ଖଣ୍ଡା ଆକ୍ରମଣରେ କଟିଲା ଆଙ୍ଗୁଠି

ହେମଗିର: ଆଜି ପୂର୍ବାହ୍ନରେ ବିଲେଇମୁଣ୍ଡା-ଲୁଆବାହାଲ ଠାରେ ଜୈନିକ ଦୋକାନୀକୁ ଖଣ୍ଡାରେ ଆକ୍ରମଣ ହୋଇଥିବା ନେଇ ଥାନାରେ ଲିଖିତ ଏତଲା ହୋଇଥିବା ଜଣାପଡିଛି। ଏଥିରେ ଦୋକାନୀଙ୍କ ଆଙ୍ଗୁଠି କଟି ହେମଗିର ଡାକ୍ତରଖାନାରେ ଚିକିତ୍ସା କରାଯାଉଥିବା ଜଣାଯାଇଛି। ଏତଲାକାରୀ ଦୋକାନୀ ବିହାରୀଲାଲ ପଟେଲଙ୍କ ପ୍ରଦତ୍ତ ଲିଖିତ ଏତାଲା ଅନୁସାରେ ଆଜି ପ୍ରାୟ ପୂର୍ବାହ୍ନ ଦଶଟାରେ ତାଙ୍କ ପୁଅ ଗିରିସାଗର ପଟେଲ ୩୫ ଦୋକାନ ସମ୍ମୁଖରେ ବସିଥିବା ବେଳେ ଲୁଆବାହାଲର ବିକାଶ ଦାସ, ତାଙ୍କ ଭାଇ ତାଜିମ ଦାସ ଓ ବିଜୁ ପାଣ୍ଡେ, ରନ୍ଦ୍ର ନାଏକ ସେଠାରେ ଆସି ଗଣ୍ଡଗୋଳ କରିବା ସହ ଏକ ଖଣ୍ଡାରେ ଅଚାନକ ଆକ୍ରମଣ କରିଥିଲେ।

ଏଥିରେ ବର୍ତ୍ତିବା ପାଇଁ ଗିରିସାଗର ହାତ ରେ ଅଟକାଇବାକୁ ଚେଷ୍ଟା କରିବାରୁ ଖଣ୍ଡା ହାତରେ ବାଜି ଏକ ଆଙ୍ଗୁଠି କଟିଯାଇ କ୍ଷତାକ୍ତ ହୋଇଥିଲା। ଆହତକୁ ତୁରନ୍ତ ହେମଗିର ଡାକ୍ତରଖାନାରେ ଚିକିତ୍ସା କରାଯାଇଛି। ଘଟଣା ପରେ ଅଭିଯୁକ୍ତ ମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏନେଇ ପୁଲିସ ଏକ ହତ୍ୟା ଉଦ୍ୟମ ମାମଲା ରୁଜୁ କରି ଫେରାର ଅଭିଯୁକ୍ତ ମାନଙ୍କୁ ଧରିବାକୁ ଉଦ୍ୟମ କରୁଥିବା ଜଣାଯାଇଛି।