ରାଜଗାଙ୍ଗପୁର ବିଧାନସଭା ପାଇଁ ନାମାଙ୍କନ ଭରିଲେ ବିଜେଡି ପ୍ରାର୍ଥୀ ଅନିଲ

ସୁନ୍ଦରଗଡ଼: ସାଧାରଣ ନିର୍ବାଚନ-୨୦୨୪ର ଦ୍ୱିତୀୟ ପର୍ଯ୍ୟାୟ ମତଦାନ ପାଇଁ ନାମାଙ୍କନର ଷଷ୍ଠ ଦିନରେ ବୁଧବାର ରାଜଗାଙ୍ଗପୁର ବିଧାନସଭା ଆସନ ପାଇଁ ରାଜଗାଙ୍ଗପୁର ବିଜେଡି ପ୍ରାର୍ଥୀ ଅନିଲ ବରୁଆ ନାମାଙ୍କନ ଦାଖଲ କରିଛନ୍ତି। ହଜାର ହଜାର କର୍ମୀ ଏବଂ ସମର୍ଥକଙ୍କ ଗହଣରେ ବାପା ତଥା ପୁରୁଖା ବିଜେଡି ନେତା ମଙ୍ଗଳା କିଶାନ ସହ ଆସି ଅତିରିକ୍ତ ଜିଲ୍ଲାପାଳଙ୍କ ନିକଟରେ ନାମାଙ୍କନ ଦାଖଲ କରିଛନ୍ତି।

ଏହି ଅବସରରେ ସ୍ଥାନୀୟ ରାମଜୀ ମନ୍ଦିର ଠାରୁ ହଜାର ହଜାର କର୍ମୀ ଓ ସମର୍ଥକଙ୍କ ଏକ ବିଶାଳ ଶୋଭାଯାତ୍ରାରେ ଆସି ରାଜଗାଙ୍ଗପୁର ବିଜେଡି ତାର ଶକ୍ତି ପ୍ରଦର୍ଶନ କରିଛି।  ନବୀନ ପଟ୍ଟନାୟକଙ୍କ ସ୍ୱଚ୍ଛ ଶାସନ, ବିକାଶର ଧାରା ଏଥର ପ୍ରମୁଖ ପ୍ରସଙ୍ଗ। ଲୋକେ ନବୀନ ପଟ୍ଟନାୟକଙ୍କ ବିକାଶକୁ ଦେଖି ଏଥର ନିଶ୍ଚୟ ବିଜେଡି କୁ ଭୋଟ ଦେବେ ବୋଲି ଅନିଲ କହିଥିବା ବେଳେ ପୁରୁଖା ନେତା ମଙ୍ଗଳା କିଶାନ 'ଯେମିତି ରାଜଗାଙ୍ଗପୁରବାସୀ ମୋତେ ଏତେ ଦିନ ଭଲ ପାଇ ଆସିଛନ୍ତି ଆଗକୁ ମୋ ପୁଅକୁ ମଧ୍ୟ ସମାନ ଭଲ ପାଇବା ଦେବେ' ବୋଲି କହିଥିଲେ।