୩ ଯୁବକଙ୍କୁ ପ୍ରାଣାନ୍ତକ ଆକ୍ରମଣ

ଭାଲୁମୁଣ୍ଡା: ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ଥାନା ଭାଲୁମୁଣ୍ଡା ଗାଁ ସାପ୍ତାହିକ ବଜାରଠାରେ ବୁଧବାର ବିଳମ୍ବିତ ରାତିରେ ୩ ଜଣ ଯୁବକଙ୍କୁ ପ୍ରାଣାନ୍ତକ ଆକ୍ରମଣ ହୋଇଛି। ସେମାନେ ହେଲେ ତୁରେକେଲା ଥାନା ମୁରିବାହାଲ ଗାଁର ତ୍ରିପୁରା ଜଗତ, ବିଜୟ ବେହେରା, ନରେଶ ମାଝୀ। ଆହତ ତିନଜଣଙ୍କୁ ଚିକିତ୍ସା ପାଇଁ କଣ୍ଟାବାଞ୍ଜି ଡାକ୍ତରଖାନାରେ ଭର୍ତ୍ତି କରାଯାଇଛି। ଏନେଇ ଅଭିଯୋଗ ହେବା ପରେ ପୁଲିସ ତନାଘନା ଆରମ୍ଭ କରିଛି। ପୁଲିସର ସୂଚନା ଅନୁସାରେ, ତୁରେକେଲା ଥାନା ମୁରିବାହାଲ ଗାଁର କିଛି ଲୋକଙ୍କ ତ୍ରିପୁରା, ବିଜୟ ଓ ନରେଶ ବେଲପଡ଼ା ପଞ୍ଚାୟତ ଦେଓଗାଁକୁ ଏକ ବରଯାତ୍ରୀ ଦଳରେ ଯାଇଥିଲେ।

ଉକ୍ତ ତିନି ଯୁବକ ସେଠାରୁ ନିଜ ଗାଁକୁ ବାଇକ୍‌ ଯୋଗେ ଫେରୁଥିବା ବେଳେ ଭାଲୁମୁଣ୍ଡା ଗାଁ ବଜାରଠାରେ କିଛି ସମୟ ପାଇଁ ଅଟକିଥିଲେ। ସେତେବେଳେ ୭ରୁ ଅଧିକ ଅଜଣା ଯୁବକ ସେମାନଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିବା ସହ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରି ଫେରାର ହୋଇଯାଇଥିଲେ। ତ୍ରିପୁରାଙ୍କ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍‌ପିଟାଲ ସ୍ଥାନାନ୍ତର କରାଯାଇଛି। ଅଭିଯୁକ୍ତମାନେ ସାନଗମଡ଼ା ଗାଁର ବୋଲି ଆଲୋଚନା ହେଉଛି।