୩ ହଜାର ଟଙ୍କା ଲାଞ୍ଚ ନେଇ ଭିଜିଲାନ୍ସ ହାତରେ ଧରାପଡ଼ିଲେ ଫାଣ୍ଡି ଏଏସଆଇ
ବାଲିଅନ୍ତା: ଆଜି ସଂଧ୍ୟା ୬ଟା ସମୟରେ ଏକ ବିବାଦୀୟ ଜମି ମାମଲାରେ ତଦନ୍ତ ରିପୋର୍ଟ ଦେବା ପାଇଁ ୩୦୦୦ ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରାପଡ଼ିଛନ୍ତି ପାହାଳ ଫାଣ୍ଡିର ଜଣେ ଏଏସଆଇ । ଗିରଫ ପୁଲିସ ଏଏସଆଇ ହେଲେ ପ୍ରମୋଦ କୁମାର ପ୍ରଧାନ । ଶ୍ରୀ ପ୍ରଧାନ ବେଧଡ଼କ ଭାବେ ଫାଣ୍ଡି ଭିତରେ ନିଜ ଚେୟାରରେ ବସିଥିବା ବେଳେ ସଂନ୍ଦୀପ ପତ୍ରି ନାମକ ଜଣେ ବ୍ୟକ୍ତିଙ୍କ ଠାରୁ ୩୦୦୦ ଟଙ୍କା ଲାଞ୍ଚ ନେଉଥିବା ବେଳେ ପୂର୍ବରୁ ଫାଣ୍ଡି ବାହାରେ ଥିବା ୭ ଜଣିଆ ଟିମ ଅତର୍କିତ ଭାବେ ସେଠାରେ ଚଢ଼ଉ କରି କାବୁ କରିନେଇଥିଲେ । ପ୍ରମୋଦ ନେଇଥିବା ଲାଞ୍ଚ ଟଙ୍କା ତରତର ହୋଇ ସାର୍ଟପକେଟରେ ରଖି ଦେଇଥିଲେ । ଭିଜିଲାନ୍ସ ଟିମ ପ୍ରମୋଦଙ୍କ ସାର୍ଟ ପକେଟରୁ କେମିକାଲ ବୋଳା ଉକ୍ତ ଲାଞ୍ଚ ଟଙ୍କା ଜବତ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଭୁବନେଶ୍ବର ସହୀଦନଗର ଅଞ୍ଚଳର ସଂନ୍ଦୀପ ପାତ୍ରଙ୍କ ସହ ପାହାଳ ମୌଜାରେ ଜଣେ ବ୍ୟକ୍ତିଙ୍କ ସହ ଜମି ବିବାଦ ଲାଗି ରହିଛି । ଉକ୍ତ ଜମି ଉପରେ ୧୪୪ ଜାରି ହୋଇଛି । ପୁଲିସ ରିପୋର୍ଟ ଦେବା ପାଇଁ ପ୍ରମୋଦ ଦୀର୍ଘ ଦେଢ଼ମାସ ହେଲା ସନ୍ଦୀପଙ୍କୁ ହଇରାଣ ହରକତ କରୁଥିବା ଅଭିଯୋଗ ହୋଇଛି । ତଦନ୍ତ ରିପୋର୍ଟ ଦେବା ପାଇଁ ବିଭିନ୍ନ ଆଳ ଦେଖାଇ ଦିନ ଗଡ଼ାଇ ଚାଲିଥିଲେ । ଏମିତିକି ତାଙ୍କ ସପକ୍ଷରେ ପୁଲିସ ରିପୋର୍ଟ ଦେବା ପାଇଁ ପ୍ରମୋଦ ୩୦୦୦ ଟଙ୍କା ଦାବି କରିଥିବା ଅଭିଯୋଗ ହୋଇଛି । ତେଣୁ ସନ୍ଦୀପ ଏନେଇ ଭୁବନେଶ୍ବର ସୂର୍ଯ୍ୟନଗର ସ୍ଥିତ ଭିଜିଲାନ୍ସସେଲରେ ଅଭିଯୋଗ କରିଥିଲେ ।
ଯୋଜନା ମୁତାବକ ସନ୍ଦୀପ ଆଜି ସଂଧ୍ୟାରେ ପ୍ରମୋଦଙ୍କୁ ଭେଟିବା ପାଇଁ ଫୋନକରି ଜଣାଇଥିଲେ । ପ୍ରମୋଦ ତାଙ୍କୁ ଫାଣ୍ଡିରେ ଅଉନ୍ତି ଏବଂ ସେଠାକୁ ଆସିବା ପାଇଁ କହିଥିଲେ । ଏହାପରେ ସନ୍ଦୀପ ଫାଣ୍ଡିରେ ପହଞ୍ଚି ପ୍ରମୋଦଙ୍କ ହାତକୁ ଟଙ୍କା ବଢ଼ାଇ ଦେଇଥିଲେ । ଟଙ୍କା ଗ୍ରହଣ କରିବା ପରେ ସେଠାରେ ପୂର୍ବରୁ ପ୍ରସ୍ତୁତ ହୋଇଥିବା ଭିଜିଲାନ୍ସ ଟିମ ତାଙ୍କୁ କାବୁ କରି ନେଇଥିଲେ । ପାହାଳ ଫାଣ୍ଡିର ଜଣେ ଅଧିକାରୀ ଭିଜିଲାନ୍ସ ହାତରେ ଧରାପଡ଼ିବା ପରେ ଥାନାବାବୁଙ୍କ ଚେତା ପଶିଛି । ଥାନାରେ ରାତି ଅଧିଆ ବୈଠକ ଡକାଇ କାର୍ଯ୍ୟରତ ସବୁ ପୁଲିସ ଅଧିକାରୀଙ୍କୁ ତାଗିଦ କରିଥିବା ବିଶ୍ବସ୍ତ ସୂତ୍ରରୁ ଜଣାପଡ଼ିଛି ।