ନୂଆପଡ଼ା: ଜାତୀୟ ରାଜପଥ ସହକାରୀ ଯନ୍ତ୍ରୀ ସଂଯୋଗ ମେହେର ଆଜି ଖରିଆର ରୋଡ଼ସ୍ଥିତ ନିଜ ସରକାରୀ ବାସଭବନରେ ୨୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରାପଡିଛନ୍ତି । ଭିଜିଲାନ୍ସ ବିଭାଗ କୋରାପୁଟ ଡିଭିଜନର ଏକ ଦଳ ଖରିଆର ରୋଡ଼ ଉପରେ ଆଜି ଅତର୍କିତ ଭାବେ ଚଢ଼ାଉ କରି ଶ୍ରୀ ମେହେରଙ୍କୁ ଗିରଫ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ନୂଆପଡ଼ା ଜିଲ୍ଲା କୋମନା ବ୍ଲକ ଅନ୍ତର୍ଗତ ଗୋହିରାପଦର ଗ୍ରାମଠାରେ ଏକ ପେଟ୍ରୋଲ ପମ୍ପ ଖୋଲିବା ନେଇ ସୁଶାନ୍ତ କୁମାର କୋଲହାର ନାମକ ବ୍ୟକ୍ତି ଆବେଦନ କରିଥିଲେ । ତାଙ୍କ ପେଟ୍ରୋଲ ପମ୍ପ ଜାତୀୟ ରାଜପଥ କଡ଼ରେ ଖୋଲିବାକୁ ଥିବା କାରଣରୁ ସହକାରୀ ଯନ୍ତ୍ରୀଙ୍କ ଏକ ଅନୁଧ୍ୟାନ ରିପୋର୍ଟ ଦାଖଲ କରିବାର ଥିଲା । ଏହି ଅନୁଧ୍ୟାନ ରିପୋର୍ଟ ଦେବା ଦେବାପାଇଁ ଯନ୍ତ୍ରୀ ଶ୍ରୀ ମେହେର ୧ ଲକ୍ଷ ଟଙ୍କା ଦାବି କରିଥିଲେ । କିନ୍ତୁ ୨୦ ହଜାର ଟଙ୍କାରେ କଥା ଛିଣ୍ଡିଥିଲା ।
ପୂର୍ବ ନିର୍ଦ୍ଧାରିତ ଅର୍ଥ ନେଇ ସୁଶାନ୍ତ ଆଜି ଯନ୍ତ୍ରୀ ଶ୍ରୀ ମେହେରଙ୍କ ବାସ ଭବନରେ ପହଞ୍ଚିଥିଲେ । ଯନ୍ତ୍ରୀ ଶ୍ରୀ ମେହେରଙ୍କୁ ୨୦ ହଜାର ଟଙ୍କା ଲାଞ୍ଚ ଦେବାର ଅଳ୍ପ ସମୟ ପରେ ଭିଜିଲାନ୍ସ ବିଭାଗର କର୍ମଚାରୀମାନେ ସେଠାକୁ ପହଞ୍ଚିଥିଲେ । ଭିଜିଲାନ୍ସ ଚଢ଼ାଉ ଜାଣିବା ପରେ ଶ୍ରୀ ମେହେର ଛାନିଆ ହୋଇଯାଇଥିଲେ । ରାସାୟନିକ ପଦାର୍ଥ ମିଶ୍ରିତ ଟଙ୍କାକୁ ଲୁଚାଇବା ପାଇଁ ସେ ଚେଷ୍ଟା କରିଥିଲେ । ପରେ କରୋନା ହୋଇଛି କହି ଛେପ ମଧ୍ୟ ପକାଇଥିଲେ । କିନ୍ତୁ ଏହି ସବୁ ଅଭିନୟରେ ଭିଜିଲାନ୍ସ ବିଭାଗର କର୍ମଚାରୀମାନେ ଡରିଯାଇ ନଥିଲେ । ଶ୍ରୀ ମେହେରଙ୍କୁ ଭବାନୀପାଟଣାସ୍ଥିତ ଭିଜିଲାନ୍ସ କୋର୍ଟରେ ଦାଖଲ କରାଯିବ ବୋଲି ନୂଆପଡା ଡ଼ିଏସପି ସତ୍ୟବାନ ମହନନ୍ଦ ପ୍ରକାଶ କରିଛନ୍ତି।