥିଲେ । ଏଭଳି ପରିସ୍ଥିତିରେ ଅଗ୍ରଣୀ ସ୍ବେଚ୍ଛାସେବୀ ସଂଗଠନ ଆମ ସଂଗଠନ ଆଜି ଜୟଶ୍ରୀଙ୍କ ଚିକିତ୍ସା ପାଇଁ ସହାୟତାର ହାତ ବଢ଼ାଇଛି । ଆମ ସଂଗଠନର ଅଧ୍ୟକ୍ଷ କମଳ କୁମାର ପାତ୍ର ଆଜି ପୂର୍ବାହ୍ନରେ ହାଇଟେକ ହସ୍ପିଟାଲରେ ପହଞ୍ଚି ଜୟଶ୍ରୀଙ୍କ ବାପା ଲକ୍ଷ୍ମୀଧର ଭୋଇଙ୍କୁ ନଗଦ ୫୦ ହଜାର ଟଙ୍କାର ସହାୟତା ରାଶି ପ୍ରଦାନ କରିଥିଲେ ।

ଟାଟାଏସ ଧକ୍କାରେ ଜୟଶ୍ରୀଙ୍କ ଡାହାଣ ଗୋଡ଼ରେ ଗଭୀର ଆଘାତ ଲାଗିଥିଲା । ଆଣ୍ଠୁ ଉପରକୁ ପେଣ୍ଡା ପର୍ଯ୍ୟନ୍ତ ହାଡ଼ ଭାଙ୍ଗି ଦି’ ଖଣ୍ଡ ହୋଇଯାଇଥିଲା । ଗୋଡ଼ରେ ଲୁହା ରଡ଼ ଭର୍ତି କରି ଅପରେସନ କରିବା ପାଇଁ ୫୦ ହଜାର ଟଙ୍କା ଦରକାର ବୋଲି ଚିକିତ୍ସା କରୁଥିବା ଡାକ୍ତର କହିଥିଲେ । ଆବଶ୍ୟକ ଟଙ୍କା ଯୋଗାଡ଼ କରିନପାରିଲେ ଘାଆ ସେଫଟିକ ହୋଇଯିବ । ଏବଂ ଗୋଡ଼ କଟା ହେବ ବୋଲି ଡାକ୍ତର ଶୁଣାଇ ଦେଇଥିଲେ । ଡାକ୍ତରଙ୍କ ଠାରୁ ଏପରି କଥା ଶୁଣି ସାରିବା ପରେ ବାପା ଲକ୍ଷ୍ମୀଧରଙ୍କ ହୋସ ଉଡ଼ି ଯାଇଥିଲା । ଝିଅର ଚିକିତ୍ସା ପାଇଁ ଟଙ୍କା ପାଇଁ ଲକ୍ଷ୍ମୀଧର ଅନେକ ଲୋକଙ୍କୁ ନେହୁରା ହୋଇଥିଲେ । ହେଲେ ସେମାନେ ମୁହଁ ଫେରାଇ ନେଇଥିଲେ । ପରିବାରର ଏହି ଦୁର୍ଦ୍ଦିନ ସମୟରେ ଆମ ସଂଗଠନ ଦେବଦୂତ ସାଜି ଅପରେସନ ପାଇଁ ୫୦ ହଜାର ଟଙ୍କା ପ୍ରଦାନ କରିଥିଲା । ସୂଚନାଯୋଗ୍ୟ ବାଲିପାଟଣା ଥାନା ଅଧୀନ ଝିଣ୍ଟି ମେଳକ ଗ୍ରାମର ମେଧାବୀ ଛାତ୍ରୀ ଜୟଶୀ ବିଜେବି ଜୁନିଅର କଲେଜର ଦ୍ବିତୀୟ ବର୍ଷିର ଛାତ୍ରୀ । ୧୪ ତାରିଖ ସଂଧ୍ୟାରେ ବାଳକାଟିରୁ କୋଚିଂ ସାରି ଜୟଶ୍ରୀ ସାଇକେଲରେ ଘରକୁ ଫେରୁଥିବା ବେଳେ ସାତକାଣିଆ ଗ୍ରାମ ନିକଟରେ ଏକ ଟାଟାଏସ ଗାଡ଼ି ଧକ୍କା ଦେଇ ପୁରୀ କେନାଲକୁ ଓଲଟିପଡ଼ିଥିଲା । ସ୍ଥାନୀୟ ଲୋକ ଜୟଶ୍ରୀଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲକୁ ପଠାଇଥିଲେ । ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା ।